萬勝節小南瓜

今年萬勝節... 冇同小春慶祝過... 亦冇同bubu影過相... 呢個媽媽真失敗...

不過... 好彩... 小春都有得向學校玩吓... 雖然... 都係著番上年嗰套南瓜衫... 但... 算啦... 話曬老師同學都未見過嘛... 可惜嘅係... 我又要番工... 小春話學校又冇同佢影相喎... 今年... 就真係得前幾日... 試衫張相啦... 不過... 搞笑嘅係... 咁都竟然攞到個最佳造型獎喎?! 爸爸笑話... 都唔知係未每個小朋友都有一張㗎... 哈哈~~

睇吓... 上年得意幾多... 哈哈~~

臨寫完blog... 小春竟然做咗樣嘢應吓節... 睇吓... 癲狗一隻...

發夢當係真~~

尋晚...唔知係我攰得滯... 定係點... 我訓先定小春訓先.... 我已經唔記得啦... 咁岩爸爸尋晚又去咗街... 好夜都未番... 我訓到3點... 發現唔見咗個囡... (因為小春成日都會爬出被外)... 搵吓我腳尾...(平時通常向嗰到)... 都冇喎... 我更係嚇一嚇... 大聲叫... "小春"... (當然冇人認我啦)... 即刻開盞床頭燈... 原來佢去咗爸爸腳尾... 我抱佢番埋枕頭到... 問佢做咩去咗嗰邊訓呀?? 佢竟然搭我... "我等爸爸呀"... 哎呀囡... 真係冧死人囉... 可惜爸爸當時重未番... 唔能夠即場聽到...


到今朝... 同Jofee通電話時... 佢話我聽... 小春今朝起身同佢講... "爸爸.... 尋晚同你去迪士尼... 好開心呀"... 哈哈~~~ 重話買波波添.... 真係比佢笑死... 佢重要真係當真嘅一樣... 哈哈~~


呢排... 真係覺得小春大個咗好多... 阿tun重話比我聽... 見到小春番學... 好乖呀... 沿途見到每個老師... 都會躹躬... 叫咩老師午安咁... 哈哈~~


不過... 我都有問過佢... 番學係未好開心呀... 佢話唔係喎.... 少少開心啫... 真係比佢吹脹... 哈哈~~

好攰呀~~ 救命呀~~~

今晚真係好攰呀... 放工番媽咪到... 接bubu去睇醫生... 由於bubu少去街... 所以都好少好似小春細個咁勁揹佢... 但今晚事出突然... 重要去到油麻地... 所以用咗毛毛條揹帶... 嘩~~ 唔知係我真係太耐冇揹仔哎... 定係比起揹小春時... 真係老咗呢... 由華富去到油麻地... 兩個膊頭已經痛到我想死啦...


到睇完醫生... 霖同Kobe話去食飯... OH~~~ 我未試過同阿bu... 唔帶車仔咁去食飯喎... 我都驚驚哋... 所以只叫咗碗湯飯... 諗住易控制d嘛... 點知... bubu竟然活潑起上嚟... 又咁反... 又咁反... 食完餐飯... 我隻手腕已經開始痛... 


走... 已經係搭的士... bubu終於都訓咗啦... 但唔知點解... 我番到媽咪到... 竟然... 連手指都攰埋囉... 之後就帶住疲乏嘅身軀番慈云山... 


番到去重要幫小春檢查書包... 溫書... 氹佢訓... 好攰呀~~ 好攰呀~~

小偷春~~

之前未同大家講過... 向佐敦買咗d剪牌Baby Gap嘅... 終於洗好... 今朝試裝啦... 睇吓我家小Model... 幾... 幾... 幾咁... "唔"... 專業.... 哈哈~~ 都係媽媽嘅問題... 因為要快... 除完又試... 除完又試... 搞到張床亂到呢... 嘻嘻~~

今日原來想同小春出去買Halloween衫... 點知阿tun搵番上年嗰套出嚟... 問我星期四係未著呢套番學呀?? 我就比小春試吓啦... 點知重岩著喎... 咁重買唔買好呢??? 買又好似玩得一日咁... 唔買... 又影番上年套衫喎... ummmmmm... 算啦... 反正同學仔都未見過... 著番呢套罷啦~~

之後就出海運... 諗住同佢去買黑皮鞋... 準備隨時換季啦... 話曬呢排d天氣... 好似都開始涼涼哋... 學校又話可以自由換季... 買得嚟都岩㗎啦... 點知... 海運好多間都冇咗... 睇唔到... 唔通真係要買Dr Kong...



睇吓下面張相... 見唔見小春拎住個波波呀... 係經過一間餐廳... 人哋入面插住好多波波... 我估係送比入去食嘢嘅小朋友嘅... 但係... 小春突然自己走咗入去... 向人哋個大杯杯到... 攞咗個波波出嚟囉... 搞到我勁唔好意思... 哈哈~~

小春3歲 Happy Birthday~~

今日係小春3歲生日嘅大日子... 但依然都有上畫畫班同埋Phonics... 大約3點到... 先同爸爸 & Bubu一齊向冒險樂園出發... 小春就去到熟曬啦... 而Bubu今次先係第一次去咋... 


初初去到... 都係小春同爸爸玩機動遊戲... 全部都係爸爸同佢玩... 我睇住Bubu... 因為... 我幾時同小春去都得啦... 但爸爸平時星期六日都好少放假... 所以少d機會同小春親子吓... 今日就比佢哋盡情咁交流吓啦... 

至於Bubu...戇居居咁向bb車到囉... 哈哈~~ 直至入波波池啦... 小春當然滿場飛啦... 爸爸追到索曬氣... 哈哈~~ 我就搵個少d人嘅地方... 同Bubu坐定定玩吓... Bubu聽到d波波都好開心呀... 其間有個妹走過嚟... 我諗佢大阿Bu少少啦... 但阿Bu已經高過人啦... 所以話呢... 都唔好睇少我哋早產b... 影完張相出嚟... 我重笑佢咁細個溝女嘛... 哈哈~~

玩完波波池... 更係唔好比佢停啦... 繼續帶Bubu去玩埋佢人生嘅第一個機動遊戲... 哈哈~~ 講到懶勁咁... 其實只係一架Thomas小火車啫... 

 

哈哈~~ 點解講講吓... 講到似阿bu生日多d嘅... 唔好意思呀小春...原因係... 阿bu佢好少出街... 除咗節日出去食飯... 根本冇去過街... 難得今日一家四口去玩... 忍唔住講多兩句啫... 嘻嘻~~


之後... 我哋就去咗姨婆屋企... 同表姨一齊切蛋糕... 今次第3年講啦... 因為小春同表姨... 係同月同日生㗎... 所以每年都會一齊慶祝... 唔知係未因為呢個原因呢?! 唔認唔認都要認... 佢哋真係有d似㗎... 好驚呀~~~


唱生日歌時... 當然要唱兩次啦... 一次比表姨聽... 一次比小春聽... 小春都係一副怕醜嘅表情... 哈哈~~ 好好笑...

                                         

嗰晚Party後... 小春唔知係未興奮過頭... 重同姨婆跳起舞上來... 當然又係G DRAGON嘅미치GO啦... 但今日嘅演繹... 明顯比之前有進步呀吓... 哈哈~~

P.S. 小春~~ 話咁快你就3歲啦... 唔再係bb啦... 大個女要乖乖哋啦... 快d自己食飯啦... 嘻~ 媽媽祝你健健康康... 聽聽話話... 精精靈靈...

<辣媽正傳>

岩岩睇完套大陸劇... <辣媽正傳>... 唔知係關劇情事定點解... 每次聽到首主題曲... 都好似覺得好慘咁嘅... 又有d感觸... 


 
有一天 我發現自憐資格都已沒有
只剩下不知疲倦的肩膀 擔負著簡單的滿足

有一天 開始從平淡日子感受快樂
看到了明明白白的遠方 我要的幸福

我要穩穩的幸福 能抵擋未日的殘酷
在不安的深夜 能有個歸宿

我要穩穩的幸福 能用雙手去碰觸
每次伸手入懷中 有你的溫度

我要穩穩的幸福 能抵擋失落的痛楚
一個人的路途 也不會孤獨

我要穩穩的幸福 能用生命的長度
無論我是在何處 都不會迷途

我要穩穩的幸福 這是我想要的幸福


不過又唔洗擔心... 女人都係多愁善感... 唔緊要啦... 最緊要係... 我都擁有幸福... 一個愛我嘅老公... 一對我愛嘅囝囡... 一班互愛嘅家人... 希望我都能夠珍惜... 好好捉住我嘅幸福... 

而家開始... 我要追繼承者們... 未來的選擇... Good Doctor... 醫學團隊... 歐羅拉公主... 忙到嘔... 追唔切... 重要抽時間做少少公司嘢... 重要睇fb... 重要寫blog... 重要whatsapp... 重要同小春玩&做功課... 真係曉分身都唔掂... 哈哈~~

我d錢呀....

尋日真係激得死我... 淘寶準備比錢... 發現支付寶d錢唔見曬... 嗚~~ 我比人盜用咗個a/c... 355人仔冇曬... 雖然唔係真係好多... 但都足以激得死我啦... 更係即刻打去支付寶問啦... send咗d資料去... 唔知追唔追到㗎... 盡吓人事啦...

之後... 又要開多次a/c... 搞嚟搞去... 真真麻煩...

唉~ 唔講唔開心嘢啦... 播番首歌比大家聽...
 

一個舊app

話說呢個係小春細個好鍾意睇嘅app... 表姨重為咗咁... 特登幫佢比錢買歌... 就算入醫院... 就算喊曬口... 只要有呢個app... 佢就可以安定好耐... 

但佢好耐都冇睇啦... 點知呢兩日... 因為有新Halloween歌dl... 所以佢又開始睇番... 而家大個囡呢... 有時重會跟住跳舞... 都幾好笑...

可惜嘅係... 因為轉咗用Samsung電話... 所以佢只可用ipad睇... 

點知... 尋晚... 佢.... 佢... 竟然... 向我部電話到... 自己dl番d歌...(好明顯佢係亂按啦)... 68個幾呀... 即係唔係唔比你按錯... 你都搵d新嘢dl哎... dl番d舊嘢... 真激唔知好嬲定好笑... 

小猴子長大了

尋晚又同小春温書... 佢每次睇呢本書... 都會叫我唔好講... 因為佢要自己講比我聽... 雖然講得唔好... 但真係有文有路㗎... 小猴子長大了... 請大家耐心聽吓... 小春講嘅故事啦！

實際內容如下...

bubu 你點呀??

阿bu由星期六開始... 燒吓唔燒吓咁... 都唔知咩事...所以今朝決定叫阿tun過媽咪屋企... 睇住毛毛... 咁媽咪就可以帶bubu去睇醫生啦... 

但係... 阿tun出咗去... 又邊個揍小春番學呢... 唯有問吓姑媽可唔可以幫手啦... 如果得就冇問題啦... 如果唔得... 就叫小春請日假囉... 冇辦法啦...更係細佬睇醫生緊要d啦... 

如果姑媽話冇問題... 唯一擔心佢識唔識路啫... 

唉~~ 次次99揍小春... 小春都會蝦嫲嫲... 今日又唔肯食飯啦... 99打比我... 叫我話吓佢... 但佢堅持要食通粉喎... 99話屋企冇通粉... 我就話... 唔好就佢... 唔好佢話食就整比佢... 結果... 佢真係唔食... 只食咗少少麵包就番咗學啦... 一邊覺得佢好可憐... 擔心佢肚餓... 一邊又覺得佢抵死... 餓吓佢就岩啦... 唉~~ 今晚番去都要教訓吓佢先得...

講番轉頭... 岩岩媽咪打嚟... 話阿bu睇完醫生啦... 但醫生話佢冇明顯病徵... 不過燒得4日... 雖然係低燒... 都肯定係有病菌感染啦... 所以開咗抗生素比佢... 話食2日... 如果繼續燒... 就要覆診啦... 希望佢真係快d退到燒啦... 

點解我對囝囡... 成日一病親都咁令人擔心㗎...


呀~~ 有樣嘢想講... 

由於yahoo blog執笠... 令我又從新諗起寫番blog... 上一次寫blog... 已經係2011年... 哈哈~~ 所以由今日起... 我決定寫番之餘... 重要慢慢update番呢年幾嘅生活點滴... 慢慢寫番轉頭... 就當比自己回顧吓啦... (尤其係阿bu出世嘅感受... 真係好想記低)...

小春的Last一堂跳舞班 (荃灣)

尋日係小春Last一堂向荃灣上跳舞堂... 真係好唔捨得... Ms. Leung又咁好人... 小春又咁鍾意d同學仔... 最唔捨得嘅係... 每個星期日... 同岩傾嘅媽媽們吹水嘛... 哈哈~~

冇辦法啦... 其實一開始學跳舞嘅原意... 都係想比小春都d群體活動... 同埋做吓運動咁... 既然學校又參加到跳舞班... 咁就唔洗山長水遠... 去到荃灣上堂啦... 咁就可以騰出時間... 考慮吓... 遲d有咩可以學吓啦... 

向最後一堂... 搭緊van仔番學途中... 小春突然指住窗外講... 媽媽拜拜嗰到呀... 哈哈~ 我平時都冇留意... 原來旁邊d樹... 望上去係個墳場... 小春記得上次同我去拜山時嘅情景... 成日都記埋d古靈精怪嘢... 完全冇諗過佢會記住囉... 

到落車喇... 我叫... 四海有落哎唔該... 跟住同佢講... 小春你又幫我嗌... 四海有落哎唔該... 點知佢叫咗下面呢句嘢... 笑到我呢...

五海哎唔該~~



跟住... 行番學途中... 見零食物語有盒糖... 係一罐裝... 入面好多糖嗰d呢... 係豬仔嚟㗎... 記得Ms. Leung鍾意豬仔... 所以都買咗... 等小春送比Ms. Leung... 嘻~~ 希望Ms. Leung工作順順利利... 收多d學生啦... 如果有一日... 小春大d... 話佢想學跳舞... (正式的)... 相信... 我都會去搵番Ms. Leung...

 

 

 

信生Open Day

之前向 fb見到信生Open Day... 嗱嗱聲mark底個日期... 諗住同小春去玩... 因為上年小春搵學校時都去過... 真係好dum本... 好多嘢玩...

尋日... 終於去玩啦... 小春勁開心... 首先... 我哋去玩吹氣彈床... 重記得上年... 小春太細個... 入面d小朋友太癲... 小春根本入唔到去... 又驚人整親佢... 所以只係向邊邊彈幾吓... 重要我陪住... 

今年... 小春成為入面玩到癲嘅小朋友... 哈哈~~ 睇佢開心到...

之後重入咗學校入面玩... 

呢張碌架床... 想點呢??? 佢最大特色係... 佢有3層嘅... 但吓吓都要捐入去... 真係有d可憐...

影呢張相時... 小春勁驚... 夾硬影咗呢張... 隔離印第安人... 點都唔肯影... 唔知點解... 每次見到d印第安人... 面具... 都咁驚呢...

呢張話要照顧bb喎... 屋企個細佬又唔見你咁照顧呢呵~~

幾時小春真係識做家務... 就真係一流啦... 我成日話一個懶媽媽... 應該會有一個勤力嘅囝囡... 如果唔係會餓死... 但e+有姐姐... 真係好難講... 可能會比我重懶... 咁就大獲啦...

呢張畫紙真係幾好... 佢係就咁點水畫... 油過嘅地方... 自動有顏色... 好滿足到d小朋友... 又要亂畫... 畫得又靚... 好有滿足感呀...

嘩...  見到呢架車... 佢直頭癲咗... 有小朋友玩緊... 佢就企向到等... 重一陣就問一次... 可唔可以比我玩一陣呀... 哈哈~~ 人哋個阿媽都係咁叫佢個小朋友... 比姐姐玩一陣啦... 搞到我幾唔好意思... 一上車... 即刻叫我幫佢影相... 但可惜... 呢架車仔比較矮... 所以小春唔係好轉到彎...