希望番薯早日康復啦!

前兩日聽沙律講番薯又入咗醫院, 佢重要話番薯d Cancer已經由淋巴去到個肝, e+重有d迷糊, 亂咁講嘢, 又唔係好認得人, 又話要番工又話有客等佢! 唉~~聽到我個心有d唔舒服! 尋日, 沙律打比我話佢哋成班去探佢, 我冇乜比反應佢, 因為其實我真係幾唔鍾意去醫院o家! 硬係覺得唔老黎, 跟住沙律就打比志雄, 志雄話唔去得喎! 我哋兩個都係今個月生日, 唔去得探病喎! 但係推咗佢之後又覺得好矛盾!

今日, 沙律又再打比我, 但係結果我都冇應承佢, 到到下午豬豬同我msn, 話唔知番薯係未真係好大件事呢? 沙律12點幾去探佢, 話好快會番, 但係3點幾啦, 都未見人! 我開始真係有d擔心, 之後志雄今日去搵Matthew剪頭髮, 接我放工時話, 聽Matthew講佢今日下午好辛苦, 痛到係咁叫!

我就開始諗喇! 點呢?? 其實生日唔好去紅白事啫! 又唔係正日, 應該唔怕呱! 但係其實我係驚見到佢辛苦囉! 見到佢好殘好病個樣, 萬一係萬一真係出咗d咩事~~~ 唉! 我驚我會諗起佢呢個樣呀! 佢向我心目中係一個咁開朗, 就算面對咁大個病都係積極對抗, 我點忍心見到佢咁哎!

但係結果志雄鼓勵我, 佢話如果係去, 佢得今日放假陪到我, 我問佢怕唔怕, 我意思係話生日嗰個月去醫院, 佢話佢唔怕, 其實我知佢係知我有心, 想陪我去!! 一路上我都好緊張, 佢睇得出, 係咁攬住我, 叫我唔洗驚, 就當番薯只係普通病啦! 我哋去支持吓個朋友啦! 志雄真係好好! 我真係冇選錯老公! 佢連我心底嘅感受佢都睇得通!!!

終於上到去啦! 又唔係哎! 佢冇乜走樣, 重幾靚仔, 不過個身就變得好廋好廋, 個肚重有d脹囉! 佢見到我哋, 第一時間就捉住志雄問佢係未飲咗酒, 志雄話冇呀! 佢就問志雄點解塊面咁紅, 志雄話因為行咗好耐過嚟嘛! 我一聽到就放心曬啦! 佢認得志雄囉, 連個咁少見面嘅佢都認得! 跟住我哋同佢傾咗陣, 佢都答得頭頭是道哎! 都唔似沙律講得咁嚴重, 我一路拖住佢隻手, 又拍吓佢咁, 突然見到.... 我同佢講~~ 哎! 原來你隻手都幾靚個喎! 佢笑咗一笑, 望吓自己隻手話, 係呀! 我隻手都OK o家! 見到佢笑我好開心, 就話喇~~ 哎! 藝術家即係藝術家呀吓! 佢又笑咗一笑! 再坐咗一陣我哋就走啦! 睇佢都好攰啦! 88嘅時候, 佢重係咁望住我哋, 重揮咗成3次手添呀!!!

一出嚟, 我真係有d忍唔住, 冇喊~~ 不過個心好難受囉! 落到街, 開番個電話, 諗住打比沙律, 但係都唔知講乜, 結果都冇打到!!! 志雄又一路叫我唔好諗啦! 想氹番我開心, 但係就係唔諗唔諗又諗囉! 直到落番旺角, 同志雄去買咗隻炸雞比食, 個人先開心番! 平時如果番緊屋企食飯, 志雄一定唔會比我買呢隻雞比啫! 今日佢真係好好呀!!

番到屋企, 沙律打嚟, 報告完番薯嘅情況, 佢都安樂d! 咁佢就同我講喇~~~ 佢想我去係因為番薯平時咁鍚我哋, 尤其覺得我同佢都幾投緣, 佢話都留意到番薯, 平時望我嘅眼神都好唔同, 覺得佢真係好鍚我, 所以亦特別想我去睇吓佢囉! 其實我都明嘅, 不過個心就~~~ 真係好難過囉!!!

希望佢可以大步欖過啦!!! 

好似自己搞多次結婚咁呀!!

尋日係我同志雄嘅舊曆生日, 我哋係同一日o家! 嘻嘻!! 但係因為星期六媽咪唔得閒, 所以今年改咗星期五晚食水餃, 我同Koby重順便約埋星期六去睇場添!

其實陪得佢睇場都預咗一定要行好多間o家啦! 因為我嗰時都有豬豬陪我, 係咁睇係咁睇, 越睇個人就越唔開心, 越失望越失落, 所以我有曬經驗o家啦! 哈哈! 因為我嗰時擺酒店, 先知原來好多嘢都唔包o家! 樣樣都係錢都唔特止, 重要勞心勞力嘛! 幾煩呀! 所以我強烈建議佢哋都係擺番酒樓好, 又多嘢送!!

我哋行咗成日, 由太子一路去到銅鑼灣, 有d酒樓就太貴, 有d要擺嘅圍數超過曬預期, 有d太浮誇頂唔順, 有d太雞又接受唔到...哈哈! 總之就唔知點算啦! 直到我哋去到銅鑼灣Times Square, 呢到呢d都似番d樣, 不過玉桃軒呢, 就話要20圍先可以包場, 雖然佢哋都估自己有20圍, 但係e+都未確實o家嘛, 如果包唔到未好肉酸囉! 但係嗰到樓底都ok, 可以係考慮之列啦! 之後我哋就落咗兩層, 去到聘珍樓, 嘩! 啱啱今日有人擺酒呀! 好靚好High呀! 不過就有d暗, 但係就係因為暗, 個氣氛好好, 好西式, 重有鋼琴伴奏, d碟有花o家! 好ka勢呀!! 我哋兩個即刻勁鍾意, 嘻嘻! 因為個鋼琴真係加好多分呀!

之後我哋就各自歸家啦! 但係回程時我又諗, ee... 我哋之前先話鍾意d光猛d嘅, e+呢間點解黑到咁呢! 哈哈! 到到夜晚11點幾電話響, 我都估到係個傻婆打嚟o家啦! 原來佢係想約佢媽咪同我媽咪, 一齊去睇吓呢兩個埸, 叫我一齊去! OK哎! 反正我都要入華貴食壽麵o家啦! 睇完未一齊番屋企囉! 點知今次去到玉桃軒, 覺得好似好近lift口喎! d人行嚟行去, 個場直筆甩比人望曬個喎, 會唔會唔係咁好呀, 咁個部長就話叫我哋4點零再上去, 因為可以睇吓佈置咗之後個樣, 咁我哋就落去睇聘珍樓先囉! 唔...今次睇又好似冇咁暗咁, 但係都係暗, 兩位家長一睇已經話唔鍾意喇! 重要佢個新娘房冇厠所, 要走去同d賓客用埋同一個喎, 邊得呀! 唔好玩啦! 但係... 咁點呢~~~

向呢個時間又未到4:00, 我哋就諗住去第2到睇吓喇, 去咗利舞台睇第1間, 好似係叫騏驎閣咁上下啦! 個新娘房又係冇厠所! 又係要去到出面有個好似殘厠嗰d厠所, 話比新娘尊用喎, 都係咁話啫! 唔得啦! 再落多兩層, ee...玉桃苑喎!! 都睇吓啦! 但係都估佢唔得o家啦! 因為成棟大廈嘅厠所都向嗰個位o家啦! 點知有驚喜喎! 佢新娘房有個盪門櫃比你掛衫, 但係個盪門一盪埋個衣櫃, 竟然係一個厠所囉! 哈哈! 佢哋話特登設計嗰喎! 哈哈! 果然醒目呀吓! 睇吓個場先, 樓底唔算高~但係都過得去啦! 有兩條柱~但都唔係啫住好多人啫, 可以接受! 價錢~~點解會平過玉桃軒o家! 重唔洗比嗰每圍100蚊嘅椅套錢, 又唔洗比嗰40蚊咸酸菜錢, 佢送比你飲唔曬嘅酒重可以攞走, 最重要嘅係佢一層一間酒樓, 唔洗比其他人望望吓夠曬獨立嘛! 嘩! d佈置又幾靚喎! 哼!!!我計過呀! 剩係送嘅嘢比起我要自己比錢嘅, 省咗成萬幾蚊呀! 嗚嗚嗚~~~ 你知唔知萬幾蚊比我去旅行有幾開心呀!!! 結果, 佢哋即刻扑咗鎚, 見到Koby直頭係勁開心, 因為終於搞掂咗最難搞嘅一樣嘢! 重確定埋個日子添!! 呵呵!!

夜晚向姥爺屋企食完壽麵之後, 我哋重上番屋企, 因為媽咪買咗個蛋糕仔同我興祝呀! 佢哋重唱曬生日歌添! 哈哈! 好開心呀!

 

老公生日

今日係老公生日, 生日快樂呀!

因為老公聽日請唔到假, 所以大家就改咗尋日同佢興祝, 等佢今日可以訓餐飽, 哈哈! 上次講過啦, 我哋真係向正東幫佢擺咗兩圍, 哈哈! 無端端好似擺大壽咁囉! 我重去Cova訂埋蛋糕添! 點知......

我拎完蛋糕過正東, 就約咗豬豬去尖咀行街, 行行吓就搵咗間be得嘅cafe等沙律喇, 跟住Fanny同阿珊又話嚟喎! 傾傾傾~~傾傾吓...Fanny突然話唔好意思, 佢要走先~~因為偉雄佢腸胃炎話要入醫院喎! 都冇辦法啦! 身體緊要嘛! 跟住我哋就起行去正東喇...點知去到見到阿V, 嘩! 佢塊而係青色o家! 平時佢已經白o家啦! 今次係青囉! 我都未見過人塊面可以青到咁! 真係好誇張! 坐咗冇耐, 都未開席佢就同Tina走咗啦! 嘩! 好邪呀!

到開席喇, 羅倫嗰日未訂住條6斤幾嘅魚嘅, 點知好多根囉! 花枝又話冇味, 象拔蚌又話聲, 牛肉又話唔係鮮牛.... 但係其實for我, 我又唔覺得咁差啫! d帶子有驚喜哎, 飽魚又鮮, 象拔蚌我食一d都唔聲, 牛肉雖然唔係鮮牛啫, 但係人哋已經比最靚嘅西冷啦! 重想點啫! 但係佢哋就依依哦哦囉! 到到散席時, 阿Dick重係咁話羅倫亂點嘢! 佢話平時唔緊要哎嘛, 今日志雄生日點到d嘢咁, d花枝800幾蚊斤半, 一d味都冇... 搞到我都唔好意思埋, 其實生日都係想一班人圍埋食餐飯高興吓啫! 唔洗咁嚴重嘅! 不過正東下次就一定冇份囉!

由於我岩岩先番新工, 所以今年老公生日我都請唔到假, 但係都好嘅~~佢尋晚飲咗咁多, 今日訓吓都好, 到我放工佢就嚟接我, 我哋行咗一陣尖沙咀就去食飯喇! 今年唔洗點諗去邊到食, 因為大家都又想食拉麵啦! 哈哈! 食完之後, 我哋又出番旺角行, 不過由於今個星期d節目都冇停過, 我真係好攰好攰呀! 所以10:30我哋就番屋企啦! 搭車時, 我重訓著埋添, 我問老公覺唔覺得今年生日悶咗d呀! 佢話都ok喎! 最衰都係白痴仔啦! 個個禮拜都放星期五, 如果唔係...我哋未可以今日先興祝囉! 哼! 正仆街仔嚟o家!

回復平靜

經過咗上個禮拜嗰四日嘅開倉之後, 公司依然係好亂, 今日番嚟我見Simon, Eva...又開始要拾番好d地方, 尤其係個餐廳位呀! 點解?? 哈哈! 因為嗰到係我哋食飯嘅地方嘛! 除咗呢d之外, 我又開始番我每日msn, update blog同上網嘅工作生涯喇! 嘻嘻!

打3號風球的日子

今日本來約咗Koby去睇埸o家! 點知....一起身見到落曬大雨囉! 計劃除消後, 我就一心諗住灘吓睇電視, 然後整個晏覺訓吓! 點知....沙律打嚟話有今晚劉美君飛喎! 咁更係要睇啦! 最鍾意佢嗰兩首J~~同放低~~o家喇! 哈哈! 真開心呀! 跟住我就打比志雄話佢知我今晚去睇演場會啦, 哎! 佢即刻話一陣會掛8號風球喎! 會唔會改期o家! 吓! 唔係吓嘛! 跟住我同沙律就係咁留番天氣報告啦! 哦! 冇事!

突然諗起, ee... Hedy佢哋約咗今日去Gary屋企打牌喎! 打比佢哋先話重向黃大仙買緊嘢食, 咁我就即刻裝身, 叫佢哋架的士向留下接埋我啦! 哦! 原來Gary就住向咁近我屋企嘅地方, 好似係可以唔洗淋到雨就去到添o家! 上到去, 佢竟問我哋飲唔飲湯囉! 哈哈! 我更係話好啦! 不過同我預期一樣....冇味嘅! 哈哈! 之後佢知我未食飯, 重特登拎d燒鵝呀, 乳甲...出嚟比我哋食, 招呼幾周到呀! 哈哈! 之後佢哋就開始打麻雀, 我睇咗一陣, 都唔知Gary想點, 亂咁嚟! 係又扣唔係又扣! 傻傻哋o家! 睇到差唔多7:00, 我就走啦!

搭的士接埋沙律去紅館搵Mathew攞飛, 入到去沙律話想食雪糕喎! 挑起咗我條引, 好耐都冇試過睇演唱會食雪糕啦! 我哋不停搵雪糕佬, 哈哈! 又比我哋搵到喎! 嘩! 15蚊支甜筒, 又真係幾貴喎! 沙律即刻話唔食喇, 但係我都係忍唔住, 買咗支朱古力味嘅! 嘻嘻! 開埸啦! 頭兩首歌我都識識哋唱, 不過始終係太舊嘅歌啦, 唔記得都正常哎! 點知...跟住落嚟嘅歌除咗一雙破舊皮鞋嗰首之外, 我一首都唔識囉! 終於等到林海峰出嚟啦! 嘩! 我哋叫到癲咗! 佢哋亦好大膽咁你坐我, 我摸你咁! 點知....一唱完兩首歌, 嘢都冇講過一句, 林海峰就向中間個洞跌番落去啦! 吓! 有冇搞錯呀! 初時我都有期望過佢會上番嚟! 但係又兩首歌後, 都係冇, 我就同沙律講, 走啦! 實在係太失望啦! 我都未試過睇演唱會, 睇睇吓我會走嗰囉! 唉! 垃圾!

出咗去之後, 停咗雨啦! 我哋行行吓, 見到個男仔, 佢走埋嚟問我哋, 係未睇演唱會, 係未走啦! 咁可唔可以比咗兩張飛佢呀, 佢話佢好鍾意Prudence, 本來買咗聽日飛..... 咁我就同沙律講比佢啦! 咁我哋就走喇! 沙律問我, 你估點解嗰兩個人會嚟等呢? 乜有人真係會特登走嚟睇吓有冇人走o家咩? 我笑吓! 跟住沙律就話喇~ 冇理由你諗唔到嗰喎! 你平時好多理論嗰喎! 我就答佢...我諗...嗰個人一定係真係好鍾意劉美君,如果唔係佢冇理由知劉美君叫Prudence, 個名咁難記, 好少人知! 我估佢更係諗住嚟等散場, 等劉美君走嗰陣同佢影相之類, 如果唔係點會又冇飛, 又3個風球走過嚟哎! 唉! 一路上, 我哋係咁係咁彈! 話如果有d咩朋友好黑人憎, 就要介紹佢睇呢個演唱會, 重要話比佢聽, 最後嗰part係最精彩o家! 哈哈!

我同沙律去食咗d嘢先落正東搵佢哋, 點知去到佢哋竟然食緊海鮮篇囉! 又講到好正好正咁, 跟住重一人叫咗隻鮑魚, 志雄話真係食到好飽, 比咗半隻我食, 嘩! 又真係幾滑喎! 28蚊隻, 抵到爛啦! 咁我就同佢哋講不如志雄生日向到搞啦! 如果BBQ Bar, 男300女250任飲, 第二日又要番工, 邊個得閒任飲哎! 如果食雞翼食咁貴, 不如食正東好過啦! 咁佢哋都認同, 羅輪重即刻走去話訂咗條6斤幾嘅魚添, 又話到時要擺兩圍又剩! 哈哈! 阿泉又話幫我哋整d壽包同桂花糕...... 聽聽吓, 我哋幾條女都費事同佢哋癲喇! 我就同沙律& Emily上樓睇咕咕喇!

 

原來攰都可以好過癮!!

大家唔好以為前兩日我向公司又有名星睇又剩, 好似好過癮!! 因為嗰兩日只係for staff同熟客買嘅, 所以人唔會好多, 兩日都係大約7-80人啫! 點知尋日開始就街客都上得嚟! 又登曬廣告咁! 嘩! 尋日嚟咗成558人呀! 今日都有4百幾囉!

本來我個位都冇咩好做o家啦, 就好似d電影, 有個人企向馬路中心, 跟住四圍d人快鏡咁行, 覺得自己好似多餘咁! 咁尋日Rita就話, 不如你攞個牌, 去問吓d比緊錢嘅客, 叫佢哋留番d資料, 下次有優惠可以通知番佢哋, 咁我未好似歡樂小姐咁揸住塊板去問人囉! d同事就笑我話, 唔做呀! 唔做問卷調查呀! 我就又追住佢哋玩話, 小姐唔會阻你好耐o家咋咁囉! 哈哈! 都幾好笑! 不過就企到好攰囉!

今日, 佢哋就提議, 哎! 不如Peggy你都著件衫出嚟做人肉公仔啦! 因為佢哋幾個Sales都係咁, 而d客見到又真係會因為咁而買嗰喎! 可能係因為d衫擺向到, 又唔比試, d客都唔知著咗會係咩效果呱! 就係咁, 我就真係著住一套紅色嘅碎花裙, 套番自己條牛仔褲, ee... 原來又真係靚到就咁擺向到喎! 結果全日都好多人讚我, 又讚我著得好睇, 又問我件衫放向邊, 搞到我好似做咗Sales咁, 企咗成日招呼d客, 攰到隻野咁, 大家知啦, 我癱o家嘛, 坐已經好難為我啦! 重講要企, 不過都幾得意嘅!

到收工已經係9:00pm啦! Rita突然話, 好啦! 大家隨便選, 全部1折, 嘩! 我哋即刻全部癲曬囉! 嘻嘻! 原本我都留咗幾件, e+又發癲啦! 條紅色碎花裙本來我自己都唔係好鍾意, 不過今日咁多人讚到咁, 又冇理由唔買啫! 跟住重買咗兩件T, 一條裙同一對鞋添!

之後, 我約咗Hedy佢哋飲嘢! 佢二話不說就開咗我個袋, 攞曬d衫出嚟睇! 重揸住一條裙話好鍾意, 一定要買, 我都話叫佢上嚟睇o家啦! 佢又話驚控制唔到自己又剩, 跟住重話要我賣比佢! 小名又話鍾意對波鞋, 結果我未打番公司問, 重有冇貨叫佢哋幫我留起囉! 真係哎! 唉! 不過都冇乜心機玩, 事關我真係好攰呀!

 

公司開倉

今日公司開倉~好多人上嚟睇嘢! 其實今日只係第一日, 係比公司職員同一d相熟嘅人上嚟! 但係今朝我都見到有TVB嘅人上嚟選衫, 好似話係for事必關己同埋港姐o家喎! 之後就係黃敏德個老婆同個仔上嚟! 原來佢唔係好高o家咋! 連我都高過佢, 哈哈! 但係佢個人都幾nice嗰喎! 佢個仔重好搞笑添! d頭髮又天生捲呢, 飛飛吓! 勁搞嘢! 重笑9佢老母添! 哈哈! 跟住又見到熊岱琳上嚟睇衫, ee...佢真人原來又幾靚嗰喎! 平時見佢好似好怪咁, 估唔到都ok喎! 怪唔得城城嗒佢糖啦! 我哋重同佢合照咗添呀!

嘻嘻! 開倉喎! 我又點會執輸呀! 我選咗1件Patrizia Pepe, 1件Anna Rita N, 同埋1件Sinequanone嘅連身衫, 哈哈! 原價成千幾2千蚊o家! e+百零蚊就有交易, 真係抵到爛呀! 嘻嘻!

比人笑我偷鐵添!!

話說今日公司個經理Angie請食飯, 食完飯落樓嘅時侯, 我唔小心差咗隻右腳入坑渠窿到, 咁我就用隻左腳借力, 諗住抽番隻右腳出嚟啦! 點知......隻左腳都sip埋落坑渠囉! 咁由於我咁大力, 隻左腳差得太入啦! 到我想再抽佢出嚟嘅時候, 竟然連塊坑渠蓋都抽起埋囉! 跟住我dun咗兩dun, 差d跌! 好彩我d同事扶住我, 點知......塊蓋bong一聲跌番出嚟! 係真係bong一聲囉! 哈哈哈! 我即刻忍唔住, 仰天長笑囉! 就向皇室堡樓下大笑囉! 哈哈哈! 我d同事當然即刻就笑我啦! 佢哋一陣又話我偷鐵, 一陣又話岩岩羅傑成(我都唔識係邊過)經過呀! 岩啦! 賣我去南華喎! 話估唔到我咁好腳力喎! 笑死我啦!

番到公司, 我就將呢單嘢同Hedy佢哋講啦! 點知Leon聽到之後, 竟然向sms到周圍同人講囉! 重作曬故仔, 話我咩比差人見到又剩, 好無聊囉!

又有新嘢啦! 呵呵呵!!

尋晚囉! 諗住今日整指甲, 咁為咗爭取時間, 我尋晚就洗咗一邊指甲啦! 隻手指公重怪怪哋, 比我起埋添! 點知今日一d整指甲嘅mood都冇囉! 但係唔整...又邊到得呢!!!

睇吓自己d甲油, 呀!!! 試吓隻藍色先! 嘩! 隻藍色好靚呀! 就咁塗都咁靚, 咁求其貼d石都得啦! 所以我就加咗d閃粉, 同貼咗d石囉! 嘻嘻!

 

咁都冇事....好嘢!!!

尋晚, 沙律佢哋冇啦啦話食飯! 好! 反正豬豬都話上嚟我屋企訓, 咁我就諗住放工同豬豬出旺角行吓等佢收工啦! 但係後尾佢哋又話尾站銅鑼灣喎! 重要唔知幾點到, 我更係搵Hedy佢哋happy hour啦! 呵呵! 點知飲飲吓, 沙律佢哋又話英傑番咗嚟香港, 要出去飲酒喎! 吓! 唔係下化! 我已經差唔到嗰啦喎! 哈哈! 好彩! 後尾佢哋都話唔去喇! 如果唔係醉硬!

最後我同沙律, Matthew同埋豬豬去咗金雀食飯, 食完飯我同豬豬就番屋企喇! 志雄話叫我記得買啤酒番去喎! 點知慈云山中心兩間7仔都唔開喎! 唔係吓化~~7仔都有休息!!! 原來...係停電囉! 結果要去到老遠先買到! 沿路我同豬豬傾咗好多, 主要係我又唔想比到壓力佢之餘, 又想佢明白, 佢重咁年輕, 又有咁多人支持佢, 佢可以更好, 人唔會冇咗邊個唔得! 大個女啦! 要識得自私, 邊個鍚你都唔會夠自己咁鍚自己o家! 佢話明喎! 我都知佢真係明嘅, 我都信佢識諗, 但係我作為一個表姐, 一個錫佢, 關心佢嘅人, 我都要多口講句囉!

番到屋企, 我哋一齊沖涼, 嘩! 好耐都冇同過佢一齊沖涼啦! 同沙律就多d, 有d好close嘅感覺呀! 好似細個時咁! 沖完涼, 佢向到上網, 志雄話不如唔好上咁耐啦! 比佢鋪地訓, 但係我就話不如一齊訓啦! 張床夠大喎! 點知夜晚, 志雄訓得都幾狂野囉! 比佢訓咗成半張床, 搞到我哋鬼死咁逼! 哈哈!

今朝, 我11點幾就起咗身, 第一就係因為我要去bank啦! 第二就係因為豬豬約咗奧云, 話接佢收工, 跟住傾吓喎! 傾吓都好嘅, 話曬分開咗幾日, 大家都冷靜咗喇! 傾咩都好d啦! 送佢落樓嘅時候, 我同佢講如果有咩就打比我啦! 我今日唔會出街o家, 隨時stand by, 點知佢話唔好啦! 你約人啦! 你望都唔好望我打比你啦! 哈哈哈! 咁又係喎!

成個下午我都囉囉嘍咁, 唔知佢哋點呢! 同沙律兩個係咁幫佢哋計時, 點解重未打嚟呢? 唔知要傾到幾點呢? 好彩! 唔夠4點佢就send咗sms嚟話冇事喇! 咁都放心d!!

唉! 真係...唉!

前晚飲完酒, 尋日攰到仆街, 點知臨收工, 沙律打嚟話豬豬同奧云鬧交, 叫我放工上佢哋屋企, 唉! 都要o家啦! 自己表妹喎, 幾攰都要去啦!

點知上到去, 竟然冇人認門囉! 打極比豬豬又冇人聽, 擔心死人啦! 好彩後未佢都覆番我電話, 佢話佢同嘉儀出咗旺角飲嘢! 我話不如我過去搵佢啦! 佢又話唔好喎! 佢話唔想講嘢, 如果我去到, 佢反而重唔知點好! 跟住就有d想喊咁嘅聲, 唉! 都唔知信唔信佢好, 咁我就打比沙律啦! 沙律又話叫我等埋佢先，唉！都唔知點嘅！

等到沙律嚟，又話要等奧云番嚟喎！唉！呢ｄ咁嘅情況，佢重話要番學校點咗名先，嘩！呢ｄ咩男人嚟o家！飛咗佢啦！我同沙律諗盡辦法，結果打比阿Lo問嘉儀電話，終於證實到佢真係同豬豬一齊啦！出曬口術後，豬豬亦終於決定番嚟！

上到佢哋屋企，我同奧云傾咗好耐，開導吓佢啦！講吓人生道理啦！挑！其實咁廢嘅男人，同佢傾多句都多餘啦！跟住豬豬又同佢入放傾咗陣，最後豬豬都諗住走先，等大家分開幾日諗吓！唔緊要喎，番姥爺屋企囉！我哋幾時都咁歡迎佢嘅！

所以我尋晚雖然好攰，都去咗姥爺屋企訓，當陪吓佢囉！但係今日就變咗好疲囉！今晚一定早ｄ訓先得啦！

冇乜材料底下, 都ok啦!

今日邊到都冇去, 就向屋企整指甲, 望吓d甲油, 選擇又唔多, 又費事落街買, 所以就地取材整咗呢款, 大家又睇吓點...

清明節

尋日約咗媽咪、林林、沙律同豬豬一行5人去柴灣拜山, 一早豬豬打比我話約11點半向旺角等, 我話唔啦~我向黃大仙搭地鐵行北角嗰邊好快之嘛! 點知......

我足足等咗差唔多9個字, 都等唔到由慈云山落黃大仙嗰架駁腳van仔囉! 點知d人會上嚟慈云山拜山o家啫! 激死我啦! 結果都要我行落去, 早知就一早行啦! 浪費曬我d時間! 重搞到我遲到, 要佢哋等我添!

同往年一樣啦! 都係封路, 我哋要行上去, 上到姥姥個爸爸到, 係未應該叫太公呢! 嘻嘻! 拜完~~食d嘢! 再行上山頂, 然後一路行平路, 去到姥姥到, 拜拜! 再食嘢! 唔知係唔係年年都行一次, 今次上去又唔係好攰咋喎! 點知話口未完, 落山嗰陣就腳都震埋啦! 哈哈! 唔運動開就似唔運動開, 睇吓人哋豬豬, 今年先第一年咁樣同我哋嚟拜之嘛! 人哋哎都冇哎一聲囉!

落到山, 原先媽咪講好話今年拜完山, 同我哋去試吓做腳底按摩, 點知林林又話想去睇吓d結婚場地, 咁媽咪就陪佢哋去啦! 本來我都想去幫吓眼o家, 不過我真係唔得啦! 好攰呀! 結果我同沙律&豬去咗尖咀做腳! 嘩! 痛到呢! 平時按完腳會覺得舒服曬, 今次按完都唔係好夠皮, 哈哈!

按完之後, 我哋去咗沙律介紹嗰間沙拿美買bra bra, 佢話有隻bra bra佢帶完, 腋底嗰舊肉真係細咗喎! 嘩! 咁更係要試吓啦! 我重買咗兩個加件背心添! 又唔貴喎! 6百幾蚊落得樓! 嘻嘻! 我今日就開始試啦! 嘩! 原來都幾辛苦o家! 不過佢哋話初初係會辛苦嗰喎! 好! 又睇吓點!

第三日番工

今日我真係好開心好開心呀! 因為今日lunch諗住又落街同Hedy傾電話嘅時候, 突然有個同事叫Pauline嘅向lift口問我去邊到食飯, 我話冇呀! 諗住落街買嘢上嚟食之嘛! 佢就話咁不如一齊食啦! 我更係唔會say no啦! 話曬同d同事快d熟絡d都係一件好事哎! 最多臨番上公司之前偷偷地bee啫!

點知一落到街佢就問我bee唔bee o家! 我更係唔會否認啦! 哈哈! 求之不得添啦! 跟住佢就帶咗我去一個大排檔, 一齊bee住食飯喇! 初頭都驚冇乜嘢講, 點知...可能佢哋始終係sales呢! 真係幾吹得! 剩係講旅行經都講到停唔到囉! 哈哈! 佢重話比我聽, 原來公司隔離架貨lift門口係可以bee o家! 哈哈! 好嘢!

到到四點零鐘, 哼! 我點會放過哎! 就試試去貨lift門口先, 重特登打曬比Hedy, 諗住傾住bee! 點知...一入去就比我遇正另一個同事Niki, 佢又向到bee緊, 我拿拿聲cut咗Hedy線, 探吓風先! 佢話WorldTrade其實都嚴o家! 同埋toliet有人投訴過, 但係呢個位連食蕉見到都唔會噪, 重有個罐向到, 比佢哋放煙頭添! 唉! 好係好啦!

番番office msn話比Hedy聽, 哈哈! 羨慕死佢啦! 哈哈哈! 好事陸續好黎~~因為我每次去toliet都會叫阿姐Eva幫我聽電話, 咁佢就會坐出黎我個位, 幫我開吓門呀咁囉! 但係如果我去bee的話, 打我唔去得多, 一日一次4點幾, e+得閒就話啫! 如果忙嘅時候, 阻住人做嘢, 遲早一日唔係比人踢爆, 就係同人結怨啦! 所以我好直接咁問佢, 係未每次佢都要坐出嚟睇住個門口哎, 定還是我飛條線入去比佢都得呢? 佢話只不過係呢排得閒, 所以冇所謂坐出嚟啫! 其實我知佢向邊的話, 飛條線比佢就得, 如果搵唔到佢, 可以飛比另外一個叫Trisha嘅同事都得! 嘩! 真係一天都光曬囉! 第日去toliet或去bee都唔洗同人交代! 呵呵! 咁我都唔會過份嘅!

都重未夠高興, 再高興d都重有! 尋日未講話電腦冇喇叭嘅, 點知我今日臨放工, 唔小心踢到部腦, 發現原來佢個羅由插住個headphone o家! 實在係太好啦! 我即刻就試吓佢, 冇問題! 正! 哈哈!

收工就約咗Hedy同六師弟佢哋飲嘢! 真係棧! 番咗三日工又放三日假, 哈哈! 不過今晚唔夜番得, 因為聽朝一早重要去拜山! 唉! 早d訓啦!

第二日番工!

今日又番返黎坐啦! 今朝第一件事就係裝番個msn plus先, 你知啦...裝咗plus有sheet分, 唔洗9廿幾個窗一齊閃, 煩到嘔! 佢又有老闆鍵呢, 真係有人行埋嚟都唔洗驚!

今日lunch, 我落街買嘢食+bee bee, 買完麥當當番到公司就同Hedy講住電話食, ok啦! 都唔算好悶嘅!

今日去toliet明明聞到有煙味, 唔通有人向toliet bee, 我都唔好汁輸先, 幾啖都好哎! 哈哈!

終於都第一日番工啦!!

休息咗2個幾月, 今日終於番新工啦! 嘩! 朝早幾難起身呀! 之前諗住嗰d咩咩要較番生理時鐘, 根本一d用都冇!

番到公司, 介紹曬d同事先得嗰十幾個人, 第一日就認得曬啦! d ext. 又完全唔洗記, 因為得十幾人, 個電話駁線有曬人名, 一按就得喇! 跟住a/c個女仔叫Cecilia, 佢走出黎教我嘢, 第一就係聽電話啦! easy job~~第二就係要訂文具, 咁訂文具呢就要填表fax上headoffice申請啦! 都唔難! 第三就係每日要gen. 番尋日d attendance出黎fax番上headoffice, 再將每個員工d番工放工資料輸入一個excel file, 然後每個月sent番上headoffice一次, 我諗半個鐘乜都搞掂囉! 之後就都係d訂日常用品, 即係唔洗日日做嗰d呢! 然後就冇野做啦!

佢重同我講, 呢到可以msn, 你有冇msn呀? 比個id我add你哎! 嘩! 實在係太好啦! 老鳳msn囉! 哈哈! 岩曬我呀!

到到lunch, 冇人同我食, 事關佢哋大部份人都帶飯o家囉! 唔緊要, 我自己落街食, 重有得傾電話同bee bee添! 落到街~~都唔知食乜, Hedy又約咗同事食飯陪唔到我傾電話, 自己又唔敢亂咁行, 你知啦銅鑼灣好易乃嘢o家嘛! 咁我就落咗sogo底下, 買咗個燒墨魚丸, 一路同Bonnie傾電話一路食嘢囉!

食完lunch上番去, email又check曬, msn d人又剩係係咁問你番新工點呀! 有d無聊! 重要我個位隔離有個類似風水球嗰d嘢向到, 一路聽住d流水聲, 真係好吹眠囉! 好彩a/c個Cecilia同我msn傾計吓, 佢話佢都係岩岩結婚3個月, 去渡蜜月又係去北海道, 係咁吹係咁吹! 哈哈! 都幾開心, 第一日番工就同一個同事咁friend喇! 其他人我諗應該都ok相處到嘅! 話曬佢哋做時裝嘅, 作風都應該輕鬆d!

放工啦! d同事真係一夠鐘就走嗰囉! 見工時佢哋真係冇欺騙我! 話佢哋可以應承我準時收工, 但係我都一定要準時番工囉! 搭車番屋企嗰陣, 我同老公講電話, 即係咁囉~呢份工悠就悠喇! 但係覺得好似有d大材少用咁囉! 即係唔係話自己有咩咁叻, 但係以前你好比心機做完一個project或者report嗰重滿足感, 呢到唔會有囉! 日日番工就係坐向到上網囉! 咁我都明幾多人恨都恨唔到, 我自己都係諗住, 結完婚唔應該再克薄自己先搵扮悠d嘅工啫! e+又咁諗, 真係唔知想點呀! 跟住我老公就話, 如果有兩份工一樣人工, 但係一份做到死, 一份悠到死, 佢唔會選擇要咩成就感滿足感囉! 咁又係嘅!