小春又報名學嘢

尋日小春上緊Phonics嗰時... 我走咗去2間琴行... 問吓資料... 然後去番等小春放學... 期間... 又同d媽媽們傾吓計... 問吓...

小春星期六... 10點學畫畫... 12點上Phonics... 之後又話要報2點上小動物數手指... 如果星期日再學埋琴... 會唔會太過密集... 小春會唔會好攰呢...

媽媽們異口同聲... 覺得唔會... 並覺得小朋友只當玩... 唔會覺得攰... 而且... 早d比佢哋試... 但唔好逼佢哋... 到小學就冇咁多時間啦... 如果小朋友鍾意... 就自然enjoy... 如果冇興趣... 就直頭唔洗諗... 比佢放棄囉...  諗諗吓... 都岩嘅...

所以放咗學... 同佢食d嘢... 就去咗社區中心... 幫佢報名學小動物數手指... 即係帶住d小動物嘅手指套... 教小朋友數手指... 等小朋友初步認識數字... 同簡單加數... 小春上星期嚟... 已經唔肯走...話要即刻入去上堂... 今次嚟... 雖然之前都有碎碎念... 話今日只係報名... 唔上堂㗎... 佢更係話知知知... 結果... 都係唔願走... 哈哈~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今朝... 琴行話可以安排到試堂... 比小春試吓... 亦試吓小春夠唔夠定... 適唔適合開始學琴...

小春入到房... 初初有d緊張... 因為琴房只有一座琴... 2張櫈... 真係有d壓逼感... 但warm up咗之後... 小春開始跟住Miss做指令喇... 又幾叻喎... 長音短音輕音重音... 佢都分到... Miss又要求小春跟佢拍手數節拍... 佢又真係跟到喎...

Miss再彈高音鍵... 問小春似咩聲... 小春答 "小鳥"... Miss望一望我... 我冇反應... Miss又彈低音鍵... 問小春似咩聲... 小春答 "大象"... Miss又望吓我... 問我點解佢識嘅... 吓~~ 咩點解佢識呢... Miss話 "小鳥同大象" 真係佢哋教學時用嘅形容詞... 問我小春係未上過d咩堂學過... 吓~~ 我唔知喎... 可能係幼稚園老師歌詠堂講過呱....

跟住Miss指住一個符號... 小春冇理佢... 但就指住另一個符號話... "低音譜號呀"... Miss又望我... 我話... 我唔知呀... 我自己都唔識... Miss笑話... 可能又係學校老師講過啦... 咁佢都真係幾好記性喎... 跟住就教佢... 另一個高音譜號...

再考手指仔... 呢樣小春真係差d... 一向都差... 連整V字手勢都係識咗冇幾耐... 哈哈~~ Miss就叫佢返屋企要多d練習... 食指同中指... 好似扮人行路咁...

呢個時候... 小春已經不受控制... 亂彈琴... 跳落地... 我問Miss... 其實佢適合開始未呢?? 會唔會太細學... 會容易學壞手呢?? Miss話... 其實都有教開3歲嘅小朋友... 唔專心一定會有... 唔好期望佢每堂學到好多嘢... 就當早d比佢聽多d... 有少少認識就ok... 可以自己諗吓先... (完全冇逼我學)... 至於手勢方面... 其實學唔學壞手... 好睇小朋友... 因為彈琴手勢... 就似攞住d嘢彈咁... 如果佢番屋企練習係錯... 又冇人及時提醒... 咁真係好易養成唔好習慣...

我聽Miss講得都有板有眼... 而且... 又做曬Test咁... 唔似另一間係咁話冇問題... 而且都有其他媽媽講過話呢間ok... (雖然唔知邊個Miss教佢個囡)... 所以我決定報名喇... 就真係當比小春試吓囉... 話曬彈琴呢樣嘢... 好講恆心... 冇得逼... 睇佢自己做化啦... 嘻~~