MC之註冊日

尋日係MC註冊嘅大日子，我當然唔會錯過啦！

註冊時間係10:15am，因為唔想遲到嘅關係，我一早就起咗身，但係我呢個的士王始終都改唔到我mi mor嘅性格，結果9:45am先出門口，當然~~都係要搭的士啦！點知重要塞車囉！心急得我哎！

一仆一碌去到，點解咁靜o家！唔通已經開始咗！呢獲仆街喇，肯定比MC鬧！再行入d終於見到一對新人向門口影緊相！呼！咁都冇咁驚！MC叫我入去坐向哥哥隔離先！但係當我探頭入去，望嚟望去都見唔到哥哥喎！好彩呢個時侯，MC媽咪hi我，重叫我坐康仔(MC細佬)隔離，嘩！係第一行囉！重要係中間添呀！哈哈！

證婚儀式正式開始，一對新人宣讀誓詞，雖然係短短兩句，已經足以令新娘子哭成淚人啦！而我見到佢喊，又點緊得到哎！(我咁喊得)

行完禮之後，MC媽咪撓住我隻手一齊走出禮堂，其間我恭喜佢之餘佢又恭喜吓我囉！佢重係咁叫阿Mei快d同我影相呀！咁多年朋友一定要影多幾張相o家！個感覺真係好好！好似當我係自己人咁！

同埸加演一單笑料！話說康仔嗰日除咗影相全程帶黑超，咁我就走埋去話佢啦！點解頭先同家姐影相唔笑o家！佢笑咗一笑話，我不嬲影相都唔笑o家啦！過咗一陣，MC媽咪佢哋去飲茶話走先，呢個時候哥哥就好大聲咁叫~~喂！龍五~~走喇！嘩！當場笑到我收唔到聲呀！

d人走曬之後，當然唔少得......同新娘去Be Be啦！之後佢哋就繼續去香港公園影相，我就約咗表妹整指甲喇！

最後向到再次祝福佢哋永遠都咁恩愛啦！

 

番大陸攞相&買回禮禮物

尋日請咗假番大陸，可以話攰撚死人囉！首先就去咗芛崗買回禮禮物(當然唔會話比你哋聽係咩啦！)，其實之前都上過去一次，大概都知會買d咩o家啦！但係又格吓價啦，傾吓d Packing啦，又要買埋d濕星嘢啦！結果都搞咗好耐！話時話，嗰到真係好多嘢買o家！有成3個文具城！入面當然唔止係得文具賣啦！

之後就去咗現代經典攞番上次整花咗嗰張40寸大相，最細嘅4寸相薄，同埋執完相之後嘅相底！點知個相底都係唔得！最終佢哋話費事要我再行多轉，速遞嚟香港比我喎！更係好啦！但係我都同佢哋講囉，如果我唔滿意都一樣會番嚟叫佢哋整過o家！

嘩！攞住嗰幅相行都有困難囉！重要搭的士！40寸呀~係40寸呀！都唔知點上車！哈哈哈！結果我坐車頭，Jofee就攬住d嘢坐後面！唉！行到邊都驚整到人，又驚整到幅畫！真係難為咗我老公啦！哈哈哈！

婚前XX症

唉！因為實在有太多阻滯啦！我發覺呢排有d情緒低落！唔知呢d感覺係唔係，定究竟係婚前乜乜症呢！每次聽到d人話唔得呀！嚟唔到呀！公司又咁岩Annual Dinner！一個都嚟唔到呀！大佬~~嗰到成圍幾兩圍呀！點算呀！勁唔開心囉！個感覺就好似得唔到人哋嘅祝福咁！好悲哀呀！另一面又諗，唔通嗰日真係咁好日子！唉！總之就頭痕啦！

跟住，MC又結婚啦！真係好替佢開心！我哋咁多年姐妹，重要同一年結婚，真係唔識點講嗰種衷心祝福佢嘅感覺！不過，可能係佢又忙，我又忙啦！大家都冇幫大家籌備過咩關於結婚上嘅嘢！呢樣好似有d可惜囉！佢重可能會做唔到我姐妹添呀！都唔知點算！唉！

所以我嗰日同豬豬講，如果再有人話比我聽唔去得！我會同佢絕交囉！哼！