今日好開心又好感動, 事關我細佬 ~ 一個永遠長唔大嘅大男孩, 今日終於娶老婆啦!!
由於62單嘢重未夠100日, 所以今朝我都唔去得媽咪屋企睇入門, 硬係覺得自己錯過好多片段咁, 記得我出嫁時, 林林都喊呀, 真係.....
不過, 我一D都冇偷懶, 尋晚就做定個靚Mask, 今朝一早就走咗去洗頭, 著靚靚趕去註冊處啦, 一去到... 第一個就見到我阿媽, 嘩!! 洗唔洗Fur曬咁呀, 不過好靚... 重勁駕勢添!! 嘻嘻~~ 睇吓新娘子, 套婚紗都幾靚喎, 係大部份女仔都鍾意嘅公主款式, 至於個妝呢... 淡淡哋, 都幾好..... 至於個新郎哥就搞笑D喇, 事關佢生咗粒大暗瘡, 哈哈~~
當然, 註冊嘅場面又點少得我d眼淚哎, 唔知點解次次都感動到我, 哈哈~~
之後就更係一輪影相呀, 去酒樓呀, 換衫呀, 化妝呀..... 唔係講緊新娘喎, 係講緊我啦, 媽咪啦, 沙律啦同埋豬豬喎!! 哈哈~~ 我哋重特登請咗Ricky過嚟幫媽咪set頭添, 嘩!! 吹到媽咪個頭幾駕勢幾靚呀, 加上媽咪條暗紅色閃爍裙, 再加皮裘被肩, 真係殺曬呀!!
到到進場喇, 佢哋講嘢感謝詞當然又整喊我啦!! 成晚最最最激氣嘅就係, 林林竟然冇得我同意.... 擺咗我成世人覺得最醜樣嘅相出嚟見街坊囉!!
最後, 要向到祝佢哋恩恩愛愛, 白頭到老呀!!
