比小春感受吓... 咩叫肚餓

講真哎... 鬼唔知打鬧小朋友唔好咩... 有時我目露兇光完... 都覺得自己好唔岩... 比小春記住咗媽媽呢個表情... 佢會點諗呢... 佢會點睇我呢....其實小春由細到大... 都真係唔算曳... 可以講得上乖添... 只係... 佢越嚟越硬頸... 呢吓真係好難搞...

尤其係食飯... 我一向最注重餐桌上嘅規矩... 未食完飯盡量唔會放底筷子... 未食完飯唔離開坐位... 就算食食吓飯內急... 都會忍住... 拎碗嘅手勢唔要似乞衣... (細個比人打手手)... 唔好係咁向d餸到了了了... 唉~~ 我又點會想日日食飯都鬧人... 我都唔想你日日都兩行眼淚咁食飯... 如果比著我哋細個... 食飯喊... 行開啦... 根本大人就唔會比一路食飯一路喊...

但偏偏小春就係一啖都唔肯自己食飯... 要人餵... 重要含飯... 一餐飯食個半鐘... d飯都凍曬... 撈湯... 又凍... 再撈... 再凍... d湯都唔會幫佢番熱又番熱啦... 唯有又撈水... 再撈水... 保持餐飯唔好食到凍冰冰... 就嚟冬天啦囡... d飯餸又會更加易凍... 況且... 咁撈水法... 都唔健康啦...

其實我都明嘅... 就係因為佢讀下午班囉... 4:00食茶點... 4:30放學... 咪咪摩摩沖過涼... 食塊餅... 之後又飲支奶... 訓得嚟都5點半6點... 7:45要起身... 因為要比佢醒吓... 準備食飯....... 唉~~ 咁一嚟... 佢岩岩醒又冇為口... 二嚟... 其實... 佢又點會咁快又肚餓哎... 何況... 佢每次都未肚餓... 就會有人送到埋咀邊咁比佢食... 佢從來都唔知咩叫肚餓... 點解要食嘢啫...

尋晚... 同媽咪傾電話... 講比佢聽咁咁咁... 就講起我細個都係咁... 唔鍾意食飯... 媽咪罰我冇得食... 到夜晚... 我問媽咪可唔可以比杯水我飲... 媽咪諗我重唔叫肚餓?? 嬲嬲哋... 連水都唔比我飲就叫我去訓... 點知我又真係訓咗... 半夜... 媽咪又擔心餓親我... 叫我起身食飯... 當時我心諗... 又話唔比我食... 你哋訓覺先嚟叫人食... 真變態... e+諗番... 都幾好笑... 當時媽咪肯定係比我吹到啤啤聲...

所以我明... 因為我細時... 都根本唔知咩係肚餓... 飽... 口喝... 一直到小學... 有一次唔知點解咁喝... 喝到好似連口水都冇埋嘅感覺... 向街見到支垃圾葡萄適... 直頭想執嚟飲... 當時先知咩叫口喝... (我到e+都係一隻駱駝)... 肚餓究竟係咩呢.... 唔知... 因為夠鐘... 所以未要食飯囉.... 食到肚痛... 咁就係飽啦... 要到讀中學... 唔食飯儲錢買嘢... 先知咩叫肚餓... 所以我估小春就係太似我囉...

尋晚開始... 我唔逼佢食啦... 重之餐飯要自己食... (只限晚餐... 日頭照餵)... 想食就食... 唔想食就唔好食... 肚餓嗰個係佢自己... 夜晚亦唔會提供奶奶... 食飯唔乖嗰日... 就冇得同媽媽訓...

結果... 尋晚佢只食咗1/4碗飯... Tun好擔心...夜晚扮傻... 照沖咗支奶比佢... 我就係唔比飲... 叫佢倒咗去...

臨訓... 我問小春... 肚唔肚餓呀... 佢話餓... 我心諗... 都唔知真知定假知... 重之我就話... 如果你肚餓... 就要記住聽日食飯要乖d啦... 唔係就好似e+咁餓住訓啦... 訓啦~~

今朝一早... 阿Tun就捉住我問... 尋晚小春有冇肚餓呀??    哈哈~~ 唔知喎...