唔想食飯, 唔想見到飯, 唔想諗起飯......

唔知堅定癲呢, 開始有唔想食飯, 嗅到都想嘔嘅感覺, 又覺得d魚好鯹, 成日都作嘔, 但係又唔係真係嘔得出喎, 講比人聽佢哋又唔明, 終於我諗到點形容啦!! 一講佢哋個個, 包括志雄都即刻明曬, 就係好似飲到好醉好醉, 醉到第二朝唔想食嘢, 但係個胃好囉囉嘍咁, 想嘔又嘔唔到, 真係想走去扣喉嗰種感覺囉!!

情意結

尋日又見啡, 驚得滯, Call咗阿珊陪我去廣華, 結果要留院觀察, 好彩醫生都係話唔洗擔心住, 等多排.... 睇吓bb有冇心跳先啦!! 約咗嗰期比我再照超聲波!!

今日, 志雄接我出院, 一出嚟就上的士, 買唔到炸雞肶, 佢話番到慈云山幫我買喎, 點知.... 佢好耐都唔番嚟, 我打比佢啦, 佢竟然話比我聽, 慈云山咁大, 咁多食市, 咁多大排檔, 咁多茶餐廳, 竟然冇一間有炸雞肶賣喎, 你話激唔激死人哎!! 真係有d唔開心囉, 人哋由細到大, 出親院, 媽咪都會買炸雞肶比我食家嘛, 唉!! 結果老公唯有買咗家香雞, 話等我滿足半個願望先喎!! 真係好掛住天龍呀~~

bb第一次影相

都係唔係好放心, 今日約咗阿珊公司個婦科做檢查, 哈哈~~ 阿b第一次影相呀, 唔知志雄見到開唔開心呢?!

醫生都係話我有少少作小產, 不過都唔洗咁驚嘅, 由於e+重未睇到bb心跳, 所以暫時都未算數家! 放開d心情先, 同埋岩岩撩過佢, 所以呢兩日可能都會有d分泌, 唔洗驚嘅!!

大家睇吓.... 下面呢個窿就係佢個囊啦!!

 

見唔見到下面呢張個囊入面有粒點呀, 嗰一點就係阿b啦!! 係未好神奇呢?!

 

已經證實咗....... 但係........

唉!! 年初四流流去咗急症室, 事關今日臨放工去Toilet發現, 好似有D啡啡哋嘅分泌喎, 今晚去姥爺屋企食飯時, 又有咁嘅情況, 咁我就同媽咪講啦!! 媽咪就話咁唔得喎, 就叫咗我上瑪麗睇醫生囉!!

哎!! 個醫生幾衰都有, 首先佢就話要同我照吓超聲波, 睇吓BB會唔會係宮外孕先, 咁都照到有個囊仔, 佢就應該唔會係宮外孕, 不過頭3個月其實都好唔穩定家, 呢d嘢真係講命家, 有就有冇就冇家啦!! 哎~~ 屌佢哎!! 佢究竟知唔知自己講緊咩家!! 真係痴痴哋家!!

跟住佢話可能係有少少作小產, 就寫咗一個禮拜假比我, 叫我休息吓囉, 但係又話唔洗訓床喎!! 有d擔心添!!

歡喜得嚟又有d矛盾.....

今日約咗媽咪、林林、Kobe去林林學校影畢業相, 佢哋班漏氣人更係又要我同志雄等佢哋啦!! 但係最大嘅問題係, 年初三條街又有咩行呢, 向又一城流嚟流去, 走入萬寧行吓啦!! ee~~ 驗孕棒做緊買一送一喎, 反正我又有d急, 不如試吓囉!!

點知真係中咗.... 吓!! 係真唔係呀!! 我同志雄講, 志雄話 " 都係時侯啦!!" 我就話, 但係我份工未過試用喎, 唔知有冇產假放喎, 志雄就話 " 哎呀!! 邊有人咁諗呢d嘢家?!" 唔知呀, 重之覺得好似心情有d矛盾咁囉!!

媽咪嚟到, 我細細聲話佢知, 佢都話 "吓! 唔係呀!" (佢唔鍾意我有bb時, 做指甲咁辛苦), 之後我又驗多次, 結果都係一樣, 我估應該冇錯呱!!

終於收爐.... 迎接新嘅一年!!

今日終於都收爐啦, 攰撚死我啦, 我已經幾個禮拜都冇放過假啦, 不過新年前就更係多客家啦, 呢個時候唔搵等幾時哎!! 但係真係好攰囉, 條腰骨已經好似唔係我嘅咁啦!!

岩啦~~ 襯新年放幾日假, 休息唔到個人都可以休息吓個心情哎嘛, 何況新年後番到公司, 除咗收利是之外, 我諗都有排hea, 新年邊個整指甲哎!!

好啦, 我都係時侯食團年飯啦, 向到同大家拜個早年先, 祝大家身體健康, 新年快樂啦!!