渡蜜月第七天~札幌

今日係最後一日同D團友一齊啦! 一朝我哋就去咗狸小路, 嘩! 個個癲咗咁買手信囉! 雖然我哋唔洗買好多手信比人, 但係都唔執輸買咗一箱! 嘻嘻! 由於時間冇多啦! 我哋又要行地下街, 又要行上面鋪, 嘩! 好忙呀! 結果志雄見到件皮褸都冇時間諗買唔買就要走啦! 不過唔緊要啦! 反正我哋呢幾日都會向扎幌, 到時行多次未得囉! 嘻嘻!!

離開咗狸小路, 我哋同d團友食埋最後的午餐就分手喇! 向分手時, 落緊好大好大嘅雪, 佢哋就上旅遊巴, 重同我哋揮手揮到唔見我哋為止, 哈哈! 跟住我哋就要自己搭的士番我哋事先向香港book嘅酒店check in喇! 嘩! 大雪到咁! 都唔知點算! 又攞住咁多行李, 點截的士呢! 狼狽到呢! 終於上到車喇, 又塞車! 本來導遊話唔洗跳錶嘅路程, 跳咗幾嘢囉!好啦! 落車啦! 間酒店係冇停車處嗰囉! 架的士就咁向馬路到停, 我哋就要冒住大風雪, 將d行李由馬路拎番入酒店, d雪係咁打埋嚟真係好痛o家!

入到酒店, ee...又幾先進喎! 重有免費上網添, 好過之前幾日嗰d要錢啦! 上到房, ok哎! d人成日話日本d酒店出名細, 6百幾蚊我亦唔expect有d乜咁好! 但係我真係覺得好好喎! 又干淨又近JR, 重想點呀!!!

拾好嘢之後, 我話即係要出去啦! 點知志雄話落咁大雪點出去呀! 我唔理死死要出去, 咁我哋就決定過對面JR站買定聽朝去登別嘅車票先啦! 搭lift落到最低層, 噢!!原來係地下街嚟o家! 呢到又有嘢食, 又有嘢賣, 真係落大雪都唔驚冇嘢行呀! 沿住地下街行就可以去到JR站喇! 摸熟路, 聽朝起身又唔洗搵啦! 呵呵!!!

e+買飛真係好簡單, 因為原來JR站入面d著紅色制服嘅姐姐係識多國語言o家! 話咁快佢就幫我搞掂曬! 我哋只係買咗單程飛, 因為聽日約咗嗰pair都係stay嘅團友向登別, 佢哋會揸車車我哋番嚟!

買完飛, 真係時間岩岩好, d雪停咗啦! 我哋真正二人世界嘅旅程開始啦! 其實我同志雄除咗澳門之後, 都冇試過自由行嘅, 次次去旅行就算自由行都係同d熟路嘅朋友一齊去嘅, 所以今次又有d探險feel, 哈哈!! 就係咁我哋就揸住張地圖去搵我哋嘅第一站 "時計台" 啦!! 呵呵!! 我哋d方向感咁好, 當然冇問題啦!!! 你哋睇吓幾靚, 不過入到去其實又冇乜嘢好睇囉! 嘻嘻!! 係影吓相咁啦!!

行完時計台出嚟冇耐, 我哋就見到一間叫味之時計台嘅拉麵鋪喇, 我睇書都有介紹過o家! 不過都未肚餓, 我哋重要趕住去電視塔呀! 嗰日去到都冇時間上去睇吓, 今次終於上到去喇, 不過都冇咩特別啫! 重鬼死咁貴添o家! 唉! 最靚就係望大通公園嗰邊, 成條街都係d好靚嘅燈, 同埋大通始終都預備緊雪祭, 未有咩睇, 我諗如果到下個禮拜雪祭肯定重靚呀!

好啦! 真係肚餓啦! 我哋去番酒店對面個商場, 搵書仔介紹嘅札幌共和國, 嗰到入面有各式各樣嘅嘢食, 重有好似博物館嘅地方比人影相, 每個月重有比賽, 睇吓邊間生意額最高, 最好食, 哈哈! 一場嚟到, 我哋更係食最好食嗰間梅光軒啦! 嘩! 真係唔係浪得虛名呀! 可以用正到爆嚟形容囉! 差d連湯都飲曬呀!!

食完嘢, 鬼死咁飽, 更係行吓個商場啦! 不過其實d鋪頭都收得7788啦, 所以我哋去咗間機鋪, 嘩!! 原來日本人影貼紙相, 係可以換衫o家! 重有制服啦, 卡通服...... 好搞笑囉! 之後竟然比我哋見到一部夾公仔機, 係夾傻豹嗰囉! 不過都未夠勁呀! 最勁係志雄竟然唔洗d工作人員將隻公仔放埋洞邊, 一嘢就夾到佢出嚟, 睇吓睇吓~~ 係隻粉紅色豹紋傻豹呀!! 呵呵!!

今晚要早d訓先得, 聽朝一早要早起身呀!! 如果唔係趕唔切班車啦!! 好期待呀~~~

渡蜜月第六天~札幌

今日行程都算幾豐富, 首先一早我哋就去咗玩雪上電單車, 嘩! 終於都有得玩啦! 哈哈! Jofee問我, 我哋一齊玩定分開揸呀?? 開頭我都諗住一齊嘅, 咁我又唔識玩, 無謂洗d咁嘅錢啦! 點知去到d人又話好玩, 又話一場嚟到咩都要試吓! 唉! 好啦! 就分開玩啦! 嘻嘻! 好緊張呀!

入到換衫房, 個個著到隻糉咁, 哈哈! 好好笑呀! 我哋重特登帶曬口罩, 驚一陣d雪打埋嚟會打到塊面好痛o家嘛! 上到車, 雖然個教練講到好似好易, 但係唔知點解我都重係好驚呢! 好啦! 真係要開車啦! 挑! 慢吞吞一架跟一架, 無癮! 點知...話口未完~~上山啦! 嘩! 勁多彎囉! 控制個軚盤要好用力o家, 搞到我兩隻手都痛埋! 個口罩又困實曬d口氣, 搞到個眼罩都起曬霧氣, 唉! 真係罷鬼呀! 除咗佢重好呀! 好彩終於上到山啦, 嗰到有個大空地比我哋勁飛, 由於係大空地, 條路又闊, 我就試吓啦! 初初都有d驚o家! 玩玩吓個心就開始紅喇! 我不單止踩盡咗個油門勁飛, 重要趴你頭囉! 哈哈! 好好玩呀!  

再嚟, 我哋就繼續上上落落, 又去到一個空地停咗落嚟, 導師派咗d熱朱古力比我哋飲, 飲咗兩啖後, 邊到重有心機嘆落去哎! 更係落部相機出嚟係咁影啦! 你哋睇嗰到d雪幾深, 最深我重行到上Pat添呀! 哈哈! 真係過癮o家啫! 哈哈! 不過...向嗰到我哋跌咗張2GB卡呀! 唉! 走咗先發覺, 好彩嗰張卡未影相o家咋! 如果唔係~~~我會殺咗志雄囉!

離開咗電單車埸之後, 我哋就向咗白痴戀人出開喇!由於白痴戀人個唔知幾多周年版個嘗味日期出咗事, 好似搞到好大件事呀! 所以我哋只可以向門口影吓相, 不過其實咁都好哎! 反正我哋興趣都不大! 其實門口都幾多嘢影哎, 好似呢d小屋咁, 入面真係有枱有椅o家! 即刻咁起如果細個玩煮飯仔嘅時候, 有呢d屋仔就好啦!!

哈哈! 終於都到小樽啦! 一嚟到就自由活動啦! 我同志雄去食咗碗好難食嘅拉麵之後, 就過運河嗰邊影相喇! 超! 你哋睇吓條運河似乜, 唉! 成門河都靚過佢啦! 唔明點解咁都叫名勝囉! 拿拿聲影幾張相, 閃!!!

大家睇吓, 今日得-2.3度咋! 凍到我呢! 嘻嘻! 我真係好怕凍o家!!! 一場嚟到小樽, 又點可以唔同呢個蒸氣鐘影張相呢! 跟住就懷著襯熱鬧嘅心情入咗嗰個好似話咩水晶音樂城呱, 其實我本人呢, 就唔係話唔鍾意音樂盒嘅! 不過咁多年嘅經驗話我知, 冇一個音樂盒我係會放出嚟嗰囉! 冇謂洗d咁嘅錢啦! 不過呢到可以自制自己鍾意嘅音樂盒o家! 我重見到有個Display整咗Donald Duck添! 都幾得意o家! 不過Jofee都係話唔整啦!

出咗音樂城, 見到門口又有d細細隻嘅雪雕, 重要係龍貓添, 幾得意!! 最搞笑嘅係, 我見貓巴士隔離有條小滑梯, 雖然細細條, 但係我諗住向到扮sir咁影張相, 點知真係sir咗落地囉! 哈哈!

之後我哋就趕咗去銀之鐘飲咖啡啦! 點解?? 因為向銀之鐘飲嘢, 係可以選Hello Kitty杯飲o家! 重有好多款選添! 飲完之後, 隻杯重可以洗番乾淨拎走, 我就選咗呢隻喇, 可以帶番去比沙律做手信, 一舉兩得! 哈哈! 飲完嘢, 我哋上咗餐廳嘅3樓, 嗰到有d 薰依草嘅bear bear熊賣, 尋晚收到沙律個email話想要, 不過呢到賣得都幾貴, 所以我都冇買到, 睇吓第二到有冇得賣啦! 呢到重有個露台, 我哋又出咗去影相, 見到人向到整雪人, 哦!!! 原來整雪人係要加水o家! 怪唔得知我上次整唔到啦! 哈哈! 又學多樣嘢喇!! 咁岩落到樓又比我見到有個整好咗嘅雪人喎! 哈! 影返張相先!!

向銀之鐘搞咗咁耐, 出到嚟個天都開始黑喇! 哈哈! 呢到真係快天黑! 我哋又要趕頭趕命啦! 去邊??? 嘻嘻!! 趕住去食六段雪糕囉! 嘩! 好大杯呀! 我哋兩個叫咗一杯兩份食, 嘩! 隻隻味都咁好味o家! 其實重有好多得意嘢, 好似有條腸, 串到好似支波板糖咁, 都不知幾棧鬼! 係時侯番旅遊巴集合啦, 沿途我哋重見到有日本電台添, 嘩! 幾大間!

今晚我哋嘅晚飯係食燒烤, 呢到重有部綿花糖機比我哋自己整嚟食, 好好玩呀! 不過原來都冇想像中咁易整落支竹到o家! 食食吓, 出面突然落起大雪嚟! 嘻嘻! 呢幾日都係落細雪, 都影唔到相嘅! 哈哈! 我哋即刻放底碗筷出去影相啦! 容乜易食完飯佢就停o家! 哎!! 同場重加演咗一件好搞笑嘅事, 就係......大家知我哋食緊燒烤啦! 咁都有煙o家嘛, 咁我哋就坐窗口位啦喎! 窗邊有個制上面寫住漢字"排煙" , 有個團友見到, 就按嗰個制啦! 我就向到望吓佢做乜, 佢話原來有得排煙o家! 我正想跟住按, 突然上面隻窗開咗囉! d雪係咁飛入嚟囉! 重要唔係飛落佢張枱, 而係佢隔離將枱囉! 嗰張枱d團友即刻灰曬! 食食吓飯都唔知做乜, 哈哈哈! 笑到我哋癲咗! 好彩我未按制啫, 如果唔係比人笑埋一份呀!

渡蜜月第五天~函館-札幌

今朝第一站就去咗昆布館, 入到去有個好似太空館天幕影院咁嘅地方, 睇嗰d咁嘅片, 有乜好睇哎! 睇咗一陣我同Jofee都頂唔順, 就走出去行吓算啦! 話明昆布就更係聲聲地o家啦! 哈哈! 不過又幾得意個喎! 佢有個用昆布做嘅喇叭呀! d音色都唔差o家! 雖然我自己都鍾意食昆布, 但係我一d都冇買喎! 而且Jofee都唔食嘅, 得我一個邊食得曬喎!

跟住我哋就去咗大沼國定公園, 唔知係唔係就黎雪祭呢, 周圍已經好多冰diu啦! 我重嘗試整吓雪人添, 不過都整唔到嘅, d雪一攞上手就會散o家啦! 哈哈! 本來呢到有雪上電單車玩o家! 不過導遊話呢個場好危險o家, d雪低下係個湖嚟o家! 都係留番聽日先玩啦!

午餐啦! 哈哈! 終於等到啦! 我哋終於要去海鮮市場啦! 好開心又好興奮呀!睇吓睇吓! 幾大隻長腳蟹! 我哋重叫咗馬糞海膽、帶子、甜蝦、北寄貝、拖羅...... 嘩! d海膽好食到呢! d帶子肥到呢! d拖羅向個口到溶呀! 重有一樣嘢係d團友教我哋o家! 就係d北寄貝要夾起達吓佢, 先有咬口o家! 真係睇到佢變身縮吓縮吓o家! 好得意o家!

跟住我哋就向住札幌進發啦! 我哋去咗Sopporo啤酒廠, 你哋睇吓, 門口重有心心冰diu比我哋影相添! 襯曬我哋honey moon呀! 呀! 入面d啤酒又真係幾好飲喎! 重有好多款選擇添! 好彩我哋趕時間, 如果唔係分分鐘飲得重勁! 不過可惜哎! 我哋去得太晚啦! 食唔到啤酒雪糕! 真係有d唔高興呀!

之後我哋就去咗快行電視塔, 由於係快行啦! 所以都冇上到塔頂, 唔得! 到自己留向到嗰幾日, 我自己一定要再嚟! 呢到重岩岩就向大通公園隔離, 不過大通已經準備緊雪祭, 所以根本入唔到去, 但係氣氛都ok囉!

晚餐又係好勁嘅, 食禾牛同鮑魚, 嘩! d禾牛滑到呢! d鮑魚重分兩種食法添! 有燒同火煱兩種, 不過我都係鍾意食燒多d, 事關香口d嘛! 今日真係豐富呀! 飽得我呢! Jofee重走去影埋燒鮑魚過程嘅video添! 幾搞笑都有呀!

食完晚飯d鋪頭都關曬啦! 得番d食市, 更係啦! 話曬呢到都叫薄野不夜天嘛! 我哋重入埋拉麵街影相添呀! 不過今晚真係太飽啦! 真係食唔落囉! 都係番酒店早d訓好d啦! 點知行行吓又見到街邊檔喎! 嗰個婆婆真係好世利o家! 見我哋影相, 即刻行出嚟阻住個檔, 咁我哋唯有幫佢買碌粟米囉! 佢呀! 原來重識講廣東話添o家! 你睇佢重笑笑笑! 陰濕!

渡蜜月第四天~青森-函館

今朝一早我哋就去咗奧入瀨溪流, 未去到停車處之前, 沿途已經可以見到全部都係雪, 襯起d湖呀, 流水真係好靚！到停咗車, 我哋即刻落去係咁影相, 嘩！d雪好高呀！今日可以話係第一日真真正正咁踩雪，我哋都唔理得咁多啦！著起條滑雪褲就衝落去啦！都幾危險o家！哈哈！不過咁靚唔影多幾張相邊得呀！哈哈！我重驚唔記得奧入瀨咁難記嘅名, 特登買咗罐咖啡要嚟影張相, 上面有寫住奧入瀨o家！幾低能呀！

之後我哋重去咗姚子瀑布同云井瀑布, 不過你哋睇吓條瀑布細條到, 有d重結曬冰添！其實都冇乜嘢睇, 不過向呢個時候, 前面好似發生d嘢喎！唔知咩事呢！重知d車就停曬向到啦！咁我哋就唯有又係咁影係咁影囉！

 

跟住就去到十和田湖喇！嘩嘩嘩！靚到呢！同尋晚嗰個溫泉比, 真係靚實在太多啦！哈哈！真係冇令我哋失望呀吓！你哋睇吓圍住個湖d山舖曬雪幾靚！個湖重大到好似個海咁呀！行船完全冇問題！等上海d人重覺得個黃浦江懶巴閉咁, 人哋個湖都大到咁呀！行行吓, 我哋重見咗一群天鵝添呀！不過呢, 呢到真係好大風好凍呀！嗱嗱聲影完相, 入番室內食番個火鍋先！

好喇！又係時候起程啦！今次我哋就由青森去志雄最最最期待嘅函館, 函館出名夜景靚！係全球三大夜景之一, 講到好似好勁咁！香港夠係3個入面其中1個啦！我又唔覺好靚喎！都唔知d人成日嚟香港睇d乜！好！又即管睇吓你有幾靚！點知！嘩！一上到去我即刻嘩囉！好靚！真係好靚呀！好似一幅著咗燈嘅地圖咁！人哋嗰d先叫靚囉！香港真係差9皮呀！不過由於我哋部相機新買, 重未好識點影夜景, 所以d相都唔係影得好靚！重搞咗好耐添！但係呢到凍到呢！凍到我哋睇咗一陣就頂唔順, 落番下一層啦！

哈哈！番到酒店, 我又搞自己個頭啦！今晚係春麗頭, 平時向香港諗都唔敢諗整呢d頭呀！哈哈！今晚浸個溫泉都好有feel, 有d假石圍住我哋, 最衰啦！最後一晚浸溫泉啦！佢都唔落雪，唉！真係冇緣呀！唯有寄望下次啦！浸完溫泉沖曬涼, 我哋就去食宵夜喇！本來想試吓導遊介紹嗰架巴士拉麵o家！係向架巴士入面食o家！不果出到去行咗兩轉都唔見巴士出現, 可能巴士司機冇開工啦！結果我哋就去咗一文字喇！都唔錯哎！