真真正正第一次

為咗今晚嘅party小春可以乾乾淨淨咁見人, 我尋晚專登叫志雄比我試吓幫小春沖涼, 車~~ 都唔係好難啫!! 搵d水潑吓潑吓之嘛~~ 點知... 今日真真正正自己沖先醒起, 尋日個頭都唔係我洗嘅, 我更係輕鬆啦!! 今日要我洗埋佢個頭, 嘩!! 剩係洗個頭已經好攰啦!! 洗完個頭再沖嗰個涼, 就唔覺得只係潑吓潑吓咁簡單啦!! 好攰呀~~

好彩... 為咗唔好凍親小春, 我一早叫咗文文幫我拎毛巾, 準備一上水就接住小春, 如果要我好似媽咪咁, 一個人搞掂曬, 我諗我真係未得囉!! 唉~ 我呢個雞手鴨腳嘅媽媽真係.... 暫時都唔好再玩, 一陣真係凍親都唔知點算!!

尋晚特登叫小春爸爸, 洗咗舅母送比小春嘅聖誕禮物 - Hello Kitty衫衫, 今日重有少少未乾透, 我就搵個暖風機幫幫手, 嘻嘻!! 咁小春今晚就可以著靚靚啦!! 可惜嘅就係, 戴唔到媽咪送嘅皇冠夾夾囉!! 唉~~ 唯有等下次啦!!

 

今日勁忙, 又要自己裝身, 又要搞埋小春一腳, 所以今日嘅相, 都係留番今晚先影啦!!