林林終於都結婚啦!! 大個仔啦~~

今日好開心又好感動, 事關我細佬 ~ 一個永遠長唔大嘅大男孩, 今日終於娶老婆啦!!

由於62單嘢重未夠100日, 所以今朝我都唔去得媽咪屋企睇入門, 硬係覺得自己錯過好多片段咁, 記得我出嫁時, 林林都喊呀, 真係.....

不過, 我一D都冇偷懶, 尋晚就做定個靚Mask, 今朝一早就走咗去洗頭, 著靚靚趕去註冊處啦, 一去到... 第一個就見到我阿媽, 嘩!! 洗唔洗Fur曬咁呀, 不過好靚... 重勁駕勢添!! 嘻嘻~~ 睇吓新娘子, 套婚紗都幾靚喎, 係大部份女仔都鍾意嘅公主款式, 至於個妝呢... 淡淡哋, 都幾好..... 至於個新郎哥就搞笑D喇, 事關佢生咗粒大暗瘡, 哈哈~~

當然, 註冊嘅場面又點少得我d眼淚哎, 唔知點解次次都感動到我, 哈哈~~

之後就更係一輪影相呀, 去酒樓呀, 換衫呀, 化妝呀..... 唔係講緊新娘喎, 係講緊我啦, 媽咪啦, 沙律啦同埋豬豬喎!! 哈哈~~ 我哋重特登請咗Ricky過嚟幫媽咪set頭添, 嘩!! 吹到媽咪個頭幾駕勢幾靚呀, 加上媽咪條暗紅色閃爍裙, 再加皮裘被肩, 真係殺曬呀!!

到到進場喇, 佢哋講嘢感謝詞當然又整喊我啦!! 成晚最最最激氣嘅就係, 林林竟然冇得我同意.... 擺咗我成世人覺得最醜樣嘅相出嚟見街坊囉!!

最後, 要向到祝佢哋恩恩愛愛, 白頭到老呀!!

美甲比賽D相

10月參加美甲比賽D相, 終於都出咗啦, 重向幾本美甲雜誌都有登添, 不過唔知點解, 我會變咗Creation嘅學生囉, 哈哈~~ 不過都唔緊要啦!! 重有個同事咁好眼話見到我上報添, 嘻嘻!!

 

 

 

終於真係轉咗行啦!!

經過兩次試工, 今日終於都正式入Phillip Wain做美甲師啦, 話曬都係份Full time, 所以今次真係算叫做正式轉咗行囉!!

e+講慣唔慣呢.... 就言之尚早啦, 反正頭3個月都包薪, 試吓無妨哎!! 我見我D同事都幾忙家, 佢呢到就有一樣嘢好, 就係唔洗自己留客, 唔洗sell plan之類, 有consult負責, 再分配比d Nail Artist做, 大家都唔洗爭, 咁幾好哎!! 但係套制服就幾肉囉, 哈哈~~

今日62上山啦, 祝佢一路安好啦!!

今曰62上山啦, 尋日真係喊到癲咗, 今日對眼重好腫呀!! 希望佢一路走好啦!!

呢排心情真係好差, 除咗前兩日個美甲比賽, 比咗錢冇辦法之外, 所有公事私事都停曬咁滯!!

話時話, 話說我62去嗰日嘅傍晚, 我已經發夢見到佢啦!! 我見到我都係訓緊覺, 聽到個廳好噪, 開門睇吓.... 就見到坐咗成位人, 枱面令我最深刻印象嘅, 就係有碟好紅卜卜嘅蟹, 我一出到去, 老爺就介紹我係志雄個老婆啦, 跟住又話搵四眼仔..... 之類之類啦!! 到我醒咗, 話比大家聽, 佢哋話62應該係想介紹我呢個新新抱比人知, 同見吓佢粒男孫喎!!

又話說我62回魂嗰晚, 我同志雄都點咗藥訓 (隻安眠藥平時食咗可以訓三日), 點知到到半夜, 有人拍我喎, 我醒一醒.... 突然又諗起62回魂, 即刻咪番埋對眼, 跟住就即刻入咗夢啦, 我聽到62話, "唔好玩嘢喎, 我知你未訓家, 得閒就同99去睇吓醫生, 屋企d運會越嚟越好家啦!!"

你哋都未話唔邪!! 哈哈~~ 希望62真係要保佑我哋呀!!

第二屆香港專業美甲公開賽 - 平面指甲設計 <<季軍>>

哈哈!! 今日好開心呀!! 話說Miss之前叫我參加第二屆香港專業美甲公開賽, 我?? 我點得呀?? 我上網見人哋d作品咁勁!! 佢重叫我參加Fantasy Nail Art添!! 吓!! 更加唔得啦!! 咁誇張, 我邊做得嚟呀!! 又要搵Model, 又要租衫, 好多嘢準備嗰喎!! 最終, 我就參加咗一個隱陣d嘅, 就係"學生組平面指甲設計 - 盒內展示"

原先, Miss都話幫我, 教吓我噴槍呀, 構圖之類咁啦!! 點知.... 佢呢排鬼死咁忙, 又出trip又剩, 我唯有自己頂硬上啦!! 諗咗好耐都諗唔到整咩好, 有諗過整老虎眼啦、童話森林啦、國畫啦、海灘...... 咁呀!! 不如整兩套睇吓邊套好啦!! 整邊套好呢.... 海灘又好似好普通喎, 花花草草又諗唔到點構圖, 國畫又要諗吓點做到化化哋嘅感覺, 冇時間啦!! 就整套老虎先啦!! 點知.... 整完套老虎, 嘻嘻~~ 冇心機整第二套啦! 哈哈!!

對於我呢個畫畫低b嚟講, 畫老虎簡直係妄想呀!! 點知... 我竟然一次就畫得個樣有幾分似咁喎, 哈哈!! 上色睇吓先!! 唉!! 我重未買噴槍, 咁點呢?! 諗諗吓..... 呀!! 用海綿應該可以做到比噴槍更似 "毛茸茸" 嘅感覺囉!! 嘻~~ 上咗色真係有d似喎!! 哈哈, 志雄都話似呀!!

今日終於係交參賽作品嘅日子啦!! 今朝一早, 志雄就陪我去, 嘩! 真係幾多阻滯呀!! 去到先發現, 我攞錯咗個參賽證明, 好似d職員幫手check到, 跟住交作品時, 又發現原來有份作品介紹表一定要有先可以比賽, 但係我從來都冇收過呢份表喎, 搞咗好耐, 好彩又有d職員幫手, print過一份比我填番!! 嘩!! 見到d對手d作品, 真係好靚呀, 我實冇行啦!! 不過, 我都係智在參加吓, 攞d經驗, 又睇吓人哋比賽係點嘅啫, 得失唔好睇得咁重, 個心都好過d嘛!! 跟住見到我Miss, 佢問我交咗作品未呀! 我想指比佢睇啦!! 事關佢都未見過, 點知... 佢竟然話唔好指, 佢都係評審, 唔睇得嗰喎, 有冇咁嚴謹呀!!

4點, 我同志雄又番番九展, 唉!! 重未得呀!! 咁唯有睇吓人哋比賽先啦!! 嘩~~ 人哋d Fantasy真係好靚家!! 呢個時候又見到我Miss喇, 佢問我... 究竟邊個先係你家?! 我話老虎囉!! 佢又拉我埋去睇, 佢話.... 吓!! 乜呢套老虎係你整家, 真係估唔到喎, 一d都唔係你作風喎, 佢話以為我會整花花草草喎!! 佢重話... 雖然老虎都唔係d咩新提材, 不過同其他參賽者嘅作品比較, 又幾突出囉!! 佢話佢都有留意隻老虎, 話我整得幾好添!! 哈哈!!

到成6點幾先真正頒獎, 結果我得咗啦!! 哈哈!! 頒獎嘅係Creaion嘅Regina Lui, 估唔到佢又認得我喎!! 哈哈!! 佢重同我講, 嘩! 勁喎!! 搞到我鬼咁唔知點咁添!! 我Miss重向台下同我整good嘅手勢添!! 好開心呀! 我咁大個女, 獎牌就攞過啫, 哈哈!! 獎杯都係第一次咋!!

不過, 由於大會冇講得獎作品係邊個, 剩係講人名, 所以我都唔知攞冠亞軍嘅係邊個作品, 但係我都有用電話影咗d相

我的作品

我心目中之冠軍作品

我心目中之亞軍作品

 

由於冇帶相機, 所以冇影到相, 要等大會提供番比我, 所以e+等豹豹頒住比我先啦!! 哈哈!!

派傳單真係幫到手嗰喎!!

派傳單真係幫到手嗰喎!! 日日都有D街客上吓嚟, 重有遊客添呀!! 哈哈~~

另外, 得閒我哋又整吓甲板啦, 又可以隨時出去BE吓喎!! 最緊要係時間好彈性, 呢D咁嘅生活都幾棧鬼家!! 呢排重有D熟客搵吓我咁, 好似真係有D轉咗行嘅感覺啦!! 就係有D未係好轉囉~~

好似創業

本來諗住幫手沙律搞, 突然變咗自己都有份, 今日去買咗枱啦, 跟住重要搞印傳單同卡片之類, 一諗起要design, set價.... 就有d頭尺添!!

又睇醫生啦~~

繼T仔離我而去之後, 呢幾晚我又開始肚痛啦!! 唉~~ 究竟咩事啫!! 放過我啦~~  睇咗咁多之醫生都冇用, 個個都話唔到比我聽咩事, 但係又成日都肚痛... 究竟係關邊樣嘢事呢... 唉~~ d醫生都唔知係未讀屎片家!!

今晚番媽咪屋企食飯, 話比媽咪聽, 佢就話叫我上急症室睇吓囉,睇急症咩都快d知嘛!! 跟住媽咪同志雄就陪我上咗瑪利喇, 哈哈!! 媽咪真係勁呀, 原先醫生只係肯寫紙比我睇吓婦科專科, 比佢講講吓, 醫生 e+寫埋紙比我睇外科添!!

一人分飾多角 ~ 身心疲勞

呢排開始去Head Quarter跟師傅學修甲啦!! 嘩~~ 又番gel甲堂, 又番修甲堂.... 個人好亂之餘, 好多功課做, 星期六又要交50隻甲.... 攰死bb啦!!

學修甲真係幾難, 佢d挫甲同gel甲又唔同挫法, 搞到我真係唔知點好, 重要跟向師傅後面, 就好似你哋去剪頭髮時, 未有d junior企向後面嘅, 我就好似嗰d junior咁囉, 唉!! 我又唔企得喎 (我對腳係kai嚟撓嘅之嘛!!) 重要幫手搬洗腳水呢(師傅話要我學試水溫喎), 唉~~ 真係攰到仆街呀!! 不過都冇計啦, 人哋呢d老師傅, 都唔係人人肯教家嘛, 重要佢唔收我錢教我喎!! 真係唔話得呀!!

我要努力向上~~ 不枉諸君寄望~~~

T仔終於走咗啦~~~

呢排雖然話放緊假, 但係好似重忙過平時咁囉!! 又要睇醫生, 重要做功課, 尋日T仔終於都走咗啦!! 真係一天都光曬呀!! 嘩~~ 除嗰陣我都不知幾驚, 驚佢又唔肯走就要全身麻醉嘛!! 好彩佢都生性, 哈哈~~ 嘩!! 一除出嚟嗰下, 我直頭有pop一聲打開嘅感覺呀!! 好似成條氣都通曬咁, 哈哈~~ 我係咁誇張家啦!! 希望肚痛真係關T仔事啦, 唔係都真係唔知咩原因啦!!

之前去割咗粒瘡, 呢排又要去洗傷口,  今日終於都拆埋線添!! 唉~~ 真係希望所有病痛都離我而去就好啦!!

由金菇變咗做冬菇

今日終於夾到時間, 可以染番個頭啦!! 哈哈!! 呢排有時向街撞到d好耐冇見嘅fd, 佢哋竟然唔認得得囉, 我諗係因為我留得太耐頭髮, d人唔認得呱!! 重好笑嘅係, 嗰日豬豬上笠綸到, 見到豬敏, 佢話嗰日向旺角見到隻金菇喎, 好明顯係話緊得啦!! 哈哈~~ 我冇嬲... 只係覺得好好笑囉!! 形容得真係貼切喇!!

一染完個頭, 又剪埋頭髮後, 變咗一隻冬菇囉!! 哈哈~~ 不過..... 我依然都係搞唔掂個頭, 原來唔知由幾時開始, 我d頭髮變曬質, 變咗捲毛呀!! 真係奇怪喇!!

Hair Show again~~

尋日, 又幫Matthew行Hair Show, 今次呢個冇上次咁大陣容嘅, 主要係教學模式!!

一早就入到大埔, 食飯啦.... 化妝啦.... set頭啦....

終於都出場啦!! 我又係第一個, 今次係要向2樓行落嚟, 上台擺兩個pose, 再行落觀眾席, 再番上台擺個pose, 等第二個出嚟, 等佢行完就一齊上番2樓咁嘅, 點知.... 當我一向2樓行落嚟嘅時候, 已經見到一個好熟口面嘅人推門而入, 係..... 佢係遲到.... 唉!! 我向豪無準備嘅情況下見到熟人, 成個人就即刻硬曬呔囉!! 行完出去觀眾席, 番番上台擺pose, 唉!! 原來佢就坐咗向我前面, 兜口兜面咁望住我, 搞到我連pose都即刻唔識擺!!

好唔容易捱到上番2樓, 繼續睇show啦, 因為所有model出場後, 要落多去一次, 又拍手掌又剩哎嘛!! 點知.... 睇睇吓show發現..... 我對涼鞋斷咗帶囉!! 我即刻攞d黑色橡根, 係咁整實佢囉, 好彩發現得早咋, 唔係落到去就出醜啦!!

唉.... 又係企正向嗰個fd前面呀!! 又硬曬呔啦!!

T仔... 比條生路嚟行吓好唔好?!

呢排又成日都肚痛啦!! 咁都唔係辦法, 襯放假... 嗱嗱聲搞掂個身體先得!! 如果唔係之後咁忙都唔知點算!!

所以我今日就的起心肝, zip咗期諗住拎番個T仔出嚟, 點知.... 佢唔生性, 賴死唔肯走, 醫生都話冇法啦, 唯有等下次經期第4 or 5日先再試過囉, 又比咗d藥我, 我叫下次嚟之前食, 話可以幫我可以放鬆d, 咁就自然容易d擺脫佢啦!! 但係如果佢死都唔肯走嘅話, 就要入醫院全身麻醉做家啦, 嘩!! 唔係吓化, 係未想嚇死我啫!!

唉~~~

終於有假放啦!! 但係....

Jackeline今日飛啦, 話要去做評審喎!! 嘻嘻~~ 我哋終於有假放吓喇, 不過當然..... 佢比咗功課我哋啦!! 同埋e+嚟計, 我嘅Schedule已經安排到20號啦!! 唉~~ 真係忙過番工呀!!

所以今日襯住下午有個空檔, 就上沙律到做吓功課喇, 沙律真係幾聰明, 第一次自己睇住d美甲書做花, 已經做得似模似樣啦!! 講緊Jackeline都未教我哋Nail Art喎!! 嘻嘻~~ 真係幾有天份呀!!

夜晚, 我就同媽咪佢哋去咗維景酒店食buffet, 哈哈!! 點解?? 因為維景解封之後, 第一日開番, 邀請咗我媽咪呢d熟客去免費食buffet囉!! 哈哈!! 佢哋一次竟然攞到成10張飛囉!! 去到見佢哋, 又真係個個waiter都識佢哋, 認真巴閉呀!! 哈哈~~

真係食得好飽呀~~ 至於驚唔驚, 更係唔驚啦!! 分分鐘e+最安全嘅酒店係維景添呀!! 哈哈!!

 

真係好有心

就嚟生日啦!! 真係估唔到有咁多人記得, 就連Pauline, Bonnie, MeiMei都好有心, 其實我離開咗安利都咁耐啦!! 佢哋重咁記得我生日, 真係多謝曬呀!!

今晚Bonnie & MeiMei就約咗我出嚟食飯, 哈哈!! 佢哋都話唔係好認得我, MeiMei重好似覺得我好得意咁, 要同我影相添, 真係搞笑!!

生日禮物更係唔少得啦, 哈哈!! 除咗有Bonnie & Pauline嘅心意之外, MeiMei呢份, 我真係勁鍾意呀!! 就係佢親手織比我嘅豹豹公仔喇, 勁靚呀!!

  Thank you~~~

學咗新嘢啦!!

自從跟咗Jackeline學Gel甲之後, 自信心真係跌到新底點呀!! 樣樣都話錯, 延長錯, 手勢錯, 重之就乜都錯啦!! 唉~~

不過呢排, 我都開始習慣新嘅手勢啦!! 用咗新手勢後, 真係覺得無論用筆定挫, 都好似比以前穩陣好多, 剩係學呢幾吓, 都藉回票價啦!!

上個星期由基本功開始學起, 跟住就係French啦, Colour Gel & 閃粉漸變啦, 做法真係同以前唔同好多喎, 個漸變真係好自然喎!! 勁呀~~~

哈哈!! 今日終於有新嘢喇!! 嘻嘻~~ 就係拖花喇, 我以前真係冇學過拖花家, 所以今日真係好開心, 又好有心機, 放學即刻同沙律勁練習!!

哈哈!! 大家睇吓.... 呢到有5個花家!!

Schwarzkopf Hair Show 09

呢排成日都要上HairQuarters整頭, 染眉.....

大家睇吓.... 唔好話你哋, 我自己行街經過d鏡, 見到自己都唔認得!!

尋晚, 終於都到表演嘅日子啦, 12點幾就去沙律屋企準備, 點幾就去到尖沙咀ZAZA啦!! 沙律問我有冇緊張, 冇囉..... 一味係忙囉!! 忙選衫, 忙換衫, 忙化妝, 忙吹頭, 忙bebe..... 但到到彩排時, 一知道我要第一個出場, 就真係知驚啦!! 點呢, 我要點好呢? 擺咩pose好呀?? 真係頭都痕埋!!

晨早就著起對成5寸嘅高根鞋, 行嚟行去!! 我要習慣嗰幾級樓梯呀, 一陣仆街就真係過癮啦!!

到真係On Show, 一行出去..... d人嗌到癲咗囉!! 當然大部份肯定係班髮型介嘅fd啦!! 但當時我根本乜都睇唔到, 剩係見到閃光燈同相機囉, 又要記位擺pose.... 直到上台一刻, 見到佢哋班人, 原來就向台邊, 我即刻忍唔住笑囉!! 當我上到台企好咗, 就輪到第二位Model出場喇, 歡呼聲冇曬!! 但係焦點已經唔向我身上喇!! 又到第三位Model出嚟, 向呢段期間, 我on99咁向個台上, 擺住嗰個無聊嘅pose, 覺得自己對腳開始有d震!! 哈哈~~ 到到第3個Model都上到台擺好pose, 我又要第一個行番入後台, 嘩聲又四起啦!! 真係冇佢哋收!! 入番後台真係鬆一口氣呀!!

U仔重笑我多fans, Jacky Ma又走嚟幫我吹多次頭, 哈哈!! 真係比之前出場靚好多喎!! 到到12個Model都出過場之後, 我哋又要再出多去一次, 都係嗰d例牌影吓相, 拍吓手嗰d囉!! 之後就係d賓客可以同我哋影相, 班fd就係咁上嚟同我哋影相, 豬豬個Hello Kitty頭就最受歡迎, 影到其他Model都入番曬後台, 我哋重向到影緊相, 哈哈!!

 

 

今日超順利, 客人好滿意, 我都好鍾意!!

唉!! 星期3嗰日, 又入咗d新貨..... 又洗錢啦!! 不過呢排都算有d生意.... 但係通常d客都係做d basic款, 冇乜新意.... 哎!! 上星期都有個, 唔記得影相添!!

不過今日嗰個女仔都ok喎, 又幾好傾, 整個指甲我都幾鍾意, 佢又幾滿意, 所以都幾有滿足感家!! 睇吓......

其實睇相都唔係咁清楚, 佢係選咗黃色斜斜哋咁落, 再向黃色上面加幾隻唔同顏色嘅閃片, 再雕咗4隻蝴蝶+閃石, 真係幾Q囉!!

呢張就係我自己之前嘅, 簡簡單單, 我都幾鍾意!!

嗰日, 沙律打咗比Matthew個fd, 話嗰個女仔好勁家!! 佢已經冇幫人整甲家啦, 重周圍飛教人, 成日都唔向香港家!! 沙律話比佢聽, 我嗰日去試堂學噴槍, 佢都話.... 吓嗰間嘢?? 嗰個教噴槍個女仔, 見到佢都要走埋去同佢打招呼呀!! 但係因為佢同Matthew好fd家, 所以佢話肯親身教我同沙律呀!! 嘩~~ 好緊張呀!! 不過唔知佢收幾多錢呢?? 因為佢重未講家!! 但係就約咗星期2上佢到, 佢話肯拾吓我d手勢囉!! 勁驚呀~~

去影一周年相 + 個人照

尋日, 同老公約咗媽咪, Lin Lin, Kobe & 佢媽咪家姐一齊番大陸, 原先諗住同佢哋上去睇Lin Lin d結婚相嘅, 點知朝頭早臨時有客, 所以我同志雄就遲咗d上去喇!! 上到去.... 佢哋竟然話d相好唔掂, 要重影喎!! 吓~~ 咁都得!! 冇得睇.... 咁我哋就陪媽咪睇吓做衫d舖頭啦, 但係又唔知邊間好, 結果都係得個吉!!

夜晚, 我哋一齊食完飯, 佢哋就番香港先啦!! 我同志雄就搵咗間嘢坐低飲吓嘢, 到咁上下就諗住去揼骨 + 訓覺喇!! 點知.... 可能係公眾假期, 鬼咁多人, 重話要3點先上到房, 嘩!! 揼3粒鐘未揼到天光!!! 唉!! 咁都冇辦法家.... 唯有就犯啦!! 不過好彩日式床夠大張, 舒舒服服就訓到今朝點幾先醒, 哈哈!!

見有間嘢, 話乜Q腸粉大王, 諗住岩岩起身冇乜胃口, 腸粉就腸粉啦!! 哈哈~~ 點知個腸粉似我哋細個時玩, 拋上天花板嗰d濕廁紙多d囉!! 真係笑死人呀!!

食完嘢, 就去影一周年照同我嗰輯個人照喇, 免費家... 每年都可以影一輯, 幾好!! 哈哈!! 不過e+更係未有相睇啦!! 等攞到相, 再放上嚟比大家睇吓啦!!

呢張就係變身前嘅相, 比大家止吓咳先..... 哈哈哈哈!!!

第一次用soak off gel玩嘅款

尋晚, Mandy終於幫我買到soak off gel啦!! 我又邊把持得住哎.....嗱嗱聲就即刻試上手啦!! 嘩~~ 真係好O喎!! 好似真甲咁, 又夠薄, 又有un性!! 連我老公都話比之前嗰d自然好多呀!! R痕都舒服好多, 哈哈!! 重可以拾銀仔添!! 真係棧鬼呀~~ 嘻嘻!!

不過咁..... 我都未買soak off gel嘅colour gel!! 而且, Mandy話中間落番hard gel嘅colour gel, 佢試過都ok家, 所以我未又試吓囉!! 今日整咗一隻手, 等卸甲時就可以知係未真係得啦!! 哈哈~~ 呢個就係我今日整嘅款, 大家睇吓啦!!

點解我剩係整一隻手?? 哈哈!! 因為今日我要去Akzentz到睇個Demo嘛, 所以未留番隻手試做囉!! 大家睇吓.... 真係好薄家!! 好似真甲咁家!!

係未呢?? 我重學埋點卸甲添!! 勁呀~~~ 下次唔洗死磨爛磨先卸到甲啦!! 哈哈!! 不過... 講咗咁耐, 我都未試過自己卸甲, 試完再同大家分享啦!!

終於做第一個客啦~~

之前向網到問過, 如果租張枱幫人做甲幾錢, 雖然1500個月就唔算貴, 不過自己又未有客, 都係諗諗先啦!! 點知上個禮拜, 嗰間舖個老板Mandy打比我, 問我可唔可以幫佢做個客, 我更係話冇問題啦!! 但係.... 雖然話平時自己都成日整, 同埋幫fd整就整得多啫, 始終未做過街客, 一定會緊張家嘛, 話曬又唔知個客會做咩花, 萬一真係唔識整, 咁未好魚!! 咁真係會冇下次嗰喎!! 但係....緊張咗成日之後..... 最終個客都係no show!! 有d失望之餘, 又有d舒咗啖氣!! 不過Mandy都好好咁, 比番50蚊車錢我!!

尋日, 去完interview, Mandy媽媽阿Amy又打比我, 話8:00有個女仔, 所以終於.... 終於我都做咗第一個客啦!! 佢個名叫Ruby, 我會好好記住呢個名字, 哈哈!! 佢真真正正咁讓我踏出咗第一步!! 大家嚟睇吓我嘅作品啦~~

我自己就覺得, 如果d花花有埋石有更靚喇!!

09年花展

記得上年睇到于敏去花展影d相, 真係好靚呀!! 所以今年我都捉我老公陪我去影相, 哈哈!! 雖然本身都唔係花痴, 但係見到咁多咁靚嘅花, 心情都開朗d呀!!

睇吓~~ 係我最鍾意嘅粉紅色鬱金香呀!!!

好似幾飄逸, 影完似涼衫多d..... 哈哈哈!!

多花到呢~~~ 勁呀!!!

重有我細個時最鍾意嘅粉紅色海棠花.......

同埋粉紅色嘅繡球花.....

eee~~~ 好似鍾意親都係粉紅色咁.... (包括傻豹), 嘻嘻!! 所以話我係粉紅人, 真係冇乜點錯囉!! 哈哈~~

無無聊聊, 又玩指甲

買咗個3D gel之後, 間唔中都會攞出嚟練吓, 真係越睇越靚!! 哈哈~~

不過呢排我d指甲剪短曬, 為咗順便比佢哋休息吓, 搞到我.... 終於買咗對假手啦!! 哈哈!! 其實都係籍口啫, 我想買好耐家啦!! 大家睇吓似唔似真手~~

另外, 我諗我都係時侯, 練番多d畫花嘅技巧啦!! 呢個係我睇書畫嘅, 大家又覺得點呢?

學咗新嘢呀~~

其實想學呢個雕花gel好耐家啦!! 今日終於的起心肝, 雖然千八蚊一set得3個鐘堂上, 就真係貴咗d, 不過.... 鍾意就真係冇辦法啦!! 佢重要又冇味, 又可以慢慢雕, 重可以成機學吓d新嘢!! 都幾好哎~~

我整嘅第一朵立體花, 就唔記得帶走, 漏咗向Miss到, 不過一番屋企就嗱嗱聲開工, 哈哈~~ 大家覺得O唔O呀!! 嘻嘻..... 有待改進啦!!

整完一朵又唔夠喉, 朵菊花係我自己諗出嚟家!! 嘻嘻~~ 好勁呀~~~

優子姓名學-個性分析

睇完MeiMei向fb筆記的個性分析, 見悶悶哋.... 等我都玩吓先!!

http://www.fatemaster.tw/name.php

我的內在想法

*頭腦反應快，模仿學習力強
*個性主動積極，但也急性子
*在不如自己意時會搞小團體，或者做一些挑撥的事
*性格比較激烈急躁，是個耐心不足的女孩子
*對自己要求比較嚴格，在團隊中也不甘願認輸，比較好強

我的外在行為

*個性一向不服輸，愛爭贏，還很愛面子
*懂得表現自己、愛出風頭
*不喜歡受約束，但是你卻會會約束他人
*有時太強勢，而且會強迫他人接受自己的觀點
*會帶頭起哄，炒熱氣氛

唔知大家覺得準唔準呢?? 好似冇一樣係優點囉!! 哈哈~~ 唔通我真係衰到咁!! 不過你哋唔洗開心得太早, 我係唔會改嘅, 有排你哋受呀!! 呵呵~~ ee.... 等我睇埋我老公先..........

羅志雄的內在想法

*想法非常主觀，很有自己的看法及意見
*頭腦冷靜，判斷力及敏銳度比一般人深遠
*喜歡新鮮事，討厭一成不變
*只相信自己的判斷，常常不信邪，屬鐵齒一族
*有時太過好高騖遠，讓人覺得有點自大狂妄

羅志雄的外在行為

*有著善良忠厚的外表，讓人的第一印象都很好
*只要是認定了，對朋友、女朋友或工作的忠誠度都很高
*喜歡被他人重視的感覺，不喜歡被忽略
*毅力堅強，不容易被挫折擊倒
*外表看起來很有自信，但私底下沒辦法受到言語的刺激，會產生崩潰

咁又係呀!! 其實佢都算幾硬頸, 有時又需要人氹吓佢, 不過佢對老婆忠誠度高喎!! 哈哈~~ 重算我冇嫁錯郎啦!!

09情人節

星期五晚, 去咗Hedy個生日Party, 搞到成4點幾先番到屋企!! 好攰好攰~~ 第二日就係情人節喇!! 搞到d皮膚都差曬添!! 唉~~

已經唔係好記得, 結婚周年嗰陣有冇寫blog, 不過都唔緊要啦!! 向到再講一次..... 嗰日咁岩撞正我表舅父個B擺滿月, 表舅喎~~ 更係唔去唔得啦!! 結果, 我哋冇慶祝正日.... 唔緊要啦!! 後補囉~~ 一樣好sweet!!

點知今次情人節又係咁, 撞正我62生日... 再加Fanny's Birthday Party, 噢!! 又要後補啦!! 哈哈!! 有冇咁Q呀!!

我老公成日話.... 女人要收花係因為要威, 所以話如果節日我唔洗番工, 送花都冇乜意思!! 咁都岩嘅.... 不過就係咁Q, 好多次節日我都咁岩唔洗番工啦!! 所以好耐都冇收過花啦!! 點知今年..... 嘻嘻!! 佢個傻佬放工番嚟, 鬼鬼祟祟向袋到, 攞咗一支粉紅色嘅太陽花出嚟!! 呵呵~~ 想開心死人咩!!

之後我哋重嗱嗱聲駕車上咗獅子山食晏, 再遊咗陣車河, 先番去同62食飯!! 話曬都係情人節, 更係要爭取時間, 2人世界吓啦!!

嗰晚, 去Fanny個Party飲得太夜啦!! 第2朝, 我哋兩個都遲咗起身, 諗吓d行程先.... 原先plan去食豬潤麵嘅, 不過去到.... 竟然要排隊囉!! 我哋又趕住去拜神, 都成4點幾啦!! 都係唔食嘢住啦, 快d拜完神先講啦!!

拜完神.... 5點幾, 兩個都鬼咁肚餓, 點好呢!! e+食又驚夜晚嗰餐食唔落, 唔食咩!! 想餓瓜我咩?! 結果我哋一致通過, 一餐當兩餐食, 提早食晚餐!! 我哋去咗西沙嗰間TomBar + Grill到食, 嘻嘻!! 好靚呀!! d嘢重好好味添!! 可惜食到甜品先記得.... 哎!! 唔記得影相呀!!

之後, 我哋又去咗一個我都唔記得叫咩嘅碼頭, 散吓步... 傾吓計... 睇吓人釣魚!! 睇到呢到, 可能你會覺得.... 嘩!! 有冇再老土d呀!! 哈哈!! 你哋識咩哎~~ 間唔中享受吓呢d, 唔係行街睇戲, 單一死板嘅拍拖方式, 有時真係幾舒服!! 重要係一個後補嘅情人節, 一個值得珍惜嘅晚上... 寧靜... 浪漫...

不過我哋都唔係浪漫咗好耐, 事關嗰晚我哋又趕住上2A啦!! 因為Matthew嗰晚番咗大陸玩, 所以沙律就叫我去嗰邊訓囉!! 志雄上到去坐咗一陣, 就自己番咗屋企啦!! 噢~~ 亨亨!! 有d唔捨得添~~

之後嗰晚, 我哋又Lady's Facial Night啦, 再夜d.... 阿Dick重上咗嚟, 又話要搓(妹)又剩, 結果搞到6:30先有得訓!! 唉~~ 連玩咗3晚啦!! 第2日重約咗輝哥成12:00 Noun K添家!! 攰死人咩?! 洗唔洗chur到咁盡呀?!

永遠學唔精嘅.... 低能兒~~

記得... 我姥姥死嗰陣, 令我最唔開心嘅, 除咗我覺得自己對佢未盡孝道之外, 我重問我自己, 點解你要食煙呢!! 就自從食煙開始, 我冇再去攬實佢, 我驚佢聞到我d煙味!! 我好後悔... 我哋嘅感情, 變得疏離咗!!

姥姥死咗之後, 我覺得自己變咗, 變得自私咗!! 我覺得我最愛錫嘅人都冇咗啦!! 其他所有嘅人, 物, 事... 都變得唔緊要啦!!

當然... 幾年之後... 我媽媽變咗我心目中最重要嘅人, 佢嘅好... 真係好到唔能夠用筆墨形容!!

3歲定80, 我又8卦又投入嘅性格, 令我又不得不對身邊嘅人表現關心, 除非你好過份啦....

嗰日, 同沙律傾開好多細個時嘅趣事, 大家都覺得, 原來.... 我哋真係算幾幸福, 如果e+死, 其實都真係冇咩遺憾!! 佢話唯一係未睇過落緊雪嘅時候囉!! 我就話我唯一就係想等我還曬d數先死囉!! 哈哈!! 諗諗吓... 原來我哋真係由細到大都玩埋一齊, 好似姐妹咁, 但好笑嘅係, 我哋竟然係兩姨甥囉!! 終於都明點解咁多人羨慕我哋, 唔係因為我哋感情有幾好, 而係因為.... 我哋都有一個, 無論你點錯, 佢都會原諒你嘅人向身邊!!

朋友??! 唔同年紀就會有唔同嘅朋友, 轉完又轉.... 有得幾多個真係一直向你身邊哎!! 交心嘅唔係冇, 有d好好添!! 不過.... 同親人比... 邊個冇私心哎!!

親人??! 無得選擇... 最後唯有當冇事發生過囉!!

氹??! 冇事嘅時侯, 大家都好落力咁氹人家啦!! 有事??! 好似好耐都冇人氹過我啦!! 老公??! 次次嬲佢, 佢都剩係會講道理家咋喎!! 講講吓... 都冇佢咁好氣, 算罷啦!! 朋友??! 嬲得幾多哎!! 一陣又話你小氣喇!! 你估人哋老鳳就你家咩!! 親人??! 阿媽... 我氹佢都嚟唔切啦!! 細佬... 男仔唔話得咁多嘅!! 姥爺... 邊咁得罪呀!! 阿姨... 講唔過佢個喎!! 下次家庭聚會, 未又係死死氣坐埋一齊!!

嬲??! 嬲得邊個哎!! 本身... 我就唔係一個鍾意嬲人嘅人, 有時嬲嬲吓, 我都唔記得嬲緊咩喇!! 有d人... 逼不得已嬲咗, 冇fd做啦!! 過幾年... 冇後悔嘅, 不過冇咗個fd囉!! 唉!! 算囉... 反正人大咗, 唔想咁多應酬添!! 有個人... 應該係話我阿爸.... 好似好值得嬲咁, 但其實向好幾年前, 我已經放低咗啦!! 想唔想見??! 唔想喎!! 冇乜意思囉!! 不過唔嬲啦!! 真係唔嬲啦!!

其實, 我真係好唔鍾意嬲人嘅感覺, 好似呢幾日咁, 有d嘢煩繞住我.... 我真係幾日都悶悶不樂!! 就係呢種感覺啦!! 真係好討厭, 所以你話嬲人嚟, 有乜為哎!! 唔知係未真係開始老呢!! e+唔開心嘅事, 好容易令影響到我嘅情緒!! 又可能係我太少諗嘢啦!! 一有d嘢諗吓, 就周身唔舒服咁!!

但係我就係唔開心哎嘛!! 唔通真係比我講中, d人剩係唔開心先諗起我!! 冇事喇, 安定喇!! 理得我死喇!! 幫完人重要受氣, 吃力不討好!! 唉~~ 怪就怪我太重感情囉!! 又話冇咗邊個都得, 又咁又咁, 衰完一次又一次, 都學唔醒!! 唉!! 都唔知係未似阿媽!!

賀年甲

呢個新年, 忙到連回顧都唔得閒做, 不過亦都唔會做番轉頭啦!! 重知08就話好唔好, 話唔好又幾好咁囉!! 最重要就係結咗婚囉!! 感受就成日都講家啦!! 呢排真係攰到個人都冇乜心機, 雖然唔係話真係好幫得手(因為我成日整親, 佢哋都怕咗我), 不過都算勞心勞力嘛!!

忙咩?? 上次話嗰單嘢, 終於向幾日間, 佢哋已經搵到新屋, 入埋伙添啦!! 可憐我嘅賀年甲, 就向幫手時整斷咗囉!! 實在真係太多嘢搬啦!!

軟飯王~~ 等天收啦!!

曾經一度令我愛錫嘅人傷心 + 西口西面 + 破咗產 + 食軟飯 + 打女人 + 成日半夜趕同居女友出街 + 向fb周圍溝女 + 扮可憐氹女友攞錢然後同新女過澳門玩 + 又窮又多嗜好 + 重要女友幫佢同條新女講好話... 嘅Kevin Owen終於慘敗!! 哈哈!! 大快人心 ~~ 今朝一上facebook, 發現佢已經block咗我~~ 第一次比人block得咁開心.... 咁又係呀!! 佢重有鬼面見人咩!!! 佢fb入面嗰七百幾個係有add唔係又add嘅女仔, 真係要小心d, 唔係真係好易成為下一個受害者!! 分分鐘生埋花柳都唔知咩事呀!! 哈哈~~

話說尋晚我哋一行七人, 打算陪我愛錫嘅人去佢屋企拾番d嘢!! 我哋突登就岩佢放工時間打比佢, 諗住叫佢嗱嗱聲番嚟睇住我哋拾, 費事一陣唔見嘢又賴呀!! 點知佢向到大扭屎忽花, 我未叫我愛錫嘅人收線囉, 同佢講都side氣啦!! 佢知你拾嘢.... 重唔即刻夾撚住條賓周番嚟咩!! 同佢噪都費事!! 我哋又有key...... gogogo!!

嘻嘻!! 我哋向15分鐘唔夠, 將佢屋企大部份嘅嘢拾走, 其中包括... 電視, 電腦, 相機, 遊戲機, 氣槍, 佢屋企3/4嘅衣物...... 當然依然有d拾漏啦!! 但係有d垃圾就當豪比佢囉!! 哈哈!! 總括嚟講... 佢屋企得番兩張爛梳化, 一個電視櫃, 一部雪櫃, 一張枱同一張床囉!! 哈哈!!

15分鐘後.... 佢終於番到嚟喇!! 個樣當然興過火屎啦!! 不過我哋咁多壯丁向到, 佢又唔敢出手囉!! 如果得我哋幾條女, 佢肯定打我哋都似!! 呢個時侯, 我愛錫嘅人問佢攞番身上飾物, 車key & ETC, 佢重竟然唔肯比囉, 個問題係架車係我愛錫嘅人嗰喎!! ETC就更加唔洗講啦!! 攞咗人張卡都得家咩??! 佢重話要報警.... 報未報囉!! 我哋都未驚過呀!! 哈哈~~ 點知差佬嚟到之後, 不單止冇幫佢, 重話佢浪費警力, 比假口供!! 佢話我哋爆格, 但係好明顯我哋係有key入屋囉!! 重笑佢唔係你諗人哋爆格就係爆格, e+阿sir睇到就唔係爆格, 亦唔覺得有刑事成份!! 呵呵~~ 之後阿sir問我愛錫嘅人, 重有d咩要攞番, 阿sir幫你盡量攞番.... 哈哈!!

結果...... 佢死死氣...... 就連身上著住嘅衫褲鞋都除埋出嚟..... 交還比我愛錫嘅人!! 大獲全勝!!!

雖然話大獲全勝啫.... 但係當然我愛錫嘅人根本唔係想得番呢d嘢啦!! 只係唔份氣佢重攞住佢d錢, 送比佢d嘢去招搖撞騙啫!! 其實物質又算得係咩哎!! 可憐我愛錫嘅人, 已經比佢搞到身心受創, 你話以後重敢唔敢相信人哎!! 唉~~ 呢d咁嘅人, 唔係話我新年流流都咒人, 真係希望佢比天收呀~~

~~~~~16項關於自己的事~~~~~

今朝開fb, 見到Niki tag咗我, 講有關佢嘅16樣嘢, 一睇佢講得咁好.... 咁我重有d咩寫呀!! 試吓啦.... 寫吓啦!! 隨便自己都可以了解番自己都d, 唔寫尤自可, 一寫... 發現自己原來都幾黑人憎... 不過又咁講.... 改到嘅我都改咗啦!! e+剩番嘅.... 我諗就係真嘅我囉!! 咁係衰格都冇辦法家.... 重改唔改?? 唔...... 唔會逼自己改囉!! 因為我覺得... 冇嘢比自己過得開心舒服更重要囉!! 係.... 改咗就會更得人鍾意... 不過.... 我要咁多人鍾意做咩啫!! 況且... 我又唔係做d咩傷天害理嘅事.... 只係把口衰d, 個人懶d啫.... 夾到嘅人就忍到家啦!! 夾唔到嘅人.... 你改咗一樣.... 佢又要求第二樣家啦!! 以下我關於我嗰16樣嘢... 大家睇吓啦!!

1.懶
關於我嘅嘢, 第一樣你哋必須知嘅就係懶
我嘅懶... 真係唔係人咁品...
我可以睇住家人 / 朋友做嘢... 而我都重Q埋對手
係... 我好忍得家!!
所以唔抵得我懶, 應該都唔會同我好fd

2.(論盡)
食嘢唔做嘢, 做嘢打爛嘢
呢個完全係我嘅寫照
做親嘢唔係打爛嘢就係整親自己
行路又仆街, 坐向到都會R柴
痛得滯重會當場暈倒添
所以我係一個極需要人照顧嘅人嚟家

3.傻得開心
唔知係未傻人有傻福...
成世人都唔知自己做咩...
又負負碌碌咁過得好開心
其實難題每個人都有...
但我會選擇開心積極咁面對佢
盡快解決咗, 就唔洗煩啦!!

4.眼淺
好鍾意喊, 係又喊唔係又喊
睇戲專搵喊戲睇, 唔喊唔收貨
試過套戲散咗場, 我重坐向到喊到走唔到
每次要我好嚴肅咁發表意見又會忍唔住
觀親禮都喊... 就算明明咋吓嬌扮喊
都唔知點解一喊就收唔到聲

5.怕悶
細個睇書話咩"熱鬧過後特別孤單"
睇嘅時侯覺得係偉論... 真係講中曬我心事喇
e+諗番... 只係定律啫... 唔洗廢up啦!!
我嘅怕悶係... 唔可以自己一個人
一個人食飯... 我視為堪苛
一個人行街... 我視為自閉
唔好... 千其唔好dum低我一個人呀!!!

6.對朋友幾(簡)擇
莫道你在選擇人, 人亦能選擇你~~
我好挑家!! 酒肉朋友周街係... 洗乜搵你呀...
要d真正傾到計, 會為對方計想嘅先可以做朋友
阿豬阿狗唔該行開

7.冇野心
支持共產黨, 支持做又36唔做又36
唔需要特別好, 旦求唔好係最衰就得喇
只要大家亙利亙助, 有時(sit)底少少都冇乜所謂喇

8.把口唔衰得
雖則話(sit)底少少唔緊要
但係口舌之爭, 就幾時都冇得讓囉
唔係唔想讓呀!! 係我成日把口都快過個腦
我老公成日話我講嘢好(掘)
d fd又成日話我把口賤
係家!! 冇得改家!!

9.見解精闢獨到
我把口唔收就頭先都講咗啦
但係又唔知點解...好多fd都會特登打嚟
問吓我各方面嘅意見
佢哋話通常我都會真係幫佢哋諗
然後比一個... 唔係一般人交行貨嘅意見佢哋
唔知咁算唔算係"好嘅傾訢對象"呢?

10.唔記仇/愁
由於唔鍾意諗嘢
基本上我冇乜煩惱
就算嬲人... 通常嬲嬲吓都唔記得嬲人d乜
所以好少煩過夜, 第二日就會冇事
如果你真係知道... 我到e+都重好憎你嘅話
咁應該係一世家啦
自己檢討吓罷啦!!

11.愛美
雖然我唔算係咩靚女
但一定唔係樣衰嗰班囉
所以除咗自己靚之外
見到d人醜都真係幾難頂
所以太醜真係做唔到朋友囉
有時真係覺得自己幾衰

12.Maths白痴
試過向卡拉ok玩計數,
玩到見暈要即刻走...
有fd笑我... "睇你平時個人都幾精哎, 一計算就乃曬嘢!!"

13.小手工
張張刀... 冇張利...
細個時好鍾意參加埋d興趣班
樣樣都要學, 學得一兩個花就收手喇
毛冷公仔, 中國畫, 低溫泥...
近呢兩年, 指甲成為我玩得最有恆心嘅一樣

14.注重倫理禮儀
入屋叫人, 入廟拜神
呢d係基本禮儀
如果連呢d都唔識好去死啦
咁大個人連唔該都唔識講
冇d家教... 失敗!!

15.好好好驚鬼
試過比鬼紮, 試過奇異事件
解釋唔到... 唔洗駁我...
所以睇鬼片唔洗預我
驚栗片ok
每逢七月梗係會整親... 好驚呀~~

16.目標
我個人由細到大都冇乜目標可言
選咩科... 唔知, 做咩工... 唔知, d錢成日洗曬去邊... 唔知,
通常今日都諗唔到下星期嘅事
試過最長遠嘅目標... 三十歲前嫁得出... 實現咗
現在積極儲錢中.........
目標係34歲前生仔

2009 Happy New Year~~~

各位Happy New Year呀!!! 尋晚去咗邊到倒數咁呢???

我哋尋晚就去咗Leo公司開Party, 嘻嘻!! 睇唔睇到呢張相呀? 其實嗰晚原先有一大包呢d飾物, 同bb之類嘅嘢, 不過因為有小朋友在場嘅關係, 好快.... 大部份嘅玩具已經爛曬, 哈哈!! 沙律見我係咁望住個皇冠, 就嗱嗱聲叫我影張相喇!! 小花公主同肥咗嘅禮服蒙面俠呀!! 哈哈哈哈~~~

不過倒數完, 我就同志雄&Emily落咗街食嘢喇!! 一嚟志雄個胃又唔係好舒服啦! 二嚟Emily又岩岩放工 (好彩佢趕得切嚟倒數!!) 三嚟d到會都凍曬, 我咁yim jim, 根本唔會食到囉!! 食完嘢, 上番去冇耐, 志雄就話都係頂唔住啦, 要走啦!! 唉!! 搞到冇得去之後個Party添!! 嘻嘻!! 不過算啦!! 反正都係諗住應吓節啫!!

一路行, 封曬路!! 沿途都冇的士!! 志雄話佢好肚痛, 個胃又好凍!! 雖然我唔明佢講咩, 個胃點樣凍, 但係睇到佢真係幾唔舒服囉!! 咁我就說服佢, 不如去買支藥油, 番屋企我幫佢搽吓, 應該會好d家!! 本來佢好憎藥油味嘅, 但到咗呢個時候, 都唯有聽話咩方法都要試吓啦!!

繼續行, 行到加連威, 都封咗路!! 但係竟然點幾喇, 重有舖頭未關都不特止, 重要係大閘蟹舖囉!! 乜會有人夜媽媽點幾兩點買大閘蟹o家咩?? 記得志雄有一次話食完大閘蟹, 都有試過話唔知肚定胃凍咁o家!! 結果又係夜媽媽唔知去邊到搵薑茶, 最後買咗意羅搞掂!! 當我哋正好出奇咁望住間大閘蟹舖, 突然比我哋見到, 有薑汁賣囉!! 唔好理啦!! 嗱嗱聲買定兩支看吓門口, 睇吓幫唔幫到佢!! 我估都有d用呱!!

結果番到去幫佢搽完油, 我就頂唔順訓咗喇!! 我呢個老婆真係冇用呀!! 老公病咗, 我幫唔到手都不特止, 重竟然自己訓著先!! 哈哈!! 不過, 我第二朝問佢有冇好d, 佢話飲咗d薑水好好多, 重話搽油都真係有d幫助, 咁我諗咁衰唔曬呱!! 嘻嘻!!!