有囝有囡萬事足: 10月 2010

2010年10月31日星期日

又試新Apps啦!!

今日無無聊聊, 媽咪又未到, 試吓Kobe上次叫我download嗰個Apps嚟幫小春影相先, 點知... 都幾難控制喎!! 唔係好用到囉~ 到最後... 只係得呢兩張留底, 其他嗰D都唔知想點, Delete曬Lu~~

等我得閒搵多D唔同嘅Apps幫小春影相先!! 哎~~ 好緊張呀!! 唔知有D咩呢?!

2010年10月30日星期六

爸爸買比小春嘅第一件衫仔~

呢件就係爸爸買比小春嘅第一件衫仔啦!! 哈哈~~ 唉!! 我幫小春精心挑選嘅第一件衫仔, 出院嗰日冇影到全身相添!! 唉~~ 不過唔緊要啦小春, 媽咪會將呢兩件衫衫留番, 比你第日留念都好哎嘛!!

小朋友~ 咩事咁煩躁呀?!

2010年10月29日星期五

表姨嚟睇小春呀~

今日豬豬表姨放工上嚟睇小春, 嘩! 佢好似真係勁鍚小春咁喎!! 更係啦... 佢覺得同小春好有緣可以同月同日生嘛!! 咁又係嘅, 比我開口中曬, 又會真係同佢一日都有嘅!! 哈哈~~ 佢重話已經諗好咗, 出年生日可以借幫小春慶生嘅名義, 圓自己嘅心願, 就係向麥當勞開生日會喇!! 哈哈~ 都好哎!!

一嚟到佢就係咁同小春影呀影呀影咗好多相呀!! 不過我都未攞番D相添!! 下次一定要記得先!! 睇吓小春同表姨影相個樣幾搞笑!!

2010年10月28日星期四

番屋企啦!! 我同bb終於番屋企啦!!

今朝一早, 醫生嚟睇過bb, 話佢面黃ok冇超標, 可以跟媽咪番屋企啦!! 晏咗d, 又有人嚟帶咗小春去做聽力測試, 嘻嘻~~ 我哋小春又過一關啦!! 又有人嚟幫小春打卡介苗, 嘩!! 打針喎.... 佢竟然就咁哼哼咗兩聲咋, 喊都冇喊過呀!! 我心諗... 仆街啦!! 有咩難搞得過唔怕痛嘅小朋友哎!! 大獲~~

等緊出院嘅時候, 又要做嗰個產後抑鬱嘅心理測驗, 有個姑娘走埋嚟問我, 點呀! 點解你攞咁高分嘅, 你係未有咩唔開心呀?! (當時我同bb換緊我一早幫佢準備嘅第一套靚靚衫, 不知幾開心!!) 冇喎!! 我只係有d緊張, 有d驚bb食唔飽啫, 不過尋晚都補咗一次奶粉比bb, 起碼佢唔會一d嘢都冇得食先啦!! 跟住姑娘話, 睇你同bb玩得咁開心, 都應該冇嘢嘅!!

下午, 媽咪同志雄嚟接我出院, 臨走時媽咪話要同bb講 "bb, 跟媽咪番屋企啦" 咁樣一路講到上車, 到番到屋企門口又要講, 直至講到番屋企, 都幾得意!! 點知番到屋企, 一同bb換片片, 吓!! 點解會咁家?! bb條片到有血嘅?! 咁究竟佢係尿道炎哎? 定係我之前抺得太大力, 整親佢呢? 咁點算呀?? 媽咪話即刻打去健康院問啦!! 又好彩健康院只係向我屋企對面, 嘻嘻!! 姑娘比我哋即刻落去睇, 咁媽咪同志雄就帶咗bb去睇醫生喇, 去到.... 姑娘都比佢哋嚇一跳, 點解佢哋會咁快到家?! 哈哈~~ 佢哋重幫我約埋覆診時間添!! 真係做到嘢呀!! 嘻~

結果, 醫生話原來佢係嚟M呀!! 吓.... 嚟M?? 係呀!! 原來係話咩我傳比佢嗰喎!! 真係搞鬼呀吓!! 嚇死人呀!!

睇吓豹豹幾鍚小春!!

2010年10月27日星期三

一日人仔咁大個嘅!!

尋晚, 志雄攞完薑飯比我走咗之後, 我打咗個電話比媽咪, 因為沙律去咗旅行, 所以佢上咗去訓, 嘩!! 佢同豬豬都好似情緒好高漲咁喎!! 哈哈~~

傾完電話, 食咗大半碗薑飯, 嘩!! 勁辣囉~~ 可能係終於身心都放鬆曬啦!! 有d唔知應該做乜嘅感覺, 下身痛楚依然, 又訓唔著喎!! 過咗一陣間, 姑娘就送咗bb過嚟比我啦!! 重教我點餵人奶添!! 一抱起bb, 第一個感覺係.... ee~~ 唔係我想像中咁軟林林喎, 我一d都唔驚抱佢, 至於比bb啜嘅感覺.... 好難形容, 但係子宮收縮就真係幾痛囉!! 姑娘行開之後, 我先真正望吓我bb, ee~~ 真係d輪廓出曬嗰喎!! 檢查吓佢d手仔腳仔, 佢哋話好似我喎, 似咩?!

眼光光望天光,重要岩岩5點幾嗰轉夜奶,小春唔肯食! 重話要等一陣再餵過,咁即係真係唔洗訓啦!

又到中午探病時間啦!! 志雄, 99同家姐都有嚟睇我, 重攞咗嘢嚟比我食添, 但係我好似有乜胃口咁, 先知原來我係嗌破咗個喉嚨, 食嘢時會覺得好辛苦, 又攰呢, 個人都冇乜食慾!! 不過佢哋話bb食人奶, 我唔食嘢.... bb又點會有營養呢!! 咁又係.... 咁唯有飲多啖湯啦!!

下午, 不停飲住媽咪一早買定比我嘅葡萄適, 因為聽Fanny講飲葡萄適會幫助上奶喎!! 咁我未勁隊囉!! 我都唔知有冇幫助家!! 都有d擔心bb唔夠食, 不過姑娘話佢e+只係食粒豆咁多都夠飽家啦!! 多d留意佢大小便情況, 就大概知佢飽唔飽, 如果唔夠姑娘會叫我補奶粉喎!! 咁我放心d先啦!!

飲得嘢多就自然去得多啦, 一落地先發覺, 嘩~~ 行動有困難囉!! d盆骨呀, 腰呀, 腳呀都重係勁痛囉!! 去toliet又鬼死咁煩啦, 咁痛重要坐冇影櫈, 重要搵噴壺清洗!! 最大問題係.... 我失禁囉!! 姑娘話唔緊要嘅, 做多d盆康運動就得家啦!! 唉~~ 我都知, 不過唔知要幾耐先好呢?!

到夜晚嗰轉探病時間, 志雄, 媽咪, 林林 & Kobe, 豬豬, Hedy & 滯都有嚟, 你一言我一句, 話bb似呢個似嗰個, 平時人哋d bb我都好多意見, 唔知點解到自己個bb, 一d都睇唔出, 似邊個呢?! 好迷!!

估唔到, bb第一封利事竟然係Hedy姨姨封嘅囉!! 多謝Hedy姨姨~~

2010年10月26日星期二

2036傻妹春子

痛死我啦!! 痛咗足足42個鐘先生到阿春妹出嚟, 真係痛死媽媽啦~~

話說25號零晨點零兩點入到醫院, 當時大約10分鐘痛一次到啦, 都幾痛家!! 上到侯產室, 駁機聽完BB心跳& check我子宮收縮情況之後, 就見紅喇! 一見紅, 我就變咗5分鐘痛一次啦!! 成晚根本都訓唔到!! 隔離床個女人又嗌到癲咗!! 我心諗... 我又5分鐘痛一次, 佢又話佢5分鐘痛一次, 點解d姑娘理佢唔理我喎!! 我都好痛o家!! (當然我唔知之後係想像唔到咁痛啦!!)

到差唔到天光啦, ee.... 我好似有d舒緩咗喎!! 變番10-15分鐘先痛一次!! 死啦~~ 咁即係點呀?! 醫生嚟到一摸, 一句未得呀!! 我就比人轉咗去產前唔知乜Q房嗰到等!! 上到房, 嗰到當時有兩個女人, 同我一樣都係大概10-15分鐘痛一次咁上下啦!! 點知.... 未到傍晚, 佢哋兩個都比人轉番去侯產房嗰邊等生啦!! 唉~~ 咁我呢?!

又有一個女人上咗嚟同我同房, 佢好似唔係好痛咋喎, 重走嚟走去添!! 到6:00pm啦, 志雄同媽咪嚟睇我啦!! 呀~~ 我又開始10分鐘痛一次啦, 志雄幫我計時, 真係好準時嗰喎, 重要開始比之前更痛, 痛到... 坐又唔係, 企又唔係, 尾龍骨啦, 後腰啦, 盆骨啦, 恥骨啦, 基本上... 下身成組嘢都向到痛, 痛到我要用手腳一齊撐起自己囉!!

9點到啦, 我同嗰個女人都變咗5分鐘痛一次啦!! 我哋望住個鐘, 又互相望吓對方, 佢問我點呀, 係未叫得姑娘啦? 我話姑娘話要5分鐘痛2次先叫佢喎!! 就係咁.... 嗰晚我哋一訓著就痛醒, 大概係每5分鐘痛半分鐘咁上下啦!! 我本來 i 向張床到訓, 訓訓吓都唔得, 要落地搵張椅坐, 一痛嘅時候就要用盡全力企起身, 跟住再禁住張床慢慢坐番低!! 嗰個女人好似好忍得咁ar都冇ar過, 我就真係忍唔到, 開始發出呻吟嘅呼叫聲!!

終於又天光啦!! 醫生嚟巡房啦!! 點知.... 佢竟然話我2度都未到囉!! 我個心直頭係死曬呀!! 我問姑娘... 我真係好痛呀!! 幾時先可以做冇痛呀, 佢話要3度, 吓!! 我痛咗成日都開唔到1度, 咁我未起碼重要痛多日先得, 仆街啦!! 我真係忍唔住啦!! 咁可唔可以比住個笑氣我頂住先呀!! 個姑娘好好, 佢幫我試吓開大少少, 叫我忍多陣, 一夠2度就比我去番侯產室, 到時就要睇吓嗰d姑娘比唔比我聞笑氣啦!! 又等咗一陣, 終於都話安排我過去啦!! 呢個時候... 嗰個女人竟然穿羊水啦!! 唉~~ 點解人哋個個都快過我o家!! 究竟我重要痛幾耐o家!!

終於又番到嚟侯產房啦!! 姑娘話我未有耐, 叫我行吓坐吓波波, 小姐~~ 我落到地先得o家!! 真係堅痛o家!! 冇法啦, 佢哋話坐波會開快d嘛, 坐囉~~ 咁未唯有坐囉!! 但係坐坐吓都係頂唔順, 要走噃上床, 唉!! 我開始要大叫啦!! 痛死我啦!! 我問姑娘我幾時先聞得個笑氣呀?? 咁幾時先做得冇痛呀?? 佢竟然答我 "你冇上網search過咩? 我哋唔保證幫你哋做冇痛嗰喎, 通常係催生嗰d先有得做o家!!" 我話吓, 咁我點呀, 我真係唔得啦!! 我頂唔住啦!!

過咗一陣, 有個醫生走埋嚟, 我又問... 醫生我可唔可以打冇痛呀? 醫生話如果我開到3度, 而麻醉部未收工就可以, 咁我問可唔可以比住個笑氣我先呀? 佢話得...... 點知得完之後冇曬影!! 之後唔之又隔咗幾耐, 姑娘終於比我聞啦!! 但係一路聞我都係一路叫!! 姑娘又話你叫都冇用啦, 大力吸啦!! 其實老實講... 冇乜大幫助!! 跟住我又打埋止痛針.... 完全冇效果!! 突然.... 我覺得有d唔同咗, 好似近陰道有d好辛辣嘅感覺, 我又叫姑娘嚟幫我檢查吓啦!! 佢話有5度啦, 之住重穿埋羊水添!!

我滿心歡喜諗住打得冇痛啦, 點知佢竟然同我講, 麻醉部收工啦喎!! 但係頭先個醫生應承咗我, 一3度就同我打嗰喎!! 佢話咁都冇辦法喎!! 又繼續痛啦, 突然間... 隔離床拉開咗條簾, 我望到個鐘4:50, 我又即刻同姑娘講, 姑娘! 麻醉部未收工喎? 都未夠5點!! 個姑娘竟然答我, 咁佢過到嚟都夠5點啦!! "屌佢老味" 咁頭先你一早唔好講大話, 佢未夠時間過嚟囉仆街!! 但係當然.... 當時我係再冇氣力去屌佢啦!! 我又話... 姑娘, 你試吓啦!! 或者佢哋肯過嚟呢!! 當然, 佢哋最後都係冇蘇我啦!!

又6點探病時間啦, 志雄同媽咪嚟到, 見到我咁.... 睇得出佢哋都好心痛.... 我自己呢?! 本來都只係咆哮, 見到鍚我嘅人出見, 就忍唔住喊啦!! 人就係咁o家啦!! 一有人理就咋嬌!! 8點啦, 雖然我已經穿咗羊水, 但係媽咪都唔可以留低!! 志雄就要向門口等!! 不過好快.... 佢哋就話我ok啦!! 推咗我入產房....

產房同睇戲嗰d都唔同嘅, 冇手術室嘅大燈, 冇醫生, 冇緊張氣氛, 冇人教你點呼吸, 老公唔係坐你隔離, 冇一塊好大嘅白布啫住..... 志雄就企向我隔離, 手術床嗰d可以用嚟借力嘅扶手&腳架, 完全唔咁我size, 用咗反而發唔到力, 結果個助產士叫我自己攬住自己嘅大肶, 發力~~ 唔岩呀!! 用力向呢個位!! (即係點啫!! 激死人!!) 唉!! 睇到o家啦!! 你又唔夠力, 佢又啜番入去啦!! (我根本都唔夠力, 又唔夠氣) 個問題係, 我自己攬住大肶發力, 一用力兩條腿就好自然咁夾埋, 你哋有冇人幫我按一按, 同我鬥吓力咁都好d哎!! 唉~~

我都未生到出嚟, 已經聽到d助產士話見到啦見到啦, 好多頭髮喎!! 終於生咗差唔多成粒鐘, hur~~ d羊水一下暖粒粒咁湧出嚟!! 連帶bb個頭都出咗嚟啦!! 助產士叫我再用一下力, 佢又好巧妙咁拉咗一拉, 生咗啦!! 本來老公可以剪臍帶嘅, 但係我哋簽咗紙話捐臍帶血, 所以冇得剪啦!!

跟住佢哋話影相, 張bb好快咁擺咗落我懷中, 笑~~ 咁就影咗喇!! bb亦抱走咗喇! 我都未望到咩樣, 唯有叫志雄比張相我睇吓啦!! 又未睇得好清楚, 佢哋已經要趕志雄出去喇!! 之後就縫針之類啦!! 我都唔係好知佢哋向我下面搞d乜啦!! 跟住就推埋我一邊, 話等人送番我去病房喎!!

其間, d人出出入入咁, 唔止一個助產士同我講, 你同女好搞笑呀!! (吓!! 有咩咁搞笑呢?!) 我拉住一個問, bb單眼皮定雙眼皮呀?? 個助產士話, e+重水腫, 好難睇喎!! 不過你又雙眼皮, 你老公又雙眼皮, 點解你咁問嘅?? 哈哈!!我都唔知喎!! (不過e+諗諗吓.... 佢做乜咁留意我老公, 知佢有雙眼皮呀??)

去到病房, 志雄幫我打點完, 就話要去沙律屋企, 原來媽咪已經一早向上面, 煮緊薑飯比我啦!! 志雄過去再拎過嚟比我!! 唉~~ 我e+心情好矛盾, 有d似發咗場夢, 又有d安慰咁, 但係d盆骨呀乜骨物骨又重痛緊咁!! 對自己個女嘅印象又冇乜咁, 叫志雄sent番張相比我, 嘻嘻!! >v< 都幾似我喎!!