My Big Big Day

尋日, 我同Jofee嘅婚禮終於都係一片混亂中渡過啦!

一朝早, 各姐妹同工作人員就到曬, 埸面一片混亂, 化妝啦, 吹頭啦, 預備玩遊戲啦...拍埋d搞笑短片啦....跟住~~Jofee佢哋就到啦! 我呢...就坐向騎樓, 又唔知佢哋搞乜, 聽到佢哋笑得咁開心, 我就on 99咁坐向到, 真係好想知道佢哋搞緊咩呀! 平時做姐妹好似好玩好多咁呀!

Jofee終於都入到嚟啦! 佢重向騎樓幫我著起對繡花鞋添, 好威水呀! 哈哈! 跟住就係飲茶同收禮物嘅環節喇! 大家好輕易可以估到, 敬茶比媽咪嗰陣我更係喊到癲咗啦! 落到街, 終於見到我嗰架比人換咗另一隻粉紅色嘅倫敦的士囉! (原先嗰架係鮮桃紅色, 好有傻豹Feel家)不過算啦! 其實呢架都好靚! 車頭重擺咗我自己精心設計 + 媽咪幫手修改禮服嘅傻豹新娘&唐老鴨新郎哥公仔添! 嘩! 得意到呢!

去到男家, 做完曬一切儀式, 又敬完茶之後, 各兄弟姐妹就出去食飯喇! 而我哋呢, 更係向屋企食啦! 我重要著住套褂, 唔通重周圍去咩! 跟住就番屋企回門喇! 忙到呢~~~

差唔到成4:30先去到酒店, 佈置我都幾滿意, 一切都比我想像中好! 好開心呀! d髮型介嘅朋友重鬼咁早到, 義務幫我d姐妹set頭添, 真係認真唔話得呀! 重有Ricky幫媽咪個頭梳得幾靚呀! 連媽咪個頭咁麻煩佢都搞得掂, 重令佢歡喜得咁緊要, Ricky今餔真係威呀! 到到我自己set頭喇! 其實Matthew一早就同我講咗, 呢個頭要搞好耐o家! 不過真係冇諗過耐到咁囉! 我成6點幾重向到梳緊頭, d賓客都嚟新娘房恭喜我, 但係我都唔得閒招呼佢哋, 最大獲就係Pauline, May & Elbert人哋諗住Annual Dinner之前嚟影張相, 但係我又未搞掂, 真係唔好意思喇!

終於都set好個頭, 係一個色介復古look, 雖然唔夠試頭嗰日咁靚, 但係已經好夠靚啦! 呀! 出去敬咗幾杯茶, 就又趕住換衫切蛋糕喇! 向呢個時候, 突然急起上嚟, 全日冇飲水嘅我, 成日第一督尿, 真係冇辦法忍, 點算呢? 呢個時候沙律就大叫, "比個膠袋佢, 比個膠袋佢!" 結果真係搵個膠袋搞掂, 重要當住d姐妹面前! 哈哈! 跟住換咗套粉紫色蛋糕裙加頭上嗰兩隻蝴蝶靚到呢! 幾多人讚呀! 兩隻蝴蝶好似真嘅一樣伏向我個頭到! 哈哈! 呢d係未叫活靈活現呀!呵呵呵! 但係出嚟影咗幾張相, 都未同到d朋友影相就要切蛋糕啦! 同埋律師已經嚟到, 時間又到喇, 所以條裙先著咗一陣, d人都未必睇得切, 我就又要換婚紗啦! 當我入到新娘房, 沙律話我知, Lorraine真係唔話得呀, 佢幫我搞掂咗袋嘢啦! 但係點搞我就唔知啦! 真係真係好唔該曬Lorraine呀!

我套婚紗係象牙白色嘅, 我又想落頭紗進埸, 所以頭飾方面唔可以太誇張, 如果唔係一嚟落唔到頭紗啦, 二嚟第日睇番可能會好娘o家嘛! 最後我選擇咗用一條白色嘅閃令令, 就咁向額前做嗰個印度西施Feel, 其實人靚, 整咩都好睇o家啦! 哈哈! 好喇! 搞掂曬! 律師就入新娘房同我哋講解一陣個程序, 可以話比大家聽, 之前講d咩緊要都跟本係小意料呀! 呢個時候我直頭係驚到跟本聽唔到嘢, 我完全聽唔到個律師向到同我講緊咩! 接住就有人帶我哋由袐密通道出番門口喇!

向門口出面, 又影咗幾張相, 我諗當時一定好生硬, 因為我心已經飛咗去埸內, 聽到阿Dick同Fanny呢兩個MC都幾淡定, 又聽到開始播我哋嘅片頭啦! 聽到有人笑喇! 等到唔耐煩喇! 門終於都打開啦! 又開始緊要啦! 褢面黑麻麻, 剩係得大光燈照住我哋, 我又帶咗頭紗, 其實唔係好望到d人, 又唔係好望到條路, 剩係知我係咁叫Jofee行慢d行慢d, 哈哈!

上到台, 律師開始問我哋願唔願意嘅問題, 其實我一聽到Jofee話願意嘅時候, 我已經想喊, 到我自己嗰陣反而先覺得有d監尬, 擁有少少舞台經驗嘅我, 當然知呢個時候, 台下嘅人只係一堆黑影啦! 我開始唔理佢哋, 盡量去享受呢一刻! 呢間律師行真係幾好, 佢唔洗我哋攞住張卡紙係咁讀, 而係律師細細聲向後面讀一句, 我哋就攞住mic讀一句, 當我聽到Jofee捉住我隻手話, "Peggy, 我e+將呢隻介子帶上你手上, 代表我對你嘅承諾xxxxxxx"我已經忍唔住啦! 到我自已講嘅時候, 一講到Jofee, 我已經係咁喊囉! 事後d賓客先笑我, 同埋話個律師處理得個場面好好!

好喇! 又到咗講感受嘅環節喇! 原先我諗住我講先家嘛, 點知Jofee自己攞mic係咁講囉! 將我諗住講嘅又講埋, 搞到我都亂曬! 哈哈! 到我喇... 我記得當時d人都開始噪啦, 但係當我講到, "其實...今晚我覺得有d遺憾..." (又喊囉)呢個時候, 我聽到大家即係靜曬囉! "就係我姥姥唔能夠嚟到參加我個婚禮, 但係我仍然好想同佢講姥姥我結婚啦!" 我聽到樓下有人大叫 "好" 應該係表舅嚟o家! 我重有多謝媽咪咁辛苦帶大我哋啦! (我見到媽咪都勁喊囉!) 同埋大家縱容我嘅懶啦! 同埋62, 99同埋各男家嘅屋企人, 由一開始就好錫我, 同對我嘅認定啦! 之類呱, 都唔記得咁多, 要睇番video先知啦!

埋席喇, 其實根本都食唔落嘢, 全程我對隻飽魚最有印象, 因為幾食唔落, 我都堅持食咗佢, 哈哈! 又要換衫敬酒啦! 成日都好想知d人敬酒嗰杯係乜東東, 原來只不過係一杯凍茶啫! 今次, 我以一條粉紅色前後deep V嘅公主飄逸衫, 兩個袖重要飛飛吓 + 皇冠出現, d人嘩到呢! 一個字 "索" 形容曬!

敬完酒, 終於有少少時間比我同d朋友吹吓水, 影吓相喇, 向呢個時侯Bonnie同May May突然出現, 我一見到Bonnie, 又喊喇, 我真係好開心, 佢真係好好, Annual Dinner要做工作人員, 都偷走出嚟恭喜我, 我係咁喊係咁喊, 根本就停唔到!

玩咗一陣, 又要送客啦! 真係招呼唔到呀! 我明點解d人成日要講呢句嘢啦! 因為真係招呼唔切o家! 我就又換咗套紫色晚裝啦, 即係尋日臨時換嗰套呢! 就係因為咁, 我哋根本都諗唔切佢用咩頭飾好, 結果又比我靈機一觸, 諗到將d一粒粒嘅水晶放曬上個頭到, Matthew不規則d放會好睇d, 所以豬豬就幫手, 求其放上我個頭, 結果出嚟又係好多人讚喎! Lorraine事後重問我d頭飾可唔可以借佢個fd用添, 不過佢遲咗一步, Matthew已經收番走啦!

之後After Party, 又係喊到我癲咗, 尤其是我細佬同Koby嚟到, 又要訓話又剩, 喊到我今日隻眼腫到, 我自己一照鏡時, 都有d唔認得自己! 同尋晚對比實在太大啦! 哈哈!