渡蜜月第二天~東京-松島

今朝就真係大獲啦! 約10:00am集合, 點知...

志雄一醒就好大聲咁叫醒我, 9點啦~~快d啦! 趕唔切食早餐啦! 但係佢重姿姿柔柔飲咖啡等屎柯, 因為佢朝朝都一定一定要做呢兩樣嘢o家! 天皇老子都冇面比! 咁我就起身啦! 點知佢突然又叫~~仆街啦! 原來係10:30先真呀! 呢個時候, 電話就響啦! 係導遊打嚟! 我哋連番道歉諗住問佢哋下一站去邊, 我哋自己搭的士去join佢哋啦! 點知佢竟然話等埋我哋喎! 呢個時候志雄已經柯完屎去沖涼啦! 係呀! 柯完屎係一定要沖涼o家! 呢d就係晨早3部曲喇! 哈哈! 得意哩!

上到旅遊巴已經係11:00啦! 真係唔好意思喇! d團友見我哋道曬歉咁, 都冇再怪我哋! 呢一站就去銀座喇! Shopping對我同志雄嚟講, 唔係今次嘅目的, 就算係我哋都想行鋪仔多d囉! 而且我哋重未食早餐, 所以行咗一陣我哋就諗住去搵間super market買嘢食喇! 我就買咗個飯團, 佢就買咗個熱狗, 食完又係咁去影相啦!

好啦! 終於嚟到志雄最期待嘅環節喇! 就係搭小彈火車啦! 佢話係童年睇卡通片時嘅夢想喎! 咁又係呀, 平時短途又唔會捨子彈火車, 所以都未搭過! 就咁我哋今次就由東京~松島, 我哋重買向車站買咗便當上車食添! 不過係凍冰冰o家! 原來佢哋係就咁食o家! 怪唔知得睇日劇時d學生個個帶飯都唔洗叮啦! 不過又出奇地好食喎!

去到松島, 今日就冇乜嘢玩, 番到酒店食完飯, 就好期待去浸溫泉喇! 可惜哎! 都冇落雪!