呢排番工真係好忙, 又要上facebook古惑仔online升級, 又要睇吓d人有咩update, 又要msn, 又要上網睇奧運, 又要睇吓馬仔有冇upload咩新圖, 又要上tvb.com睇家好預告同佢哋d blog, 搞到d台劇都追唔切!!
講開家好個blog, 初初睇真係覺得好無聊囉!! 每日做完一集之後, 佢哋都扮曬真係有呢個人咁, 向上面寫blog, 又真係有人回應嗰下先好笑哎嘛!! 但係睇睇吓, 有時佢哋講d嘢都幾好笑o家!! 尤其係Sa姨呀, 事關之前一晚睇完佢比人屌, 比人打, 再睇佢d心聲, 真係想笑出嚟!!
以下係佢今日寫嘅blog, 有一句跳跳跳, 跳死咗, 真係笑到我呢!! 嘻嘻!!!
網誌日期: 2008-08-14
今日想同大家分享一個故事：白雪公主喺一個富裕嘅城市入面一個唔係咁富裕嘅家庭出世。皇后死得早，好彩父王同姐姐都好錫佢，童年生活幾愉快。大個左之後，佢試過幾次遇人不淑，最後終於搵到一個深愛嘅王子，為咗佢，白雪公主甘心離開自己嘅家人，去到陌生嘅歐洲小城生活。
白雪公主同王子生左個女，每日嘅生活，除左湊女之外，就係幫老公手打理小生意。好快過左十幾年，白雪公主個女亭亭玉立，生意亦都越做越大。本來白雪公主覺得上天對自己都算係咁，點知有一日返到屋企，見到個後生女，不過佢唔係白雪公主個女，而係王子嘅情婦！
白雪公主心都碎埋，唯有返番去老家啦。白雪公主同屋企人十幾年冇見，感情有啲生疏；同班姨甥仔女都唔係咁夾，佢地仲成日頂撞白雪公主…不過白雪公主覺得一家人唔應該咁計較，諗住「以德報怨」，對佢地多啲關懷。點知佢地以為白雪公主出賣佢地，父王嬲到成個湯殼扑落白雪公主個頭度，白雪公主姐姐仲鬧足白雪公主成餐飯…
咩話？你地覺得個故仔熟口熟面？梗係啦，「白雪公主」咪即係我鍾笑莎囉！
點解我要寫呢個故仔？唔通一把年紀仲幻想自己係白雪公主？
錯錯錯！我咁寫係為左提醒自己，而家普遍流傳嘅《白雪公主》，只不過係呃細路嘅故仔！話白雪公主「以德報怨」，同王子結婚之後，原諒左害佢嘅繼母，只不過係格林兄弟為左提高銷量，足足改左七次嘅版本！
喺初版格林童話入面，白雪公主邀請繼母參加佢同王子嘅婚禮，特登準備左一對燒紅左嘅鐵鞋，逼佢繼母著，熱到佢繼母係咁跳跳跳–跳死左！
證明喺童話入面嘅人物都唔會以德報怨，何況係現實世界？
我今次係自己攞嚟衰，抵死嘅！
所以只此一次，下不為例。
沒有留言:
張貼留言