又煮飯仔啦！

話咁快又放完三日假喇，所以向最後一日，我哋又再煮飯仔啦！今次主要係林林條女Kobe煮嘅，佢整咗粟米魚肚湯啦，西蘭花鮮魷啦，同埋西芹雞柳，而我呢就整咗個洋蔥豬扖，志雄重幫我切洋蔥添，好Sweet呀！嘻嘻！向整之前，我突登打咗比Hedy，叫佢教我成個汁，佢話只要用d豉油，生粉，糖鹽同水就得o家啦喎！唉！我領悟能力咁高，點會整唔好哎！結果整完，正到爆！我同志雄都覺得個豬扖係最好食嘅！哈哈！最後，更係清曬啦！哈哈哈！

 

生蛇？唔知真係嚇餐死！

話說去迪迪尼之前兩日，我亨亨開始成日話自己個雞翼骨位置，我都冇理佢，因為佢成日都周身骨痛o家啦！況且雞翼骨我都成日痛，有咩咁出奇啫！點知去迪迪尼嗰晚，去食飯嘅時候，佢叫我睇吓嗰雞翼骨位置，佢話摸到好似比嘢咬咁，我睇完之後~嘩！好似比蚊針咗十啖咁，當時就以為係比蚊咬，或者飲咗酒之類啦！都冇特別理，不過都有叫佢睇吓醫生好d！

點知星期五，佢開始覺得又痛又痕，又估自己係未生牛皮癬又剩，鬼咁得人驚！所以嗰晚我就陪咗佢去睇醫生喇！點知...哈哈哈！個醫生好似痴痴地線咁，係咁嘻嘻嘻咁笑，哦...生蛇啫，嘻嘻嘻！冇嘢嘅，自己都會好o家啦！嘻嘻嘻！低能囉！d藥又得三日，認真信唔過呀，所以第二日我就叫佢睇過第二個醫生，係佢個同事介紹嘅，話佢老公之前生蛇都係睇佢！結果嗰個醫生都話係生蛇，當然d藥就好似pro啲咁啦！哈哈！ (雖然我都係估嘅啫)

好彩近呢幾年，向我身邊都有成5個人生蛇咋，所以我對生蛇都有d知識，話係因為細個出水豆出唔清，所以有d毒素根本就留咗向身體入面，當你抵抗力差，或者唔夠訓嘅時候，佢就可能會發出嚟，呢個病唔會傳染人嘅，所以都唔洗咁驚，如果唔係齋聽個名都可以嚇親死！希望佢快d好番啦！

延續愛心大餐

哈哈！我今日重未開心完，重帶咗尋日嘅中式豬扖同蒜蓉白菜仔做Lunch添呀！哈哈！我重終於影咗相添呀！你哋睇吓啦！

愛心大餐~美男廚房

成日想寫今日添，不過過曬12點，應該係尋日先岩！

尋日，我同志雄都放假，媽咪又唔向屋企，所以我哋又玩起煮飯仔喇！今次有d特別，因為係佢煮比我食！佢整咗番茄薯仔牛肉湯啦，煎倉魚啦，蒜容白菜仔啦，同埋中式豬扖！唔...OK啦！都夠入味，不過就咸咗d！我比75分佢啦！嘩！第一次整算係咁啦，最緊要係份心意嘛！好開心呀！不過最衰唔記得影相啦！

第二次遊迪迪尼

10月25號，媽咪去旅行啦！佢要11月1號先番嚟，希望佢玩得開開心心同平平安安啦！

哈哈！不過我哋都有地方去，我同志雄啦，林林同Kobe，沙律同Matthew，一齊去迪迪尼！好開心呀，因為我哋第一次咁三pairs去街，雖然今次係第二次去，但係反而覺得有d唔夠時間玩，可能係因為太想將上次未玩嘅嘢玩曬，不過結果都係玩唔曬！比如獅子王個劇未睇啦，同埋士迪仔未玩囉！唔...唔開心呀！嘻嘻！但係同到志雄最鍾意嘅唐老鴨影相，重要係怪誕系列嘅唐老鴨添！好得意呀！

邪風入侵,苦苦苦！

星期二，志雄放假！唔知點解上親佢屋企食飯，我個肚就好似痛得特別犀利咁嘅！嗰晚我直頭痛到想死！好彩志雄好好，好體貼咁同我飛的，去只係得兩三個街頭遠嘅一間診所到睇醫生！結果醫生話聽我痛到好似搾住右下腹位置咁，就問我有冇發燒，如果有就要留意喇，可能係盲腸炎，如果冇呢咁痛法應該係腸胃炎喇！

食咗兩日藥，一d起息都冇，我諗可能我係腸抽根之類啦！結果尋日真係頂唔順去咗睇中醫！個醫師好搞笑，都唔知佢識唔識睇症o家！首先佢就診默啦，右手先~~唔...你有冇咳呀！~~冇呀！~~到左手喇~~有冇見暈呀！~~冇呀！~~跟住佢就打開我兩隻手，睇吓我d掌紋咁，再按下我隻手指公~~唔...外感未清啫！~~ (嘩！係唔係o家！我都冇感過，何來未清呀？)醫生我係肚痛喎，呢個位喎！痛到好似搾住咁痛，初時我以為係經痛啦，因為我呢排都好亂，重唔識停... (講完一大輪)~~唔...咁你係有邪風啦！~~邪風？邪風入咗邊呀？入咗腸胃呀？~~唔係呀！入咗子宮呀！~~吓！咁大單！(佢係咁開藥方唔理我)唔係喎醫師，其實我重黎緊嘢喎！重好多吓喎！食唔食得中藥o家！(其實對佢一d信心都冇，好想即刻走)~~就係你黎緊先要食，幫你止血o家！~~吓！哦！(好明顯係屈服咗)

結果放工都係去咗食藥，冇法啦！一係唔睇，睇咗冇理由唔試嘅啫，唔試都試咗咁多樣咯，九廿幾個醫生講嘢都唔同，都唔知邊個先真！好啦！食完番到屋企就黎料喇，成晚係咁痾，我媽咪話“嘩！點解你去完有d怪味o家！”我點知點解呀！跟住成晚肚痛啦，要媽咪幫我塗白花油啦！

今朝番到公司，又去咗一次，之後又好似好番好多喎！可能d怪味就係d宿便清曬出嚟呀！真係唔痛啦喎！Lunch再去食多次藥，希望真係會好番啦！痛呢樣嘢，真係好難頂同埋好令人擔心o家嘛！至於止血呢...係少咗嘅，不過未至於止咗囉！咁點為之止血呢？呵

同華仔去睇黃子華

嘩！黃子華好耐都冇開show啦！今次輪到華仔請我去睇，而我就請佢食飯！

食飯嘅時候當然兩個係咁講d八封嘢啦！話曬其實我同佢都一排冇見啦！當中都有提到小名，點知嗰晚睇show就遇見小名啦！佢同個同事Leo去睇！跟住華仔重講咗句：日頭唔好講人，夜晚唔好r痕！嘩哈哈！笑到我死囉好似蝦仔爹地入面d對白咁呀！哈哈哈！之後，完show我哋重一齊去飲咗陣嘢，笑吓添！

其實，今次個show都有d悶埸，有少少失望，不過好笑位又真係好到囉！其中我最鍾意當然係：請你小心放底！呢句金句啦！重有上身嗰part啦！摸女人腳嗰part啦！同埋d女人成日當d夢境係真咁，醒咗之後鬧自己男友啦！呢樣好似我囉！哈哈！但係下次一定要約大班d朋友去呀！因為個個都叫唔好講住，佢哋未睇，好辛苦囉！搞到我剩係可以同華仔兩個亙笑！無癮！

 

 

追月

呢排真係好忙，追月嘅事e+先得閒寫！話說嗰日我享享放假，嘩！大家要知道我有幾耐冇試過同佢一齊放星期六，更係勁高興啦！但係由於之前一晚咁夜訓，所以我哋都係覺得訓醒先決定去邊會好d囉！

結果，訓醒已經成點喇，去遠嘅地方就冇行啦！所以佢就買咗麥當當，嚟我屋企食！哈哈！有得食星星薯餅，正！！之後我哋就出咗去睇寶貝計劃，本來以一個每年都要比成龍呃一次嘅心態去睇，點知，有驚喜喎！除咗成龍一貫嗰d已經冇乜新意嘅動作位之外，有笑位，有感動位！真係幾好睇！可能係冇期望，自然就唔洗失望呱！然後我哋去別府食晚餐，跟住再行咗一陣，就番屋企喇！

雖然對大家嚟講，呢日簡直可以話係平凡得無可再平凡嘅一日，但係對於我嚟講，係幾咁開心同休閒嘅星期六！

中秋節

中秋節嗰日，原本公司話冇得放早o家！不過後未都係放早咗少少，其實放早幾多都好啦！有得放早，大家都開心d嘛！

番屋企做完節之後，我上咗志雄屋企，一上到去第一件事，更係想睇吓我個燈籠啦！點知佢懶鬼馬咁收埋咗喎！哈哈！我咁叻女，更係好快比我發現咗啦！一見到第一時間就係諗，真係比大家估中咗，係整楊桃！唔知大家有冇整燈籠嘅經驗，我記得小學時曾經都整過，<<楊桃>>我一定唔會整，太難啦！

跟住我拎起手，原來係唔係用立光紙整o家！竟然係用膠袋囉！哈哈！咁都比佢諗到！佢話因為買唔到粉紅色立光紙，同埋試過用立光紙好難整喎！不過，用膠袋就唔點得火囉，所以用咗燈！哈哈！我再望吓，個架整得好靚喎！係用鐵絲整o家！邊有可能整得咁靚呀！我問佢係唔係，買個燈籠番嚟，換咗d膠袋料上去咋！佢好緊張咁話，更係唔係啦！原來佢特登帶咗番公司，搵野焊實佢o家！唔...佢真係好叻呀！哈哈哈！點著咗之後，一d都唔似用膠袋整嘅，重係粉紅色添，正！

之後，我哋重攞住個燈籠去咗高山睇花燈會，重影到常娥姐姐嘅相添呀，應吓節哎嘛！

睇完花燈，我哋就去咗樓上樓join埋阿Dick佢哋，最後重唔夠喉上埋阿Dick屋企再飲過添！

 

好彩我有個好鍚我嘅男友啫！

尋日真係心情好差，差到極點，原因種種，唔想再講！希望今日開始正常番啦！

不過，尋晚番到屋企，當我重沈淪向我嘅空虛同感嘆褢面嘅時候，我享享(電話中)話比我聽佢好忙喎，我問佢點解啦！原來佢真係記得上年應承我，今年為我做一個燈籠！佢話原來真係好難整o家！整到個樣好古怪呀！雖然佢唔肯話比我聽整個咩型狀，我亦未見到個燈籠，但係已經足以令我電話後，沖涼時，自己向到傻笑，大笑！真係好開心，整得靚唔靚已經係其次啦，最重要係嗰份心意囉！你諗吓~~一個人，同你拍咗九年拖，重肯為你花心思，整幾日，就算整隻怪獸出嚟呀！都係開心嘅！真係抵鍚！

嘻嘻！搞到人哋尋晚訓唔著，重向到諗~~究竟係點嘅呢！最衰佢啦！咁早話比人哋聽！比d驚喜人都唔得嘅！佢個人就係咁o家啦！冇d情趣！不過又掉番轉頭諗，可能佢係唔慣有嘢瞞著我，所以先不吐不快呢！哈哈哈！雖然有少少自欺欺人，邊個唔識講大話啫！但係我都可以感受到，佢真係好鍚我囉！

爆炸性負向情緒

每朝鬧鐘響起，一想到要上班便感到沮喪，半夢半醒之際已決定裝病請假。但工作堆積如山，令你迫不得已痛苦地從床上爬起來。你對工作感到厭惡和怠倦，這種負向情緒，已嚴重影響你的工作表現．．．．

相信以上不只是筆者的經驗。我們習慣說：我不喜歡、討厭這分工作。負向情緒有增無減，事必有因。究竟是什麼令你的工作情緒如此低落？

千千萬萬個理由

人是擁有情緒的動物，相信大家也曾在工作中出現厭惡和憤怒，問題在於我們如何調節這種負向情緒。早年撰寫《工作EQ》的Daniel Goleman在書中指出，智力是工作出色的重要條件，但當大家的表現相當時，競爭的關鍵卻在於誰能有效管理情緒。

現在很多機構改為五天工作制，但每天的工時卻因此拖長；長時間待在辦公室，令我們更容易陷入負向工作情緒，產生頭痛、思緒靈亂、胃痛、緊張、失眠、焦慮、沮喪，甚至動手攻擊別人。若你不仔細了解背後原因，小心患上抑鬱、焦慮等都市情緒病。綜合不同專家的研究，真正導致長期負向情緒的，主要有以下原因：

‧惡劣的人際關係：跟同事談不來、被排斥，甚至被出賣，找不到真正的朋友令你陪感覺孤單，影響上班情緒甚至失去上班樂趣。(從來在職場上都要分清敵我，不是每分工都能遇上同聲同氣的同事，更莫說能成為知己好友！)

‧遇上討厭同事：職場裏充滿各式各樣的人，看他們不順眼，合作時總感到討厭，因而容易產生怒氣、誤解、敵意等情緒。(每人有不同的價值觀，總不能叫全世界都跟你的一套；試了解他們的想法，多聆聽別人，不認同時可表達自己意見，互相交流，何必動怒？)

‧工作壓力過大：適當的壓力是動力，但過大的壓力終會爆發，這除了影響身體健康，亦容易造成情緒崩潰，一發不可收拾。(有沒試試向主管反映工作的實際情況？還是保守的你不接受新事物而造成壓力？)

‧不被重視：付出了卻不受重視，或上司認為你的功勞是理所當然，或被安排超出自己範圍的工作，令你叫苦連天。(只會埋怨，不如盡力而為，不要永遠認為自己最辛苦，功勞最大。)

無心機

呢排唔知點解，總覺得個腦好實，乜都諗唔到，乜都做唔好，越做唔好就越唔想做！呢d係未就係都市病情緒病呢！

我發覺我太容易被身邊嘅人同事影響啦！好容易發脾氣，好容易唔開心，好容易亂諗嘢！好彩我不嬲係好都幾樂觀嘅人啫！唔開心嘅事好快就會唔諗佢，但係...係咁~~~~~~...都好難頂嗰喎！都唔知搞乜！搞到好多嘢都搾唔定主意咁！

好似需要一個長假期，又好似夾唔到時間咁，d嘢做唔好就好想逃避佢，唉！真係有諗過轉工，又唔捨得17日大假，哈哈哈！睇吓啦！或者每逢年尾，個人都係多嘢諗d呱！等出埋Bonus先算啦！