好緊張呀！唔知得唔得嘅呢！

18/3/07星期日~~沙律突然話同我去婚紗展，去到都成6點喇！

入去前我同佢講，時間冇多~~今日我哋主攻睇衫，務必要選到一間租婚妙同晚裝嘅！點知一入到去，個埸今次得咁細嘅，重要冇乜嘢睇添！話曬人哋嚟過咁多次婚紗展，第一次自己買飛o家嘛，如果得咁少嘢睇好唔抵喎！但係都冇辦法o家！

冇乜衫睇...有d失望...唯有退而求其次睇場地佈置啦！坐低聽佢講咗九廿幾樣嘢，都係諗吓先，始終唔係咁急，唔洗咁快決定啫！跟住我哋經過一間做請帖嘅，都幾靚o家，不過當然價錢都相對......同佢傾咗陣先知原來Hall 2重有o家！哩哩啦啦兩條友即刻上Hall 2啦！Hall 1都冇嘢睇，真係激死呀！浪費曬我d時間，8點關門o家啦嘛！當然~~~上Hall 2嘅同時，我哋都不忘去攞咗贈品先啦！哈哈！我哋重一人攞咗兩份添呀！咩呀？唔係我哋貪心呀！係派贈品嗰個人話見我哋笑得咁開心，比多份我哋咋！哈哈！擺明係因為我哋靚女啦！哈哈哈！

上到Hall 2，咁先至係o家嘛！人~~都多d啦！行咗個圈，花多眼亂，都唔知點好！沙律就話喇~~不如睇吓呢間裙褂舗啦！哈哈！我哋兩個重即埸試人哋d褂上身添呀！試嗰陣幾多人望呀...唔知係因為我哋演繹得好哎，定係因為覺得我哋低能呢！不過我哋都好少理，話曬第一次可以試到褂上身嘛，更係互相笑餐飽先啦！話時話襯牛仔褲都幾好睇嗰喎！

好喇！終於~~我哋睇緊一件幾Os嘅婚紗嗰陣，比一個貌似周文琦嘅Sales請咗入去睇相，嘩！都幾得o家~~d婚紗！重有d禮服都幾靚仔o家！起碼一d都唔會似魔術師先啦！個package可以選5套衫，計吓先一套禮服志雄嘅，一套晚裝沙律嘅，我自己就一套婚紗，兩套晚裝，沙律叫我唔好換咁多件晚裝喎，唉！我都唔知呀，再諗吓先啦！話曬呢間只第一間睇嘅，無理由唔睇埋其他先啫，咁佢就更係係咁sale啦！又話比優惠我又剩啦！咁我同沙律更係唔會放過勁r佢啦！後未重叫埋經理出嚟比我哋r添！哈哈！最後...送一次免費轉款啦！免費租用兩套頸鏈啦！九折升級轉換手飾啦！重向Package內加多一套禮服添！哈哈！可以比伴郎著都得喎！咁又真係幾吸引嘅！終於都係比錢啦！都好~~起碼又搞掂一樣嘢！

今日我會打電話去約日子選衫，哎！好緊張呀！

 

唉！都唔知要挨到幾時！

呢排差唔多日日OT，唉！未就係計嗰份死人大陸糧囉！計佢哋d乜Q春節補貼呀(工半、雙工、三工)！佢哋就好啦~~有OT！難為我哋呢d做到2:30am，冇OT，冇餐食，都好今次2點幾有的士搭！上次12:26am都冇呀！簡直係收買人命呀！

唉！可能係自己去意已決啦！e+好似睇咩都唔順眼咁！但係我又想搞到工先走喎！唯有繼續死撐啦！你估要搵份又番中環，又五日工，又好人工嘅工咁易o家！唉！都唔知要挨多幾耐！不過，我已經下咗決心就算真係搵唔到，9月都會辭工！搵住part-time搞結婚，等結完婚之後就搵九龍工！唉！希望唔洗真係等到9月啦！我真係覺得好淹悶呀！

老翁擋車護盲妻腦幹死亡 貨車疑違例轉彎肇禍

【明報專訊】荃灣昨早發生的一宗車禍，演繹了鶼鰈情深的真意。

好感動呀！但係志雄話咁係正常喎！我就唔同意喇！

希望個公公快d好番啦！

唔知係睇化定心淡呢？

呢排日日返工都好似受罪咁，唔係有d咩事，不過就好冇mood囉！肥狗黑人憎就更o家啦！其他都冇乜嘢啦！但係就硬係唔開心囉！覺得好悶，個氣氛又淹悶！？咁樣持續落去都唔係辦法！

先日攞日病假，好似過五關斬六將咁，洗唔洗呀！嬲嬲地send咗兩份CV出去，點知尋日已經有電話打黎約Interview啦喎！嘩！有冇咁快呀！唔通出面真係咁好景，不過唔理啦，都諗住走啦！都係時候走啦！如果e+唔走，就要等到結完婚先走得家啦！唔係嘅話，邊間公司比你番得兩三個月工，就請假結婚渡蜜月呀！

我已經同Michelle講咗啦！雖然唔係話正式辭職，但係講咗比佢聽，等佢有個心理準備嘛，話曬我一走，最受影響就係佢啦！佢？？更係唔想我走啦！都係講埋嗰d，比多d時間睇吓先啦！跟住落黎我哋有d咩發展，又可以學到好多嘢！又點又點啦！我心諗~~e+都做到PK啦！重學？！你估我真係上進小寶寶呀！但最後我都係同佢講，星期一份工我就見硬o家啦！得就唔洗講啦！唔得就做住搵啦！咁向我搵到之前，我會再試吓O唔OK囉！不過就算我e+唔走，出年我都走o家啦！

其實呢間公司真係唔差，e+我做過咗3年，重有17日大假添，人工都ok喎！d同事都好好，有咩就鬧曬出黎，唔會玩陰濕嘢嘅！不過我就係同個HR Manager唔啱囉！咁唔啱就咩都有問題o家啦！唉！e+都唔諗啦！橫掂有份工向身，慢慢搵啦！唯有係咁啦！