呢張係我上次見到阿珊d指甲之後, 自己番屋企整嘅, 都ok哎!! 哈哈!! 最搞笑係, 竟然有個人同我講, 話佢上次都整咗d個款, 重要同我一模一樣, 問我係未睇唔知知雜誌整嘅!! Sorry囉!! 點一模一樣法呀!! 我都係望過吓阿珊隻手, 番屋企亂嚟咋喎!! 唔通我真係有天份到咁?!
之後波波指甲開始生長, 但我又懶喎!! 所以就咁向上面加咗d指甲油, 點知公司個秘書冇啦啦走出嚟, 話... 哎呀~~ 你個指甲好靚呀!! (堅定流呀?!) 本來諗住聖誕前整一整佢嘅, 不過真係節目接二連三, 所以到最後都係就咁就算啦!! 話時話, 原來向gel甲上面油嘅指甲油係好襟o家!!
今朝都未訓醒已經聽到老公向到求救, 點解??? 事關佢嘔囉!!! 但係佢又趕住番學喎!! 所以我朦朦鬆鬆下, 都叫佢嗱嗱聲出門口啦, 等我訓醒我會抹o家啦!!!
結果, 唔記得幾點, 醒咗!! 望吓!! 邊有佢講得咁誇呀!! 唔理!! 出去Toliet攞咗個地拖同一支漂白水, 唔理事咁!! 唔知洗唔洗加水!! 就咁倒到一地都係漂白水, 攞個地拖 ~ 拖拖拖!!! 拖完... 唔知邊個盆用得浸地拖, 唔理啦!! 就咁搵花灑淋吓佢算啦!! 不過點都逃唔過要扭番乾佢o家!! 唉!! 成手都係漂白水, 激死我啦!! 人哋對手唔掂得呢d嘢o家嘛!! 用手套?? 都唔知邊對手套用得!! 唉~~~ 橫掂都係喇!! 洗埋個垃圾桶 (其實佢係嘔落垃圾桶個袋到, 個袋佢已經拎走咗喇!!) 同兩對拖鞋先!!
終於都可以坐低寫吓blog, 講吓尋晚個Boxing Day Party喇!! 其實呢個Party就好似中秋節嗰次咁, 係阿Dick公司個天台BBQ, 除咗我哋一班蛋散之外, 重有佢哋一班同事, 所以話BBQ, 其實根本埋唔到個爐囉!! 太多人啦!!! (不過其實就算埋到爐, 我又有幾何燒哎!! 哈哈!!!)
又估唔到, 今次都算幾齊人喎!! 連嘉儀同Fion都嚟埋, 哈哈!!! 癲曬!! 個個都癲曬!!!
如果未攞到相嘅朋友, 可以向呢到攞http://s304.photobucket.com/albums/nn173/sugarpinkpanther/2008%20Christmas/
點解癲曬?? 我估係因為買去d白酒唔夠飲囉, 紅酒又唔係個個飲, 結果最多人都溝啤酒 (包括我) 一溝未乃咗嘢囉!! 咁都未至於醉嘅, 不過就大家都High曬喇!! 哈哈!!! 但係好開心喎!! 大家攬頭攬髻, 疾頭疾勢!! 哈哈!!!
難得今年聖誕節, 志雄有得放假陪我, 我哋一早起身就準備出去工展會行吓!! 食完嘢打比沙律, 原來Matthew前一晚飲大咗, 頭痛喎!! 咁算啦, 唯有我哋兩公婆自己去啦!!
買飛嗰陣, 我望入去展場, ee~~ 好似見到阿 T 喎!! 志雄話唔係呀!! 雖然知阿 T 向入面開檔, 但係都冇理由咁都比我見到o家!! 哈哈!! 我話咁一陣我哋入到去, 見到佢時睇吓佢係唔係戴白色帽哎!! 點知入去冇幾耐就見到佢間鋪, Yeah~~~ 真係比我估中咗, 真係佢嚟o家!! 佢重同我哋講, 如果一陣想bebe記得過去搵佢添!!
嘩!! 原來工展會都幾多嘢行嗰喎!! 不過為咗今晚重約咗班嘩鬼食飯, 費事一揪二lun, 所以我一樣嘢都冇買呀!! 唉~~ 其實d零食平嗰少少, 都費事拎呀!! 行行吓, 重撞見姑姐同表哥表姐一家添!! 估唔到咁大個場都竟然撞得到喎!! 哈哈~~
差唔多行咗3個幾鐘, 終於都行曬啦!! 搵阿 T 吹陣be番be就走喇!! 臨走阿 T 重送咗支擴鞋器比我, 話係聖誕禮物添, 好開心呀!! 因為見個擴鞋器又真係幾棧鬼囉, 重有d粒粒比你拮向比如腳指尾位, 或者有d人著得高跟鞋多, 腳指公下面舊骨未會頂起咗嘢, 咁你就可以特別整鬆d嗰部份d皮, 咁新鞋都唔會腳痛啦!! 哈哈!!!
夜晚, 同沙律, Matthew, 羅倫斯, Leo, Mike, Fiona去食煲仔飯, 正正正!!! 重笑到我傻添!!!
今年聖誕, 原本一心諗住去肥明個生日party, 所以都諗特別諗其他節目, 點知... 肥明嗰邊唔ok, 我哋又冇刻意諗呀!! 反正, 有老公陪住, 我哋幾時都咁開心!! 嘻嘻~~
24號晚, 原先我哋諗住靜靜哋過吓二人世界, 食完聖誕大餐就去影吓燈飾咁嘅!! 不過我哋又冇訂到位, 去邊到食玩呢?? 哎!! 志雄突然諗起之前一日, 我哋經過朗豪坊, 見到對面有間嘢, 細細哋但係好多人喎!! 唔正又冇理由咁多人啫, 嗰到好似重有聖誕大餐食o家!! 一於落去睇吓啦!!! 點知... 嗰位小姐話要等到10:30先有位喎, (當時都9:30o家啦!!) 但係10:30半後有7折!! 望吓個價錢, 百幾蚊個聖誕大餐, 重要有7折未好撚抵, 一於就等佢啦!!
之後我哋就上咗朗豪坊上面影相先啦!!
睇吓睇吓!! 我重同我嗰兩個比巫婆變咗做化石嘅父王母后相認番添!! 我都話我係公主嚟o家啦!! 哈哈!!! 終於有相全家福啦!! 哈哈哈哈~~~
影完一輪, 又be咗兩be, 咁又話夠鐘喇!! 嘩!! 一10:30, 門口最少有6 pairs向到等緊, 不過好快就入得喇!! 呵呵呵~~ 頭盤有4個choice, 餐湯有4個choice, 主菜有唔記得6個定8個choice, 甜品又有4個choice!!
結果, 我頭盆要咗個風乾火腿配露筍, 志雄就要咗個火雞沙律.
餐湯 ~ 我記得好似有雜菜湯, 龍蝦湯, 白湯同唔知乜Q魚翅雞湯咁上下, 不過我哋最後都係選番雜菜湯, 夠穩陣嘛!! 哈哈!!! 睇吓嗰兩件蒜容包細件到~~ 但係好好味....真係好好味o家!! 如果唔係重要食塊扒, 真係想問佢要多兩件呀!! 哈哈!!!
主角終於出場啦!! 5成熟西冷, 好夠香, 志雄都話煎得幾香, 可惜我食到一半, 已經唔夠力咬啦!! 比埋志雄食, 但係佢話佢嗰件冇我嗰件煎得咁香, 但係林好多囉!! 算啦!! 節目食嘢, 係有d參差o家啦!! 睇開d啦!!!
好!! 到甜品喇!! 其實我本人就麻麻哋甜品嘅, 但係呢個唔知咩咩蘋果卷, 嘩!! 好味到呢!! 又熱辣辣喎!! 我一放入口, 即刻碌大對眼望住志雄, unbilibulu囉!! 志雄即刻試吓, 佢都話好好味!!
不過比起蘋果卷, 佢好似更欣賞佢自己嗰份士多啤梨奶凍多d, 但係我就麻麻個士多啤梨甜咗d囉!!
最後係我杯餐飲 -- 係忌廉朱古力特飲!!! 味道其實同我哋平時沖粉飲嗰隻, 有綿花糖向入面嗰隻朱古力一樣味, 不過我想講嘅唔係呢樣, 而係當你諗住百幾蚊個餐, 重要有7折, 重有咁多選擇, 節日d水準重可以攞到85分樓上嘅時候, 當侍應問飲咩餐飲時, 重好殷勤咁介紹佢哋今日除咗coffee or tea之外, 呢個忌廉朱古力特飲都係免費o家!! 要唔要試吓呀!! 去邊到搵呀?!
唉!! 當影完呢杯特飲之後, 惡號就響起啦!! 部相機顯示“記憶體不足”, 我先記得我前幾日攞咗入面張Memory Card出嚟upload相囉, 志雄又唔知喎!! 唉~~ 咁點呀!!! 兩條友唯有買咗兩支酒, 打渡回府囉!!
尋日, 重上網睇緊豪哭3次嘅賤人1號搞乜鬼, 突然立到yahoo娛樂竟然話佢哋排期註冊.... 吓!!! 唔撚係吓話, 有冇快得咁緊要呀, 突然咗d喎師兄!!!
即係打比沙律, 講呢個號外比佢聽, 跟住就上fb啦!! 點知原來好多人已經向到談論緊呢個話題!! 我都唔執輸, 嗱嗱聲開番個topic先..."影衰曬我哋d女人呀!! 死蠢~ 你要死唔比你死咩!!" 冇幾耐之嘛, 即刻大把人留言!! 哈哈!! 嗰一刻真係有d激動~~ 真係覺得周低b好冇用囉!!!
到咗今朝番黎公司, 又睇吓報紙, 睇到d人對佢哋嘅評語, 大部份都係一面倒!! 但亦有少部份人好理智咁話, 佢哋只不過係明星啫, 其實好多人都係咁家啦!! 係喎~~ 又真係係喎~~~ 只不過係打個車輪, 認唔認錯, 分唔分手啫!! 係! 佢哋係快咗d!! 但係一早都知周低b會原諒佢家啦!!
再倒番轉頭講哎!! 其實e+d男人真係天真呀!! 打個車輪啫吓嘛~~ 超~~ 洗唔洗講到又孔雀開屏, 又散發中年男人味咁呀!! 挑~~ e+d女仔, 搵條脷嚟交吓朋友, 好平常家咋!! 有時飲多兩杯, 就會想搵個人錫吓咁囉!! 我自己都試過喎!! 睇吓你點睇家啫~~ 我就覺得同錫下我隻傻豹公仔冇分別喇!! 都係突然mood到, 錫吓隻玩偶咁解囉!! 分別只在於阿豹豹冇脷啫!! 哈哈哈~~~
唔該你哋d男人, 唔好覺得自己好威啦!! e+個世界唔同咗家啦!! 其實... 家家有求啫....錫吓好平常家咋喎..... 可能你哋嘅諗法係咸濕成功, 覺得自己好醒!! 但係向我哋嘅眼中, 你哋只係我哋悶悶哋攞嚟測試吓電力嘅玩偶咋!! 唔代表可以進一步囉!! 等你哋重傻到成晚寃住, 以為有得分.... 冇呀冇呀!! 過主啦!! 正低能~~ 我記得有一個上咗年紀, 自以為自己浦咗幾廿年, 懶巴閉嘅中坑同過我講!! 話我好彩有阿邊個睇實你咋, 如果唔係..... 你sit底咗9年啦!! 哈哈哈~~ 我覺得嗰條友真係好無聊囉!! 我d嘢到你管咩?? 你未又係嗰d低能兒.... 哈哈~~ 你低能啫.... 唔好當我哋d女真係傻先得家!!!
*P.S. e+結咗婚更係冇再係咁啦!!
所以都唔話得周小姐係低b嘅, 其實不論男女, 當我哋真係夠愛一個人嘅時候, 唔洗學.... 就自自然然識得包容, 識得諒解, 識得寬恕...... 呢d係我向我老公身上學嘅!! 雖然我未做得好好, 不過我會繼續努力家!!!
今日諗住放工去探老爺, 所以老公嚟接我!! 點知架巴士鬼死咁多人, 我哋又冇位坐, 所以我就企咗向下層嘅電視機位下面, 而老公就企向我對面, d人落吓落吓車, 我哋始終都冇坐低, 就向架車轉入馬頭圍道嘅時候, 老公突然極速咁捉住我隔離近門口嗰條柱, 跟住架車就boom一聲, 再勁chok咗嘢, 咁我老公就成個飛埋我到喇!! (好彩我後面有個軟毯咋!!) 我嗰一刻都未識驚, 剩係攬住佢, 問佢有冇事, 有冇整親!! 佢話冇嘢冇嘢, 又問番我有冇事, 嘻嘻!! 我成個身比佢包住咗, 又點會有事喎!! 呢個時侯, 我先見到其他坐向到嘅人, 有d都飛埋出嚟, 好彩大家都捉得住!! 當志雄放開我嗰陣, 我擰轉身望下個車頭先識驚, 嘩!! 個心跳得好厲害, 直頭好似想跳出嚟咁!!
之後, 好多人向到噪, 話要司機比佢哋落車, 志雄就發現自己撞親隻腳, 我叫佢休息一陣等差人嚟, 睇吓洗唔洗去醫院check吓啦, 佢就疑神疑鬼, 始終都分唔清自己究竟係普通撞親定整傷根骨, 咁既然係咁就更係繼續停警察嚟先算啦!! 襯呢個時侯我就問佢喇, 究竟頭先佢係諗住保護我, 定係自己諗住捉實條柱咋!! 哈哈!! 咁佢就話原來佢係睇住架車轉彎, 知道佢實唔夠過o家啦!! 但係前面架介款車, 咁大架停咗向前面, 照計司機知唔夠過實會急殺, 佢諗住我實企唔隱, 就捉住我隔離條柱, 怕我跌向門嗰邊, 但估唔到個司機繼續比油, 直至撞埋架介款車先停, 咁佢未成個人跌落我到囉!! 嘻嘻!! 算佢冇講大話啦, 冇明明唔係又講到好似自己好英勇咁, 哈哈!! 雖然證明唔到我老公向危急關頭, 會顧咗我先理自己咁偉大, 咁愛我!! 但係起碼佢出發點都係諗住保護我, 我都好開心!! 亦唔需要有其他嘅事實證明喇!! 今次已經足夠嚇到我鼻哥窿都冇曬肉喇!!
好彩到最後, 我老公都只係撞親吓啫!! 真係謝天謝地囉!! 嘻嘻!!!
尋日, 全日都好攰!! 最大問題係唔夠訓啦!! 亦可能係唔知點解, 經常性飲完酒第二日都會有種莫名嘅失落!! (咁點解重死死要飲呢?! 解釋唔到... ) 總之, 尋日就不在狀態啦!!
話down down哋啫, 都照樣有同Heidi通電話, 照樣都有哈哈大笑, 但係一收線就即刻悶到發荒, 再諗起唔知志雄幾點先收工呢, 直頭有d想喺架巴士到大叫發洩吓!! (哈哈!! 咁更係冇啦!! 你估我真係傻o家咩!!)
本來一早落車嘅我, 突然接到豬豬嘅電話, 叫我去銀行幫佢過錢, 唯有向慈雲山中心先落車啦!! 搞掂曬d嘢, 向住歸途進發嘅時侯, 我望到一塊鏡, 見到自己個樣衰到呢! 殘啦, 寒背啦, 眼皮半合啦, 嘟曬咀啦, 重之就疲態盡露啦!! (即刻擰開, 自己都唔想再睇!) 我強制性咁拉扯自己嘅面部肌肉, 唧出一個大大嘅微笑!! 唔笑尤自呵, 一笑... 真係覺得精神d喎!! keep~~ 再廷直腰板, 好神奇地... 連腳步都好似輕快咗, 諗嘅嘢又即刻正面咗, 心情都好似好番好多!!
唔知係未, 一個人嘅心情, 真係可以影響運程嘅呢! 番到屋企, 見到波子佢哋番咗嚟食飯, 大家有傾有講咁, 志雄重8點幾就打番嚟話收工添!! 雖然佢唔係好多嘢講嗰d人, 但係有佢倍我睇電視, 就算佢係悶蛋王, 我都覺得好開心好滿足!! 嘻嘻!!
尋日係媽咪嘅新曆生日, 我本來一心諗住同佢去稻香食$48大閘蟹嘅, 點知臨時先知, 原來稻香已經冇做呢個promo啦!! 突然間企曬向到, 食咩好呢?? 霖霖佢哋就話想去BBQ囉!! 但係因為屋企星期5嗰日整完電線, 成屋亂七八糟, 媽咪更係唔肯啦!! 佢話費事BBQ完番嚟, 佢又要做一大餐喎!! 嘻嘻!! 咁唯有再諗啦!
入媽咪屋企之前, 志雄話要帶我落黃大仙食車仔麵, 佢講到間車仔麵有幾好幾好食, 嘻嘻!! 又等我試過堅定癲先!! 點知一落到去, 嘩!! 竟然要排隊囉!! 有冇咁誇呀!! 點完餸, 志雄好嬉皮咁幫我碗車仔麵調味, 又話驚我辣得滯, 又呢樣又嗰樣... 哈哈!! 佢重笑淫淫咁, 好似好期待我食完第一啖就會讚佢叻仔咁!! 嘻嘻~~ 真係諗起都想笑佢呀!! 到我真係開始食喇... 一啖入口... 嘩~~ 係佢啦!! 起碼有20年冇食過呢個味嘅車仔麵呀!! 好味呀!! 真係冇介紹錯, 同我哋e+成日話好食, 但係剩係食到沙嗲味嘅車仔麵, 真係唔同!! 簡直係冇得比呀!! 死喇~~ 好似有少少上咗癮添!!
食完麵, 我哋就攬住個肚入華富村喇!! 番到屋企, 嘩!! 真係幾亂喎!! 我哋幫媽咪手拾吓嘢, 我又上網搵吓重有邊到有大閘蟹食, ee... 又真係比我搵到喎!! 哈哈!! 重要Open Rice有人讚添!! 嗱嗱聲就打去東園book位啦!!
上到東園, 見到原來佢都好多特價餐嗰喎! 結果我哋就點咗大閘蟹啦, 片皮鴨啦, 口水雞啦, xxxx煲啦, 糯米飯啦, 點知當大家食完d蟹雞鴨之後, 已經飽到不得之了啦, 食埋個糯米飯, 唔得啦!! 唔可以再食啦!! 結果嗰個唔知xxxx煲, 都要除消先得! 哎!! 又估唔到, 個部長唔單止冇西面, 重真係肯幫我哋除消添!! 重好好咁送埋糖水比我哋食!! 我哋同媽咪都話, 真係估佢哋唔到呀!! 服務又好, d嘢食又好味!! 真係要讚吓先得!!
星期6, 沙律一訓醒就打比我, 講我聽星期5晚我走咗之後發生咩事! 兩條eightlady係咁傾咗成幾粒鐘, 哈哈!! 之後就研究吓出唔出去食飯, 歐古又嚟咗香港, 夜晚又可能出去飲嘢!! 大家為咗出唔出, 傾到有d頭痕!! 結論就係... 出去食完飯先算啦!!
之後, 我就去咗探62喇!! 番到嚟99問我, 向唔向屋企食, 我重話唔向添!! 點知... 沙律就打嚟話冇飯局! 吓~~ 冇飯局!!! 少呵喎!!! 不過佢就話夜d出去飲嘢, 咁飲嘢之前我哋食d嘢未得囉!! ok!! 重好!! 可以睇埋萬千星輝頒獎典禮先出去, 嘻嘻!!
10點幾, 志雄打比我話等緊車番嚟屋企, 我就同佢講我要出去啦!! 佢話佢好攰, 叫我早d番, 又話太夜就唔等我喎!! 我有得去玩, 更係咩都話冇問題啦!! 點知傾傾吓, 佢有電話入, 話阿程叫佢出去飲嘢喎! 咁佢又見我都出街, 未應承咗囉!! 重要大家都係尖沙咀, 番屋企可以join埋添!! 點知頒獎典禮一做完, 沙律又打嚟話唔去啦喎!! 吓!! 唔係吓化, 咁我點呀!! 我話比志雄聽, 佢都即刻話, 吓!! 咁點呀! 咁佢重出唔出去好呀!! 哈哈!! 咁我就叫佢照出去啦, 反正佢咁少同d fd出去!!
之後, 沙律d電話就係咁打嚟, 一時又話都係出啦, 一時又話都係唔出啦! 屌!! 玩麼!!! 再打嚟話最後決定唔出喇!! 我即刻開咗個fb, 改番個靚名啦!! 出出出, 唔出, 出, 唔出, 出出, 結果都係唔出~~ 唉!! 試吓打比Heidi, 睇吓佢有冇局先!! 點知, 佢同阿米兩個飲緊悶酒, 唉! 算啦!! 開套籃球火大結局嚟睇吓先!! 諗起之前志雄同我講, 話訓先唔等我, 唉!! 家吓係我唔等你至真呀!!
嘻嘻!!
點知, 沙律又打嚟啦, 又話出啦!! 唉! 我問佢... 係未o家!! 屌!! 佢今次實牙實齒話係, 話珍珍好想出喎!! 好啦... 出啦!! 原本都諗住搭巴士, 但係落到街, 黑麻麻想嚇死我咩!! 嗱嗱聲打比Heidi陪我等的士! 出到去, 一飲就飲到3點!! 打比志雄, 佢叫我過去, 咁我哋就買單啦!! 向呢個時候, 志雄又打嚟問我去到邊, 佢話佢唔掂啦喎! 話落定樓等我!! 我更係叫佢唔好住啦!! 我邊有咁快過到去呀, 叫佢等多我一陣啦! 咁我就收咗佢線喇!!
差唔多過到去, 打比佢已經開始唔通, 唉!! 唔通真係話掛就掛!! 我更係連環call爆佢啦! 都係冇人聽!! 重要比人撩, 問我咁夜一個人向尖沙咀悶唔悶喎!! 真係想屌9佢呀!! 不過得我一個, 更係冇啦!! 哈哈!! 繼續奪命搖鈴都係冇人聽, 我唯有入去搵佢啦!! 不過要向一間嘈喧巴閉, 重有d人企曬起身嘅Bar, 去搵一個訓死咗嘅人, 又談何容易呢!! 重要新AT我又未落過, 上去轉咗個圈, 又唔知人哋嗰到有冇房, 如果有... 我都係唔會搵到o家啦!! 落番街keep住喪call, call埋阿程, 點知條死仔重熄埋電話!! 係未想監生激死我呀!!
呢個時侯突然諗起, 頭先我收佢線, 佢好似重有嘢想同我講嗰喎, 佢會唔會係話佢番去先呢?! 唉!! 咁點算呀!! 打比沙律問吓佢意見先!! 沙律叫我番屋企先, 又話尖沙咀咁雜, 一個女仔好危險, 唉!! 結果我都係唔多份氣, 入去搵多一次先得!!
唉!! 都係冇!! 咁我唯有番屋企啦!! 心諗~~ 佢會唔會真係番咗去呢?! 諗吓如果番到去唔見佢, 咁點算呢?! 或者佢已經向屋企訓緊覺呢?! 佢會唔會今晚唔番嚟訓o家?! 究竟死咗去邊呀?!
就向我架的士已經上到鳳德, 轉多兩個彎就番到屋企嘅時侯, 佢終於打嚟啦!! 一聽電話, 我又點會放過佢哎!! 係咁屌係咁屌!! 但係個問題係, 佢醉到咁又點會理我咁多哎!! 求其應我兩聲話番嚟就收咗線啦!!
同佢一齊十幾年, 佢同我去街一定會送我番屋企! 我住華富村時, 我自己去夜街, 佢都會等我電話, 傾住電話送我番屋企! 上佢屋企食飯, 佢都會向車站等埋我先一齊番屋企! e+一齊住, 我每次去街佢都會落街接我! 咁多年嚟... 冇送冇接冇講住電話嘅情況, 我諗真係冇幾次! 重可能係因為嗰晚有人送我番屋企添!! 但係今晚... 我竟然一個人, 冇人送, 冇人傾電話咁番屋企呀!! 夜麻麻~~ 嚇死我啦!!
等緊佢番嚟嗰陣, 真係好嬲呀!! 諗吓一陣佢番嚟點樣疲佢, 但係一見到佢番嚟個死樣, 個心就忍唔住笑喇!! 再見佢咁辛苦都重撩豹豹玩, 你估真係好fd咩, 我諗佢都係想氹我啫! 結果求其哼佢幾聲, 咋兩句型就算啦!! 心諗... 話咩人哎!! 自己好好咩! 佢平時都冇鬧我啦!! 唉~~ 算啦!!!
尋日放假, 嘩!! 比番工重忙囉!! 事關一早就出咗去同Bonnie食lunch, 又由於未買生日禮物過佢, 所以要早d出門口, 諗極都諗唔到晨早流流11點, 買咩好呢?? 又趕住約咗佢12點喎!! 結果 ~~ 學Eric買張老行家禮劵, 行就行咗d, 不過好過冇啦!! 一次一定用心選購, 希望佢唔好介意啦!!
食完飯, 我哋依然雞啄唔斷, 係咁傾傾傾到公司樓下, 撞到大象、Alice同另外嗰個好熟, 但係唔記得叫咩名!! 嘻嘻!! 當我一擰轉頭走, Bonnie就打比我喇, 心諗有冇咁痴纏呀!! 點知佢話佢一入lift就見到Pauline出嚟, 佢可能向我後面, 我就話 "吓! 我冇擰轉望呀!! 唔知係未向後面呀!! 嘩!! 咁快閃先得啦!!" 其實我就當然唔係唔想見到Pauline啦!! 只不過係一場落到嚟, 都唔搵佢就唔係咁好意思囉!! 但係, 一來我又唔得閒啦, 二來我都食完嘢啦!! 搵人做咩喎, 都係快閃好d!!
之後, 我就去咗銅鑼灣整我個Galadi喇!! 哈哈!! 又係試做o家, 唔洗錢!! 已經第4次啦, 真係一次比一次少, 我就嚟真係冇曬Galadi毛啦!! 今次, 個治療師都話我少Galadi毛, 轉sale我對腳啦!! 照咁睇, 我最多做多一次, 如果效果重未理想的話, 就唯有洗500蚊做次彩光啦!! 哈哈!! 出年夏天就唔洗咁煩啦!! Yeah~~
再次後, 我就番咗華富村, 本來媽咪話想同我去房屋處搞退名嘅, 不過我返到去, 佢又話今日辦事處嗰個人休息喎!! 乜得一個人負責o家咋咩?! 算啦!! 反正返到嚟, 坐吓同媽咪吹吓水未重過癮!!
5點啦~~ 約咗沙律5點, 但係我5點先離開屋企, 哈哈!! 不過原來佢都未ok, 我出到家樂重要等佢一陣間, 真係比佢激死!! 佢話叫我陪佢睇樓, 點知出到去, 原來佢只係入去d地產鋪問兩句, 叫人準備d資料, 佢諗住星期一等Matthew放假先睇喎!! 吓! 咁咁早叫我出嚟做咩呀?! 結果, 兩條友on99向旺角流!! 打比Fiona, 佢又番咗阿媽到食飯, 兩條友又唔想去cafe飲嘢, 都唔知搞咩好!! 最憎萬無目的咁流o家喇!!! 最大獲就係, 沙律突然話我知, Ricky生日喎!! 點解次次d人生日都生得咁突然嘅呢!! 哈哈!!
最後, 我哋選擇番咗我屋企睇電視, 佢就一路問我屋企有咩食, 有豬肉絲啦, 薑糖啦!! 佢又唔岩食, 結果比佢睇中咗我哋碌日本甜甜燒粟米, 雖然我知志雄都好想食, 但係擺咗咁耐啦, 下個月都到期喇, 沙律話曬過門都係客, 未比佢食囉!! 點知佢食咗一半, 竟然話食唔落喎!! 唉! 真係激死!! 咁唯有我食埋去啦!! 不過話事話, 冇我想像中咁好味啫, 都係向日本食新鮮熱辣嘅正好多!! 我都係咁同志雄講, 等佢唔好咁失望啦!!
既然番得我屋企, 更係想追吓電視劇啦!! 睇完一套又一套, Emily打嚟已經10點幾啦, 我同沙律就即刻嗱嗱聲, 拾嘢走啦!! 10點幾, 佢哋都應該開咗餐好耐啦!! 所以我就帶沙律去咗食慈云山地道嘅車仔麵, 嘻嘻!! 勁好食!! 沙律都一路食一路讚, 重話下次要帶Matthew嚟試吓添!!
終於都到壓軸節目喇, 就係去百利同Ricky慶祝生日喇!! 志雄都趕得切嚟食蛋糕, 之後我哋坐多咗陣都走啦, 事關我同志雄都好攰啦!!
由於我公司係做鑽飾生意, 而鑽飾又屬於非必需品, 所以你話今日金融海兆, 原完冇影響就更係冇可能啦!! 尋日, 公司已經決定全體員工, 由11月至出年3月, 每人每月放3日冇薪假, 有d人話咁未即係變相減人工?! 但係我又覺得咁樣, 已經係最細殺傷力嘅一個方案啦喎! 如果裁員未重衰, 如果話減人工, 到佢經濟好番少少, 話加薪都未必可以加番e+咁啦! 重有MPF呢, 雙糧呢?! 條數都唔好話唔com計!! 唉!! 志雄份工都因為咁冇做啦!! 我又每月少3日人工, 重要未過試用期, 你都唔好話唔驚!!
下午, 無無聊聊咁上yahoo星相睇吓嘢, 諗起上次睇過個紫微斗數嘅每周運程, 好似好準嗰喎!! 入去睇吓先, 嘩!! 準到呢!! 佢話志雄今個禮拜會好悠閒, 哈哈!! 睇到我都忍唔住笑! 話我唔知發生咩事, 跟住親人同友人可以幫我分擔!! 唉!! 減咗人工, 家用可能要比少d啦! 所以更係我最好嘅媽咪, 可以幫到我啦!! 事關我媽咪不嬲都好體貼, 每次我做野辛苦, 佢都會叫我唔好做, 有時重會話幫我補番比公司, 即刻走添!! 或者每次我轉工, 佢又唔洗我比家用! 不過, 今次應該點同佢講呢!!
點知... 媽咪尋晚自動打比我吹水, 我就原原本本咁講比佢講啦!! 當然佢如我所料冇問題啦!! 同媽咪講完之後, 成身好似輕鬆曬咁!! 下一步就係諗吓, 究竟d假期點放好呢?! 要抽日番去見吓媽咪先得, 真係好掛住佢呀!!
根據明報格價網的資料比較，百佳 出售的地捫忌廉黃粟蓉，比惠康 平了4.7元。
在十大差價貨品中，百佳和惠康各佔一半，各項貨品差幅輕微，由1元到最高的4.7元。
十大差價貨品
1. 地捫忌廉黃粟蓉418G百佳平$4.70
2. 藍冰啤酒12罐裝12'SX330ML百佳平$2.00
3. 是蜜味金牌茄汁焗豆420克惠康平$1.60
4. 立頓綠茶茶包25'SX2G惠康平$1.60
5. 威士/Wise蕃茄味薯片100G惠康平$1.50
6. 鴻福堂花旗參蜜1.5L惠康平$1.40
7. 屈臣氏促動純冰口感飲品500ml百佳平$1.10
8. 明治/四洲彩斯乳酪糖45G惠康平$1.00
9. 好立克營與美即溶加麥片(麥精味)8包裝百佳平$1.00
10. 百福低糖鮮豆漿946ML百佳平$1.00
尋日係Fanny結婚嘅大喜日子, 恭喜恭喜!!!
我呢... 就有份做姐妹, 話說向準備姐妹裙時, 原先我係諗住著條桃紅色嘅裙o家!! 不過搵唔到鞋襯... 大家知啦~~ 當你越想買一樣嘢時, 你就越買唔到o家嘛!! 最後我就去到金都, 想訂做一對Pink Pink鞋, 嗰個人話大概3-4日就ok!! 但係與此同時, 我又諗起之前借過條米色姐妹裙比Fion喎!! 問佢攞番未得囉!! 哈哈~~ 唔洗買!! 正!!
點知... 我成星期4先攞番條裙, 星期5晚先試上身, 唉! 唉!! 唉!!! 根本就拉唔曬條拉鏈!! 咁點算呀!!! 鞋又做唔切喇... 裙又唔岩著... 咁點算呀!!! 真係晴天pig pig呀~~ 知就知我做呢條姐妹裙時, 一度無啦啦暴廋, 但係都冇理由相差咁遠o家!! 志雄問我咁點呀?! 我就話條裙頭有條白邊, 咁唯有張條拉鏈拉到白邊嗰到就算, 扮嗰款係咁囉!! 再帶番條圍巾, 就神不知鬼不覺啦!! 唉!!
星期6下午, 我將呢單嘢話咗比媽咪聽, 叫佢幫我搵吓屋企有冇米色圍巾, 點知佢話佢出咗街, 夜晚重去打嗰d幾毫子上落嘅麻雀仔添!! 不過都應承幫我搵!! 再唔得就向Antie屋企搵條比我喎, 咁我又唔知佢搵唔搵到, 更係叫Kobe帶定條比我先啦!!
之前都講咗啦, 嗰日我哋行到好攰咁番屋企, 點知... 到我訓媽咪都未番!! 真係有d猛猛哋呀!! 咁即係點啫1點喇... 我都等唔切佢啦!! 明知我番嚟都唔早d番嚟見吓我哎嘛! 唉!! 反正條裙夜晚先著, 再唔得用Kobe嗰條, 或者下午先死去買條啦!!
點知... 我訓到迷迷糊糊, 聽到媽咪問我 "你條裙點呀?? 睇吓! 點改呀?? 差幾多呀??" 我眼訓到剩係答咗句 " 盡改啦!!" 咁就冇理佢喇!! 到第2朝起身, 見到條裙燙好咗掛咗向到, 即刻攞嚟試吓先, 嘩!! 拉到啦! 拉到啦!! 雖然吸大啖氣都係有d緊, 但係正常狀態係岩岩好囉!! 哈哈~~ 媽咪好勁呀!! 唔洗我度身, 都改到咁fit! 佢重準備咗成4條圍巾比我選擇添!! 再望吓媽咪熟睡個樣, 唔知佢之前嗰晚整到幾點呢?! 都係唔好噪醒佢啦!!
下午, Fanny同偉雄註完冊, 上咗香港公園影相, 而我哋成班兄弟姐妹就襯呢個空檔位, 去食番個tea先, 向呢個時侯媽咪就打嚟啦!! 我睇到來電顯示已經好開心啦, 第一句就同媽咪講 "媽咪! 唔該曬你呀! 尋晚咁夜重幫我改裙!!" 媽咪好甜咁話 "你又知?!" 嘻嘻!! 更係知啦!! 佢重話... 原來嗰4條米色系列嘅圍巾, 全部都係我o家!! 哈哈!! 我自己都唔記得原本有咁多條添!! 好彩尋日冇一時衝動又再買咋!! 係都留番買第二隻色啦!!
所以你哋話哎!! 我哋成日乍媽咪型, 其實除咗媽咪又有邊個肯, 夜麻麻只係為咗你想靚而唔訓覺呢!! 我真係好感動, 亦好感激我呢個咁錫我嘅媽咪呀!!
一早就打算今晚番嚟媽咪屋企訓, 事關聽日Fanny結婚要做姐妹, 好早就要到偉雄屋企集合!! 不過就係諗幾點先番去好呢?! 出唔出去行吓好呢?! 幾知呢個時候LinLin就打嚟喇, 話佢同Kobe諗住去睇藏愛喎!! 當然樂於奉陪啦!! 嘻嘻~~
不過經我哋MimiMormor換衫後, 又尤其我要拾埋聽日要用d嘢呢!! 結果出到去都成4點幾喇!! 點知原來今日係婚紗展, 好多舖頭都唔開, 我哋又諗住等埋沙律先入藏愛, 所以就跟派傳單姐姐落咗一間新開嘅舖頭, 嘩!! 佢哋個價錢真係勁抵, 呢衫呢... 其實我覺得都唔差, 比起金都... 比起好多細舖... 其實真係幾好!! 佢重要比佢哋試咗成十幾件衫都唔收錢, 冇乍型喎!! 不過沙律一嚟到, 就打眼式叫我哋走啦! 佢話d衫好cheap喎!!
去到藏愛, 嘩!! 更係靚啦!! 價錢咁靚!! 但係你又唔好話, 人哋真係件件都光鮮好多, 選擇又多... 重話比咗訂之後, 可以隨時去試衫都得!! 呢個服務又真係幾吸引嘅!! 經我哋你一言我一語BiliBala之後, 佢哋重比Kobe唔洗比試咗兩件勁靚嘅添!! 不過話曬今次都係藏愛主動打電話比佢哋, 叫佢哋落去睇多次, 價錢又話可以更優惠, 更係要聽吓有咩咁優惠先啦!! 點知... 嗰兩條友竟然話唔知情, 話得事個主管又唔向到, 結果係咁易平咗d upgrade價錢比我哋, 更係啋佢都傻啦!! 等下之佢哋再打嚟先算啦!! 沙律都講得岩嘅, 佢實打嚟嘅!! e+咁嘅市道, LinLin佢哋又出年先結婚, 唔洗咁急啦!! 到時真係分分佢急過我哋啦!!
之後, 我哋去咗明洞食完嘢, 再去女人街行咗陣!! 重點係... 我費事帶多對鞋番媽咪到, 所以著住對高跟鞋行咗成日, 對腳有d痛添... 咁聽日點算呀?!
呢幾日, 我同志雄都諗緊哈佬喂出唔出街呢?? 其實都唔係冇人問過出唔出去嘅, 不過嗰d只係識一兩個人嘅Party, 相信志雄都唔會有興, 而且... 大家都好攰, 其實真係出唔出都冇所謂!! 就算真係出都只係有諗過去蘭桂芳感受吓氣芬就算!!
點知... 今日唔知點解就係心郁郁想食大閘蟹, 諗過不如同老公兩個出去大刷一餐, 今年d套餐好似好低咁, 不過諗諗吓又覺得... 次次都食唔曬, 食完3隻蟹都飽曬啦!! 其他咩蟹粉小籠包呀....... 根本冇可能食到!! 咁點呢?! 上網睇吓訂一籮幾錢啦! 買番去媽咪到食未得囉!! 同Hedy兩個諗諗吓, 又驚咁急人哋送唔切貨, 我哋一人點攞到半籮各自歸家呀!! 經過重重考慮之後, 比Hedy諗到去稻香食48蚊隻, 咁平!!! 即刻打埋比阿Mike, 嗱嗱聲訂位啦!! 頂住癮都好哎嘛!!
好好味又唔講得, 不過釣引嚟講都唔算細!! 我哋一人食咗兩隻, 再叫咗個白灼蝦, 鮑汁花生雞腳, 唔知乜Q鮑魚仔, 瑤柱唔記得咩菇菜苗同埋一個咕嚕肉!! 點知志雄唔知點解飲完杯薑茶成身發興... 照計唔關飲啤酒事哎! 我哋4個人先飲咗兩支, 重要個個都有飲, 個個都冇事... 不過唔洗擔心... 過咗一陣佢就好番d啦!! 咁大家就各自番歸啦!!
上次都講過啦... e+間公司係唔玩得msn嘅(雖然間唔中我都有偷偷地開陣嚟玩)!! 但冇msn, 上網重有咩意思呢? 好彩呢排我搵到新節目!! 就係睇人d blog喇!! 其實不嬲我都有追開馬仔個blog, 不過e+咁多時間, 一個blog我又邊夠喉哎!! 嘻嘻!! 但係又未有心情睇小說住喎, 所以未搵d無聊8封嘢睇吓先囉!! 起初我無意中發現, 有個blog向到係咁話佢62有幾衰, 好似幾得意未睇吓囉!! 話曬我都係同6299住, 睇吓做借鏡都好哎!! 點知睇完, 真係覺得佢幾可憐, 相反呢... 我6299就好得多喇, 最起碼係佢哋唔會哦我先啦!! 其他?? 其實要向另一個家庭生活, 一定有好多嘢唔習慣同唔方便家啦!! 不過蘇花我都覺得係好多過唔好囉!! 嘻嘻!!
睇完呢個野蠻62blog之後, 突然諗起之前Hedy話想去書展買本書, 係一個mama每日記底佢一對仔女發生嘅事, 寫blog寫到出咗名... 咁就真係要睇吓啦!!
我有一個堅持, 就係無論睇小說好, 睇劇又好我都一定唔會偷雞睇佢嘅結局先嘅, 所以就算mamimama每日重係不停update佢個blog, 我都堅持由06年開始慢慢睇!! 佢真係好有恆心, 真係日日寫blog!! 記得我初初寫blog嘅時侯, 都曾經有過呢份雄心壯志!! 哈哈!! 雖然到e+, 我都只係睇到07年5月, 但係睇住佢d仔女一日一日咁大, 真係好得意!! dada又好搞鬼, 成日整蠱自己d小朋友, 好好笑!! 至於mama呢, 佢成日講d嘢都會搞到我眼濕濕, 唔知點講... 係窩心... 好掛住媽咪... 好衷境未來... 要更加珍惜現在...
尋日放工同Hedy又講起佢哋, Hedy話睇到佢哋覺得好幸福喎!! 係... 真係好幸福, 但係mama都講過啦, 其實佢唔係冇煩惱, 只係佢唔會成日都去諗呢d嘢, 同埋佢一番到屋企見到咁可愛嘅小朋友, 就滿足曬啫!!
再諗吓自己... 雖然志雄未至於悶蛋一個(有時重癲癲哋, 哈哈!!), 但係向屋企除咗一般溝通之外, 好多時佢有佢玩電腦, 我有我睇劇, 都係沈寂嘅時間比較多!! 但係每當佢每日自動自覺幫我洗飯盒同裝飯時, 我都會覺得自己好好彩, 比著第二個可能蘇我都有味呀!! 哈哈!! 重有一樣嘢... 我之前講過唔慣結婚後, 兩個人蓋一張被, 因為兩個人拉扯下, 中間一定有個空位入風, 而我比風吹親前後心就會氣管敏感, 成日都咳, 又咳極都唔好, 最近發現... 我老公訓覺成日有個小動作(佢識極速入睡法, 唔夠佢嚟!!), 就係仰睡嘅佢會將一隻手放出被外, 壓住我哋之間嘅被, 咁就冇風入到啦!! 咁細心哎嘛!!嘻嘻!!! 有時見佢明明訓ing, 都無啦啦識同我蓋被, 我就會即刻 i 住佢, 覺得自己無比幸福!!
哈哈!! 又比老公講中, 我成日都將人哋d事, 代入自己去諗埋d無聊嘢!! 其實真係冇得比嗰喎... 我又未生小朋友, 哈哈!! 千其唔好諗錯隔離, 我重未恨生仔, 等多兩年先諗呢個問題啦!!
尋日, 第一日番新工, 感覺都幾好, 不過又真係有少少未慣囉!!
一番到去, 就要簽呢樣簽嗰樣, 聽職前介紹之類, 跟住就行咗一轉間公司啦, 個個同事都係嗰句冇新意嘅台詞, 就係 ~~ 嘩!! 好高呀!! 哈哈!!! 再嚟又入番房, 聽電腦教學, IT同事話唔可以download任何公司冇批准嘅嘢, 唉!! 咁即係冇得download MSN啦!! 即刻灰曬!! 不過佢都話可以上吓網嘅, 咁我就即刻問佢, 咁唔download得msn, 咁向web到玩得唔得呢!! 佢話更係唔得啦~~ 用意唔係唔比downlaod, 係唔比玩嘛!! 唉! 重灰!!
一搞就搞到成11點幾, 坐埋位學埋d嘢, woo~~ 1:00pm啦!! update吓個phone list, 咁又食飯喇!! 同個Admin Manager, 大秘書同埋另一個Admin女仔, 四個人去食飯, 雖然未至於好岩傾, 但係大家都好nice!!
2:30pm番到公司, 阿姐已經幫我分緊信, 咁我又學吓mark簿啦, 又學吓分信啦! 搞掂之後, 阿姐依然坐向我隔離, 大家又吹吓水, 原來如果佢下午得閒, 會出嚟幫吓我手, 順便又陪吓我囉, 4點幾佢就講要入番去做嘢喇, 咁我就上吓網囉!! 時間都好快過, 咁就放工喇!!
番咗一日工, 今日又放假!! 哎呀~~ 重之加油啦!! 聽日又要番去迎接新挑戰, 因為尋日所有老板都冇番工, 唔知聽日見唔見到呢!! 有d緊張添!!
呢幾晚都失眠, 唔知係唔係話唔緊張啫, 始終都有d心理壓力呱!!
尋日去咗second in, 見到個老板, 佢好好笑o家!! 唔係佢個樣有咩好笑, 係佢勁講自己d生平事, 又講自己16歲去咗美國, 又講自己有間律師樓, 又話自己都有會計師牌, 所以都有間會計師樓, 又話佢以前都係住慈云山, 又話攞人哋裝修道門嚟打乒乓波, 又話佢老豆以前向銅鑼灣做看更, 拾咗部黑白電視番屋企, 先有電視睇....
可能係得唔得都以成定局呱, 又可能係太多晚唔夠訓啦!! 我尋晚9點幾就訓咗喇!! 點知今朝11點幾佢就打嚟話ok, 星期一簽約!! 哈哈... 搞到今日原先重有份工見, 都唔去啦!! 懶哎嘛!! 估唔到一份就搞掂, 嘻嘻!!!
6號番新工, 嚟緊呢個星期要安排d節目玩吓先得!!
今日明明要見3份工, 點知嚟嘢鬼咁肚痛, 結果見得一份紅磡, ee... 紅磡嗰到都唔係好遠咋喎! 我搭的士去都係40幾蚊, 回程都只係半個幾鐘, 好ok哎!!
份工係做鑽飾生意o家!! 不過番工時間就長d要番9-6:30, 不過其實都可以accept嘅, 大假都好少o家!! 第一年得7日, 之後每年加一日, 不過都算啦!! 其實我都好少放長假嘅! Bonnie話齋, 我咁孤寒成日都唔放假! 哈哈!! 但係佢有雙糧加花紅喎!! 聽講都唔少o家!! 搞到我有d興趣添!!! 最好嘅就係, 過咗3個月試用之後重有得制服著, 不過都唔係咩制服嘅, 只係G2000嗰d行政look啫!! 但係都好哎! 唔洗日日諗著咩衫番工, 哈哈!! 我嗰陣成日同Bonnie講如果公司有制服著就好, e+終於有啦!! 哈哈!! 重有佢呢到唔洗OTo家! 佢話試過因為有客要lunch嚟, 要求個recept向公司食飯, 咁都有OT補番, 哈哈! 有幾均真喎!!
do do lu do ~~~ 直擊報導.... 岩岩接到電話叫我星期4 second in....
自從17號離職之後, 一直都係一大班人, 尋日又姥爺生日, 志雄又放假, 所以都冇乜感覺, 但係今日大家都回復正常啦!! 一朝訓醒, 百無了賴... 開msn同班蝨乸吹吓水, 之後就上網搵吓工啦!! 點知即刻有電話打嚟, 問我一陣可唔可以去見工, 我話今日唔得呀 (傻o家咩?! 我未ready喎!!) 不如約星期一啦!! 跟住嗰條女講講講, 原來佢哋要番星期六, 咁真係sorry喇, 唔洗啦! 唔該!!
但係d電話繼續係咁嚟, 乜e+d公司真係咁有效率o家咩?! 真係咁等人用?! 結果約咗星期一3份, 一份太古坊 ~ 又係側魚涌, 好似有d遠喎!! 諗吓先啦!! 一份紅磡 ~ 紅磡?! 冇地鐵o家喎!! 唉!! 另一份係銅鑼灣 ~ 唉! 乜又係過海o家! 唔通九龍真係冇工咩!! 嘻嘻!!
唉!! 唔理住啦!! 玩埋個星期六日先算啦!!!
今日一早, 如常番到公司, Angie冇啦啦走埋嚟問我, d文具放向邊, d key又放向邊, 話驚我放假時冇人知喎!! 個問題係... 我根本冇入過假紙囉!! 其實都心感不妙o家啦!! 點知真係.... 裁員喎!! 話搬咗去新office就唔要reception啦喎! 唉!! 點解次次都有我份o家~~
不過其實都一d唔出奇嘅, 一間公司最冇用, 我諗都係receptionist呱!! 但係唔知係未始終結咗婚呢, 今次我又冇乜點喎, 咁唔開心一定有d嘅, 但係就好平靜咁囉!! 佢哋向lunch前, 出多咗一個月糧比我, 計埋d雙糧同假期, 都叫補得足啦! 就咁就叫我走啦, 完全冇人知! 好彩... 我向門口見到阿冰, 即刻叫佢叫大家唔好食個飯盒, 成班同我落街食, 大家聽到呢個消息都好震驚, 不過震驚又有乜用哎!! 都唔會關佢哋事o家啦!!
但係同佢哋做同事, 又真係幾開心嘅, 日日癲吓癲吓又一日喇!! 食完呢餐lunch, 都唔知會唔會再見呢!! 嘻嘻!! 不過我e+都睇得好化啦, 又唔係第一次....
下午, 叫醒沙律出嚟陪我, 我哋同Matthew去咗飲茶, 再上咗阿Dick公司坐, 點知就比我哋8到, 羅倫又蝦女仔, 重要向Pauline個生日會搞事, 哈哈!! 事事都係咁, 剩係識得蝦女人, 真係冇Q用呀!!
夜晚, 就因為姥爺聽日生日, 所以入華貴食水餃! 話說我買咗盒燕窩, 話係志雄送嘅! 點知志雄一嚟到, 去上房叫姥爺, 姥爺即刻問佢熱唔熱呀, 叫志雄入佢房坐, 嘩!! 以我所知, 姥爺真係好少咁, 基本上連我哋都少啦!! 志雄真係.... 哈哈哈!! 全靠我識做咋!!! 嘻嘻!!
尋日一早, 又番到北角office啦! 當然都係未慣啦... 悶就預咗o家啦!! 升級同餵我隻pinky仔就冇乜行o家啦!! 好彩Trisha提我, msn係可以較透明色o家嘛, 咁玩起上嚟未冇咁覺囉!! 哈哈!! 佢有時都有d用嘅, 嘻嘻!!
Lunch~~ 就係唔知食飯點, 所以大家就約定一齊食杯麵, 試吓個環境點先, 因為唔知洗唔洗排隊叮飯嘛!! 不過叮飯原來都冇乜問題, 最大問題係大家要困向一個好細嘅pantry入面, 而其他同事們呢, 原來連食飯都好靜o家!! 我哋... 又點忍到哎! 結果又係我哋最噪囉!! 哈哈!! 由於食杯麵嘅關係, 大家又點會夠飽哎, 我哋成班又落咗街買野食喇!! 本來相處都好融洽嘅我哋, 就係呢兩日好似更係團結咗, 同埋有份不可言喻嘅感情產生咗! 好多時, 只係向公司走廊遇到, 乜都冇講... 都唔知點解大家就笑咗出嚟~~ 好似好耐冇見, 又好似有千言萬語, 又好似唔洗講大家都明.... 就係一個"悶"字囉!! 哈哈!!
下午, Teresa問我得唔得閒幫手, 我話~ 吓! 粗重嘅我唔做o家! 哈哈! 原來只係幫佢mark吓價錢啫, OK啦!! Pauline又見我悶悶哋, 就幫我同Angie講入6號房幫手! 原先我都好開心o家, 更係啦! 6號房最多人, 咁好玩... 點知原來mark價錢都好攰o家! 又冇得坐, 續件衫睇.... 嘻嘻!! 所以我mark咗唔夠兩條樋就走頭啦!! 哈哈!! 想攰死我兩條腿咩!!
放工, 同heidi去睇黃子華, 等咗咁耐終於有得睇啦! 舞台劇呢家嘢, 平時我都會買吓dvd同媽咪一齊睇吓嘅, 不過親身去現場睇都係第一次, 更係啦~~ 子華喎! 更係要支持吓啦!!
呢個故事其實好簡單, 只係圍繞三個情同手足嘅男性朋友, 因為其中一個用高價買咗一幅現代派油畫, 就引起連串嘅爭議, 三個人嘅友誼更因為價值觀同藝術上嘅不同理解, 而出現裂痕!!
劇入面, 金句就更係有啦!! 子華即係子華嘛!! 但係反而我同heidi都對陳淑儀---呢個聽個名以為係女仔嘅男人, 留下好深刻嘅印象, 事關佢嘅支體動作, 真係幾搞笑... 尤其佢嗰句 "如果我係我, 因為你係你, 所以我係我......." 真係笑死人, 不過坐我哋隔離嗰個男人, 係又笑唔係又笑, 就真係極之黑人憎囉!!
完場時, 大家重大叫 "祝子華生日快樂" 添!! 子華重同我哋講咗一陣笑, 好開心呀!!
睇完後有小小心得: 雖然故事好似好簡單, 佢哋三個亦演繹得好搞笑, 不過都令我有d得著, 覺得佢哋三個就好似反映緊幾重唔同嘅人格, 就好似九型人格入面嘅唔同人性咁, 其實我哋每個人, 平時好似同身邊朋友個個都好好咁, 但係經常都有因為平時唔講, 唔好意思講, 懶得講...... 而令有一日問題嚟嘅時候, 一發不可收拾! 而我呢~~ 就覺得自己都幾似子華嘅角色, 以自我為中心, 諗嘢亦有d偏激, e+睇到佢~~ 覺得自己有時都幾無聊囉!! 嘻嘻!!
尋日, 我哋終於都搬番北角back office啦! 臨走就當然要向WTC影吓相啦!! 都幾好笑嘅...
好喇!! WTC再見啦!! 33樓bye bye啦!!
之後我哋成班就去咗食buffet喇!! 佢哋班傻婆, 當然唔會放過任何低能嘅機會啦!! 竟然搵d朱古力畫公仔, 哈哈!! 重係咁影相添!! 真係唔知好嬲定好笑呀!! 嗰隻咁嘅蝨乸究竟重要跟我哋幾耐呀! 哈哈~~
食完buffet, Angie比我哋行一陣先番北角office, 我哋呢... 就番番去世貿打機, 哈哈!! 好似都係離不開WTC咁嘅, 早知就唔攞袋住啦!! 嘻嘻! 懶得我哎!! 話打機啫, 其實我又邊識打哎!! 都係玩吓d低能games.....
唉!! 又係時侯番北角啦!! 上到去... 公司真係好大嘅, 不過就靜到仆街囉!! 我坐個位重要比成班admin圍撚住, 想上吓網都有困難, 唉!! 呢兩個月點捱呀!! 快d到11月啦~~
不過, 今日乜都冇做過, 剩係拾吓嘢咁啦!! 跟住又去番6號房, 搵其他流落back office嘅孤兒仔吹水啦!! 哈哈!! 我哋又係繼續笑笑笑, 好似成間公司, 我哋最噪添!! 就係咁玩吓拾吓... 結果連放工都唔記得, 我成7點先走呀!! 哈~~
話說我公司搞咗個學整蛋糕嘅活動, 有兩款蛋糕比我哋選, 但係要抽籤中咗先有得去o家!! 又咁好彩比我抽到, 我想學嘅開心果朱古力蛋糕喎!! 所以我哋尋晚放咗工就滾水6腳咁碌落旺角喇!!
好好玩呀!! 尤其係整個朱古力邊嘅時候, 雖然好簡單, 但係個滿足感好大喎! 下次食蛋糕見到, 都可以懶叻咁同人講, 呢個我都識呀! 哈哈!! 至於其他過程呢, 雖然就唔係話教得好detail, 叫我整番出嚟可能都重係有d難度, 不過有得玩, 有得食, 又有餐威, 最重要係唔洗錢嘛! 重想點呀?! 嘻嘻!!!
番到屋企, 同老公即刻開餐試吓個製成品先, 嘻嘻!! 老公話好好味呀! 又唔太甜! 聽到我勁開心添!! 不過我就麻麻地佢個杏仁餅底囉!! 我重特登留起一舊, 等我聽日番外家, 可以帶番去比媽咪試吓添!! 嘻嘻!!!
好!! 比大家睇吓d相啦!!!
今日想同大家分享一個故事：白雪公主喺一個富裕嘅城市入面一個唔係咁富裕嘅家庭出世。皇后死得早，好彩父王同姐姐都好錫佢，童年生活幾愉快。大個左之後，佢試過幾次遇人不淑，最後終於搵到一個深愛嘅王子，為咗佢，白雪公主甘心離開自己嘅家人，去到陌生嘅歐洲小城生活。
白雪公主同王子生左個女，每日嘅生活，除左湊女之外，就係幫老公手打理小生意。好快過左十幾年，白雪公主個女亭亭玉立，生意亦都越做越大。本來白雪公主覺得上天對自己都算係咁，點知有一日返到屋企，見到個後生女，不過佢唔係白雪公主個女，而係王子嘅情婦！
白雪公主心都碎埋，唯有返番去老家啦。白雪公主同屋企人十幾年冇見，感情有啲生疏；同班姨甥仔女都唔係咁夾，佢地仲成日頂撞白雪公主…不過白雪公主覺得一家人唔應該咁計較，諗住「以德報怨」，對佢地多啲關懷。點知佢地以為白雪公主出賣佢地，父王嬲到成個湯殼扑落白雪公主個頭度，白雪公主姐姐仲鬧足白雪公主成餐飯…
咩話？你地覺得個故仔熟口熟面？梗係啦，「白雪公主」咪即係我鍾笑莎囉！
點解我要寫呢個故仔？唔通一把年紀仲幻想自己係白雪公主？
錯錯錯！我咁寫係為左提醒自己，而家普遍流傳嘅《白雪公主》，只不過係呃細路嘅故仔！話白雪公主「以德報怨」，同王子結婚之後，原諒左害佢嘅繼母，只不過係格林兄弟為左提高銷量，足足改左七次嘅版本！
喺初版格林童話入面，白雪公主邀請繼母參加佢同王子嘅婚禮，特登準備左一對燒紅左嘅鐵鞋，逼佢繼母著，熱到佢繼母係咁跳跳跳–跳死左！
證明喺童話入面嘅人物都唔會以德報怨，何況係現實世界？
我今次係自己攞嚟衰，抵死嘅！
所以只此一次，下不為例。
今日要去打斑, 所以尋晚我就番咗媽咪到訓, 屋企真係好舒服, 個個都就曬我, 哈哈!! 我重買曬薯片番去, 同媽咪煲多次開幕式添!! Yeah!!!
今朝一早起身, 媽咪就陪我去醫院辦入院手續, 唔好聽到入院手續諗到咁大件事, 衫都唔洗換嘅, 循例嘅啫!! 跟住就要量血壓, 探熱啦!! 之後護士就比咗支藥膏我, 叫我塗向要打斑嘅地方, 我諗咗一陣, 究竟點好呢, 一次過定整住少少先好呢?! 望吓其他人, 嘩!! 有d好豪情喎!! 成塊面整曬, 半邊面胎痣, 真係想問吓! 小姐, 其實你整過未o家!! 洗唔洗咁勇呀!! 最後我都係決定整咗一邊面嘅權骨位先, 試試佢個效果先嘛!!
塗完嗰支藥膏一陣, 我塊面已經麻痺咗啦!! 向呢個時候, 媽咪就話要去做義工走先喇!! 嗰時先差唔多1點, 但係醫生要2點先番!! 好啦! 咁我就睇下雜誌啦!! 到2點護士又話, 醫生做緊手術要晚少少先番, 等到2:30終於有得整, 我重要係第一個整添!! 過程一d都唔痛, 好似比針細細力拮拮吓咁! 到整完都唔洗3分鐘!! 請留意, 即係大概2:33分咁上下啦!!
我坐向出面等攞假紙同藥單, 好彩e度有奧運跳水睇, 都冇咁悶!! 向呢個時侯, 可怕嘅事就發生啦!! d麻醉藥過啦!! 呀~~~ 如果唔係有咁多人向到, 我一定大嗌囉!! 呀~~~~ 感覺好似比人用漒水淋咁囉!! (當然我未試過啦!! 幻想吓啫!!!) 我即刻打比媽咪, 因為媽咪都打過斑嘛, 佢有經驗啦!! 佢話係好痛, 正常o家!! 不過到我走嗰陣就唔痛o家啦!!
結果, 真係過咗一陣就唔痛喇!! 但係點解重未走得o家!! 唔多對路喎!! 原來係因為佢哋醫院, 個電腦壞Q咗!! 搞到我成4點幾先攞到藥單, 去到藥房重要排, 結果成5點先走得呀!! 都唔知有冇搞錯o家!!! 搞少少嘢啫, 搞咗成日囉!!!
唉!! e+變咗個爛面妹啦!! 不過起碼都要整多兩次!! 塊面有排爛添!!!
今日4點幾, Yumi去完bank番嚟, 話地鐵比人放咗d不明物品, 搞到封曬Sogo嗰邊! 到到我放工, 好似都未開番, 本來以為冇乜影響啫, 我都唔係搭地鐵, 點知.... 嘩!! 塞車塞到爆囉!! 搞到我幾驚趕唔切8點番到屋企, 睇奧運開幕式呀!! 好彩志雄早番, 幫我買曬麵包同啤酒薯片, 我哋先可以岩岩趕得切8點番到屋企咋!!
講番個開幕式, 真係... 真係... 真係好好睇呀!! 尤其係一開始, 倒數嗰個環節, 嘩!! 實在係太勁啦!! 好震撼呀!!! 真係人多先有咁嘅效果, 咁要佢哋勁齊呢!! 真係威到盡呀!!!
另外, 其實其他好多我都好鍾意, 好似造紙嗰part哎, 由假變真嘅好似聖旨嗰卷嘢, 我嘩咗出嚟囉!! 重有閃曬燈嘅5環, 懶洋洋咁升起,真係好靚呀!! 再嘩!!! 重有28個腳印嗰part, 我心諗.... 哎! 咁都比佢哋諗得到!! 真係有心思呀!!! 重有唱主題曲嗰part, 嗰個地球, d人係咁向個地球到行, 正呀!!! 重有耍太極嗰part, d人圍個圓, 圓到呢!! 重有1000個小朋友嘅笑面嗰把傘呢!! 有意義到呢!!! 嘻嘻! 真係數唔曬呀!! 重之part part我都鍾意啦!!
哎!! 唔記得講, 升國旗時唱歌嗰個小妹妹好靚女呀!! 雖然知佢係咪咀, 但係都要讚一讚!! 睇到咁精彩嘅表演, 升國旗時我真係好感動呀! 亦好以身為一個中國人為傲!!! 加油呀!! 中國隊!!!
子華又有show啦!! 真係好想睇呀!!! 不過哥哥話係舞台劇, 冇興睇喎!!! 吓!! 咁未要我自己比錢睇囉!! 哈哈!!! 不過我都一定要睇! 唔知老公睇唔睇呢!! 我同Heidi就睇硬o家啦!!! 嘻嘻!! 之不過冇人請, 睇280算啦!!!
聽日終於都公開售票啦!! 不過我今晚番大陸揼骨, 都唔知幾點先番落嚟, 聽日實訓死咗啦!! 唔知買唔買到5號飛呢!! 事關嗰日係子華生日呀, 實好早比人買曬啦!! 所以, 我一定會吹谷Heidi去完成呢個咁艱鉅嘅任務嘅! 哈哈哈!!
聽講呢套話劇攞過最佳喜劇, 唔知黃子華做又做成點呢?! 不過其實佢做劇, 我都唔係話認真好buy, 都係棟篤笑好d!! 邊個都唔夠佢做得好, 重要成日抄佢Q添!! 咋到爆呀! 子華就唔同呢! 好笑得嚟好深度!! 正正正!!!
http://www.hkticketing.com/Ticketek/
8月5日公開發售
舞台劇《男磨坊Art》曾榮獲美國百老匯東尼獎「最佳戲劇」(Tony Awards – Best Drama)、美國紐約戲劇評論大獎「最佳戲劇」(New York Drama Critics Circle Awards – Best Drama) 、英國奧利花戲劇獎「最佳喜劇」(Olivier Awards – Best Comedy)和法國莫里哀戲劇獎「最佳劇本」(Moldier Award – Best Play) 等國際大獎認同。由棟篤笑殿堂大師黃子華主演，伙拍首爾劇壇泰斗鄧偉傑、喜劇老祖Philippe Gaulier傳人陳淑儀，配合香港演藝學院歌劇院五星級環境。這國際品牌舞台劇絕對不容錯過。
故事是講述三個情同手足的男性好友，因為其中一人用高價買了一幅現代派油畫後而引發的連串爭議開始，三個人的友情更因為價值觀、對藝術的認知與理解的不同而飽受重大的考驗。
香港演藝史上至尊天價舞台喜劇。
上次講過做特賣嗰陣, 撈家有上過嚟! 可惜我又冇同佢影相! 點知... 尋晚臨收工, 佢單拖上咗嚟, 問話TVB嗰邊應該有人幫佢留多咗件皮褸! 吓! 冇人知喎! 正向我同佢傾緊時, Angie走出嚟問咩事! 咁我就幫佢打比阿新check啦! 阿新話可以問Simon, 咁我就叫佢等一等喇! 事關Simon去咗交收! 向呢個時侯, Angie就同佢傾起計上嚟喇! 話咩佢套新劇好好睇呀! 拍劇辛唔辛苦呀! 羅家良問ok喎! 呢套又比想像中順利好多! 我見佢哋咁吹得, 即刻搭嗲啦! 我問佢你未簽番無線呀, 哎! 佢又肯答喎, 話我同無線無約o家! 不過11月會番去拍多套劇! 我就同佢講... 係呀! 嘩! 你知唔知我餓咗你好耐啦! 跟住大家嘩哈哈!
Angie行開之後, 佢問我ee... 呢到都幾靜嗰喎! 我話係呀, 唔做特賣時都幾靜o家! 佢話咁你悶唔悶呀?! 我話ok啦! 跟住就佢有佢玩電話, 我有我向msn到勁叫Niki同Trisha嗱嗱聲出嚟幫我同佢影相啦!! 哈哈!! 但係到佢哋出得嚟, 佢已經過咗倉啦!! 我哋就一齊過倉影相, 佢嗰時試緊皮褸, 我就用手機同佢影, 影完佢係咁望, 我就比部手機佢睇吓啦! 我話嘩! 勁靘呀! 佢就話係勁靚呀, 件皮褸!! 哈哈!! 之後佢哋攞咗相機, 我更係唔放過再影一張啦!!
番番office, 我就叫Keith快d sent番張相比我啦! 點知比Teresa笑我春心動, 嘻嘻!! 成班向到勁笑我, Angie重話之前都特登行開, 製造獨處嘅機會比我哋! 哈哈!! 傻傻地!!!
番屋企同沙律講電話, 話比佢知笑到佢死, 佢話諗起嗰時, 我想同Ohji San影相個樣喎! 佢話一定係好似嗰時個樣咁衰! 嘻嘻!!! 其實平時嘅我, 又唔係真係咁瘋狂, 話鍾意同名星影相嘅, 有時見到都唔願望佢哋添! 費事佢哋懶得戚呀! 況且咁大個人啦, 都唔係好好意思, 不過可能就係上次冇影, 今次覺得機不可失呱!! 激動咗!! 嘻嘻!!!
要講姨媽巾, 真係不得不提我阿姨(沙律)!! 佢... 我真係未見過人比佢更鍾意買姨媽巾, 尤其每一次去旅行, 唔知點解佢都要買到pack箱番先安樂!! 個個去親日本, 又事必叫人幫佢買! 其實... 有冇真係咁好用, 又有冇用得咁快呀?! 真係得人驚呀!! 但係姑勿論佢有幾低能同幾瘋狂都好啦!! 佢經已稱得上係姨媽巾介嘅權威同表表者啦!!
既然係權威, 今次竟然讚呢個連惠康都有得買嘅牌子, 話佢又夠包身, 又唔漏, 又點又點, 我更係唔執輸, 嗱嗱聲去買包試吓啦!! 嘩!! 果然係冇介紹錯呀吓! 大家睇吓佢嗰條橡根設計, 簡直係配合曬我哋人類立體嘅剪裁, 而且長度長到~~ 大家睇吓... 好似條船咁, 差在冇腰間嗰兩塊貼貼咋! 唔係以為係尿片添呀!!
"漏嘢?!" 點漏呀!! 原全諗唔到邊個位重可以漏到嘢出嚟囉!! 哈哈!!!
經過上星期嘅辛勞同與病魔抗鬥之後, 今個星期終於冇再發燒同頭暈啦!! 不過有時鼻塞塞咁, 就搞到有d唔舒服囉!! 好彩我有個好老公, 佢帶我去買咗支噴鼻嘅嘢, 又真係幾棧鬼嗰喎! 一噴就即刻通番曬, 不過就話唔好成日噴囉!! 都好哎!!
至於咳呢... 又係唔斷尾囉!! 但係我已經唔想再食藥啦!! 食到個人好燥呀!! 個感覺就好似, 覺得入面好興咁, 口又乾, 又痾唔到, 唔知想點!! 但係又咳喎, 又唔敢食生冷嘢喎! 所以我話自己應該係外感內熱囉!! 唔知係未o家!! 真係想睇吓中醫, 但係又懶, 又唔知放工去邊到睇好!!
今日, 終於攞咗上次媽咪買比我嗰盒養陰丸出嚟食, 我記得上次我氣管敏感咳咗好耐, 一路都唔清, 媽咪就叫我食養陰丸, 唔知係真係有效定係點, 重之後未就好番啦!! 雖然我唔知e+係唔係應該食, 不過我諗好過再食埋d西藥啦! 希望真係幫到我啦!!
上個星期, 公司又搞Big Sale!! 唉!! 點解唉呢?? 事關我病咗囉! 其實Big Sale嘅前兩日我已經請咗病假, 又發燒又剩!! 跟住例牌更係野埋個氣管敏感出嚟啦!! 唉!! 一氣管敏感, 又唔知要咳幾耐啦!!
都未病好就要做Big Sale, 雖然Angie都好體貼咁比我坐門口做收錢, 唔洗好似其他同事咁企成日, 但係始終我都係做唔慣呢d工作, 加上病到死死吓, 每日番到屋企都直頭想死, 食完飯就連志雄都唔等, 就自己入番房訓, 真係覺得自己好可憐呀!!
可能因為病, 冇心情睇啦!! 今次Big Sale我都冇買好多嘢!! 得買咗一條連身裙, 一條絲巾同兩對襪, 反而志雄就上咗嚟兩日, 買咗3件褸, 其中一件皮褸, 我見琪琪都買咗比任達, 真係幾靚, 最重要係減到809蚊咋!! 去邊到搵呀!!!
另外, 羅家良同3哥都有上嚟, 原來佢哋兩個都幾高嗰喎! 不過因為冇乜人同撈家影相, 所以我都冇影啦!! 但係呢人一見到3哥呢!! 個個都發曬癲, 可能係因為e+做緊佢套劇呱!!
由於今次特賣做埋星期六, 所以為咗星期六要番工呢個問題, 大家都有dd怨言, 不過最终都補番日假, 咁就算啦!! 但係始終都攰o家!!! 話說星期六8點幾放工, 但係就約咗沙律佢哋9:30必發食飯!! 嘩! 成個半鐘, 志雄話同我行吓, 我話我真係支持唔住啦! 兩隻腳根本就行唔到, 所以我哋兩個就自己上咗必發坐!! 我真係咁大個女都未試過咁攰o家!!
食完飯, 我哋去咗做腳底按摩, 個條友又唔係好掂, 唉!! 算啦!! 好過冇啦!! 落到樓, 基本上已經行唔到, 即刻上的士番屋企!! 番到去, 除咗對鞋就灘咗向到啦!! 志雄拍我, 叫我去沖涼先! 但係我已經恰著咗啦! 我明知佢姿整, 又知佢好驚d按摩油, 但係真係起唔到身, 佢叫咗我幾次, 唔係唔想起, 真係起唔到呀!!
到最後, 唔知點解突然我語帶哀求咁同佢講, 最多我連襪都唔除哎! 我唔會整污濁你張床o家! 你比我訓啦!! 哈哈!! 諗起都覺得自己好慘呀!! 唔知當時佢有冇笑我呢?! 不過我已經理唔到咁多啦!! 又訓著咗啦!!!
訓到半夜, 我比自己一個動作整醒咗, 個動作有dd似打麻雀洗牌咁! 當我醒嘅時候, 見到志雄望住我, 嗰一刻唔知點解下意識就扮R痕!! 哈哈!! 可能覺得好魚呱!! 第二日我問番志雄, 我係未訓到手舞足動, 佢話我直頭好似打交咁!! 當我講我記得有嗰個動作時, 佢即刻話係呀, 你重扮R痕添!! 嘻嘻!!! 原來比人識穿咗!!!
上個禮拜, 諗住整呢個款嘅指甲, 點知又唔記得咗有顏料, 咁就唯有向屋企求其搵幾隻撞到pak pak聲嘅指甲油玩啦! 點知整完, 覺得好似五六十年代咁囉!!
條氣唔順, 所以今個星期用顏料整多次, 睇吓靚幾多!! 重要完全較岩我最初想嗰幾隻色, 真係靚到爆!! 嘻嘻!!!
上次未話向Facebook搵到d小學同學嘅, 真係有人覆我囉! 佢哋重認得我呀~~ 重唔止一個添!! 真係好開心呀!
記得以前重住向村, 撞口撞面都未必會打招呼, 但係可能係e+人又大咗, 又已經唔向村住啦!! 所以好似所有嘢都變得反而珍惜咗! 華富村就代表我嘅童年, 好似有d感觸咁! 嘻嘻!!!
見番佢哋就諗起好多小學時代嘅嘢! 諗起都覺得自己幾失禮! 記得有一次...尹sir都頂我唔順, 話說5年班嗰陣, 有一次上體育堂, 我帶住個波跑, 踩波車再踩波車再踩波車, 都唔敢出聲, 結果比人發現時, 我已經成腳都係血啦! 入到保健室, 尹sir同我洗傷口, 佢話"阿女, 你幾時先識諗呀! 都咁大個人啦! 你搞到咁先嚟洗傷口, 唉! 都唔知點講你呀!"
嘻嘻!! 諗番轉頭, 我好似真係冇乜點大過, 事關我到e+未又係成日都仆街! 哈哈!!
尋日, 原先諗坐向屋企整吓指甲, 夜晚志雄又話要同公司食飯, 點知突然收到阿智嘅電話, 問我去唔去Bessie到! 做咩冇啦啦要去Bessie到呀! 原來佢已經生咗啦~~ 係個女!! 好哎~~ 反正我都好耐冇見過佢, 今次重有bb睇添! 更係好啦!!
阿智話上嚟接我, 幾經波折佢個路痴先到, 終於搞到成四五點先入到去! 嘻嘻! 不過又講番轉頭, 人哋可以唔車我嘅啫!
上到去bb真係幾得意, 佢哋話似男仔喎! 又話似阿基! 但係我就覺得似就係似阿基, 不過都好女仔樣喎! 嘩! 佢細粒到呢! 嘻嘻! 轉過頭再睇吓Bessie, 哈哈! 大隻到呢! 佢話自己已經輕番30磅, 嘩!! 真係難想像佢生之前係點樣囉!! 呵呵!! 咁我就向到祝bb快高長大, 身體健康~~ Bessie呢就快d修身, 做個靚靚媽咪!!
夜晚同老公公司食飯, 冇啦啦都唔知食乜鬼飯! 大家又冇乜話題, 就係睇住d小朋友周圍走! d嘢食又冇乜特別, 唔食又蝕! 結果都飽到好嘔, 哈哈! 食完拍吓羅由走! 咁早去邊好呢?? 星期六晚~~ 更係搵沙律佢哋飲吓嘢啦!!!
呢排少咗寫blog, 好多fd都向msn到問我, 呢排點呀咁!! 唉~~ 可以有咩點哎!! 未又係日日番工放工~~ 睇劇msn整指甲同上facebook打麻雀囉!! 不過都多謝大家關心!!
話時話有兩個新作都未發表添呀! 重有岩岩睇完last friend, 日本都係岩岩做完, 聽講重打底咗木村添!! 好好睇又唔講得, 不過都ok啦! 尤其係野田妹真係做得幾好~~ 幾Man!! 另外重追緊3套劇, 搞到我日日都鬼咁忙!! 哈哈!!
呢兩日有d傷風, 食咗藥又散, 所以今日番工都唔食啦! 又係d鼻水係咁倒流, 搞到鼻興興咁囉! 不過我都未睇醫生呀~~ 個人鬼死咁懶!! 放咗工寧願快d番去訓囉!!
科 學 家 ： 性 格 影 響 健 康
科 學 界 知 道 性 格 與 早 年 經 歷 有 關 ， 亦 與 基 因 有 關 ， 像 神 經 質 是 與 血 清 素 基 因 有 聯 繫 ， 但 對 於 性 格 如 何 引 起 疾 病 ， 未 有 一 致 的 說 法 。 人 們 卻 有 必 要 留 意 ， 自 己 的 性 格 可 能 有 甚 麼 健 康 問 題 。 英 國 《 每 日 郵 報 》 | |||||||||||||
| 樂 觀 ─ ─ 平 均 壽 命 長 樂 觀 的 人 有 福 了 ， 研 究 指 他 們 的 平 均 壽 命 比 悲 觀 的 人 長 7.5 年 ， 因 疾 病 早 死 的 風 險 低 55% ， 出 現 殘 疾 和 長 期 痛 症 的 機 率 也 較 低 。 一 個 說 法 是 一 個 人 樂 觀 ， 生 存 意 志 也 較 強 ， 亦 有 科 學 家 認 為 樂 觀 的 人 社 交 較 好 ， 能 減 低 體 內 有 害 的 壓 力 荷 爾 蒙 水 平 。 美 國 卡 內 基 梅 隆 大 學 研 究 員 認 為 ， 樂 觀 能 強 化 免 疫 系 統 ， 減 低 心 理 壓 力 的 壞 影 響 。 |
| 衝 動 ─ ─ 胃 潰 瘍 高 危 你 或 者 以 為 衝 動 的 人 易 受 傷 ， 他 們 最 大 的 健 康 隱 患 卻 是 胃 潰 瘍 。 芬 蘭 職 業 健 康 研 究 所 在 4,000 多 人 的 研 究 中 ， 發 現 性 格 衝 動 的 人 患 胃 潰 瘍 的 風 險 ， 是 其 他 人 的 2.4 倍 。 研 究 員 猜 測 ， 這 是 因 為 衝 動 的 人 面 對 壓 力 時 ， 製 造 胃 酸 水 平 比 平 常 高 ， 引 致 胃 潰 瘍 。 此 外 ， 英 國 威 爾 斯 大 學 的 研 究 亦 發 現 ， 衝 動 的 人 對 飲 食 的 自 制 力 較 低 。 |
| 害 羞 ─ ─ 多 病 毒 感 染 加 州 大 學 的 研 究 發 現 ， 性 格 害 羞 的 人 較 易 受 病 毒 感 染 。 科 學 家 發 現 ， 個 性 擅 社 交 的 一 群 動 物 ， 體 內 活 躍 的 淋 巴 結 數 目 比 害 羞 的 一 群 多 ， 而 淋 巴 結 是 免 疫 系 統 一 部 份 ， 有 助 殺 死 入 侵 的 細 菌 病 毒 。 另 有 研 究 指 害 羞 的 愛 滋 病 感 染 者 對 病 毒 抵 抗 力 較 弱 ， 研 究 員 指 害 羞 的 人 的 神 經 系 統 較 易 出 現 受 壓 反 應 ， 所 以 減 少 社 交 。 |
| 易 怒 ─ ─ 動 脈 易 硬 化 很 多 研 究 指 好 鬥 易 怒 的 人 易 出 健 康 問 題 ， 像 動 脈 粥 樣 硬 化 、 嚴 重 抑 鬱 症 ， 受 傷 復 元 時 間 也 較 長 ， 美 國 俄 亥 俄 州 立 大 學 研 究 發 現 ， 一 般 人 手 臂 有 小 傷 口 ， 70% 四 日 內 可 復 元 ， 易 怒 的 人 卻 只 有 30% 。 另 有 研 究 指 性 格 好 鬥 的 人 易 患 慢 性 炎 症 ， 而 這 又 會 導 致 心 臟 病 等 其 他 疾 病 。 一 個 理 論 是 這 些 人 的 免 疫 系 統 分 泌 較 多 發 炎 蛋 白 質 ， 另 一 猜 測 是 他 們 對 壓 力 反 應 太 強 烈 ， 令 心 血 管 系 統 損 耗 快 。 |
| 焦 慮 ─ ─ 小 心 高 血 壓 有 焦 慮 症 的 人 ， 患 高 血 壓 的 機 率 高 三 倍 。 美 國 北 亞 利 桑 那 大 學 的 研 究 發 現 ， 這 可 能 是 因 為 壓 力 荷 爾 蒙 高 導 致 。 有 畏 高 症 之 類 恐 懼 症 的 婦 女 患 心 臟 病 、 高 血 壓 和 有 高 膽 固 醇 問 題 的 風 險 都 較 高 。 恐 懼 症 患 者 吸 煙 率 較 高 等 行 為 差 異 ， 局 部 解 釋 了 這 現 象 ， 但 未 能 作 出 全 面 解 釋 。 另 有 研 究 發 現 ， 心 臟 病 人 接 受 治 療 十 年 內 死 亡 率 是 7% ， 緊 張 的 人 死 亡 率 卻 高 達 27% 。 |
| 壓 抑 憂 傷 ─ ─ 易 患 癌 所 謂 「 D 型 性 格 」 的 人 ， 憂 傷 卻 故 意 壓 抑 感 受 ， 美 國 哈 佛 大 學 研 究 指 這 種 人 患 癌 症 和 心 臟 病 的 風 險 較 高 ， 而 當 他 們 患 上 冠 心 病 ， 死 亡 率 也 較 高 。 研 究 員 指 「 D 型 性 格 人 」 對 壓 力 荷 爾 蒙 的 調 節 能 力 較 差 ， 令 他 們 易 心 跳 快 、 升 高 血 壓 和 收 緊 血 管 ， 對 心 血 管 系 統 不 好 ， 他 們 的 免 疫 系 統 也 比 較 活 躍 ， 易 生 發 炎 而 損 害 血 管 。 |
| 外 向 ─ ─ 易 肥 胖 外 向 的 人 就 如 樂 觀 的 人 一 樣 ， 較 少 患 心 臟 病 ， 意 大 利 米 蘭 大 學 研 究 更 發 現 ， 最 外 向 的 人 的 患 病 機 率 低 15% 。 外 向 的 人 復 元 速 度 也 較 快 ， 也 不 那 麼 容 易 受 感 染 。 研 究 員 認 為 他 們 處 理 壓 力 較 好 ， 少 些 壓 力 荷 爾 蒙 ， 他 們 也 較 少 諱 疾 忌 醫 。 但 日 本 山 形 大 學 發 現 他 們 比 神 經 質 的 人 較 易 肥 胖 ， 可 能 與 基 因 和 社 交 多 、 吃 得 多 有 關 。 |
| 開 朗 ─ ─ 易 早 逝 性 格 開 朗 的 人 較 易 早 死 ， 令 很 多 人 大 感 意 外 。 美 國 加 州 大 學 的 研 究 發 現 ， 小 時 被 家 長 和 老 師 評 為 開 朗 和 有 幽 默 感 的 人 ， 長 大 後 比 不 開 朗 的 人 早 死 ， 「 跟 人 們 預 期 剛 好 相 反 ， 開 朗 和 幽 默 感 是 跟 壽 命 成 反 比 」 。 研 究 員 認 為 ， 開 朗 的 人 可 能 傾 向 低 估 危 險 ， 當 遇 上 逆 境 時 較 難 適 應 ， 令 他 們 較 早 死 。 |
| 勤 懇 盡 責 ─ ─ 死 亡 率 低 在 美 國 加 州 大 學 研 究 中 ， 勤 懇 盡 責 是 與 長 壽 最 有 關 係 的 性 格 特 徵 ， 死 亡 率 比 性 格 相 反 的 人 低 30% 。 英 國 諾 丁 漢 大 學 的 分 析 也 發 現 ， 勤 懇 盡 責 令 人 長 命 ， 相 關 程 度 之 高 就 如 維 持 健 康 的 血 壓 和 膽 固 醇 水 平 那 樣 。 研 究 員 指 這 種 人 行 事 謹 慎 、 少 染 上 吸 煙 、 酗 酒 和 吸 毒 等 壞 習 慣 ， 所 以 較 長 命 。 |
| 神 經 質 ─ ─ 慎 防 哮 喘 性 格 神 經 質 的 人 不 只 易 有 神 經 病 ， 加 州 大 學 發 現 他 們 患 哮 喘 、 頭 痛 、 胃 潰 瘍 和 心 臟 病 的 機 率 也 較 高 。 研 究 員 認 為 神 經 質 的 人 面 對 困 難 時 通 常 都 自 責 和 發 脾 氣 ， 沒 有 尋 求 幫 助 ， 所 以 受 壓 程 度 較 高 ， 影 響 免 疫 系 統 ， 令 他 們 較 易 病 。 |
悲 觀 ─ ─ 患 柏 金 遜 機 率 高 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 開朗都話會早死, 咁點算呀! 即係點都死!! |
