尋日豬豬嚟我屋企搵我整指甲, 今次佢自己有曬 idea喎! 其實我成日覺得整甲都唔係用好多時間呀! 諗整咩先最頭痕! 自從玩埋甲油之後, 我覺得多咗好多嘢玩呀! 我個人又貪新鮮喎! 成日都要轉款, e+唔鍾意又可以即刻整走佢, 唔洗次次改個gel甲改到自己d指甲都壞曬!
佢話今次想整粉紅色豹紋喎! 整完gel甲之後, 我哋發現屋企d粉紅色都唔夠靚, 結果就即刻走咗落街買, 好彩慈云山有莎莎都幾方便, 哈哈! 又比我哋買到合曬心水嘅甲油喎! 大家睇吓今次嘅作品!
2008年2月20日 星期三
2008年2月6日 星期三
回歸后仍然忙碌非常
去完旅行番嚟之後, 好似都係一樣咁忙, 番嚟已經係年廿六喇! 所以第二日就要番外家食水餃, 年廿八林林生日又番外家食壽麵, 年廿九都係要番外家食團年飯, 搞到今日年三十晚先向屋企食第一餐飯, 哈哈! 重好似係結婚嗰日之後, 向屋企食嘅第一餐飯添呀! 哈哈!! 都不特止呀, 今晚我哋食完團年飯, 重會去阿Jun屋企飲靚湯, 同賭錢添! 唉~~ 唔知今年媽咪佢哋食水餃嗰陣, 會唔會好唔慣冇咗我呢! 所以媽咪上年叫我唔好出街都係啱o家! 陪佢包水餃, 我哋重影相, 呢d一切都變成我最好嘅回憶!
唔知點解呢, 我只係嫁咗個零禮拜之嘛, 番外家嘅感覺就好似既熟悉又陌生咁, 食飯又變到食得好多, 覺得好似好耐冇食過, 好珍貴咁! 好懷念嘅味道呀!! 但係番自己屋企呢, 又好唔習慣喎! 好掛住媽咪呀~~~唉! 唔知點解呢幾日, 日日見住都重好掛住呀!!!
2008年2月2日 星期六
渡蜜月第九天~札幌 - 香港
今朝都好早起身, 點解??? 因為諗住早d要機埸check in然後我哋就可以早d去factory outlet掃貨啦! 點知11點去到機埸話要成12點先check得in喎!! 咁點算呀!! 拎住咁多嘢點行呀??? 再等又唔夠時間行o家啦喎!!! 結果我哋租咗兩個locker, 放曬d行利入去就走人啦!
去到factory outlet, 嘩! 多嘢買到呢! 根本唔會行得曬囉! 咁要快手d先得啦! 嘩! 間間鋪頭都勁平, 但係自己又冇喇, 點呢~~係未真係需要呢! 買d都好喎! 又可以洗咁d Yen, 哈哈! 不過結果我哋都係買咗兩對波鞋同一個背包就走啦! 志雄想再睇吓日版牛仔褲, 不過又睇唔岩, 又唔夠時間, 所以最後唯有走啦!
去到機場, 兩個團友已經check in咗排緊隊入閘喇! 我哋更係嗱嗱聲check in排去佢哋嗰到啦! 嘩! 多人到呢!!! 好彩, 入咗閘之後重有手信賣, 我哋又瘋狂咁買買買, 哈哈! 重買咗兩個便當上飛機食添! 買完嘢, 成身都舒服曬, 上機前更係要去bebe先啦! 向bebe室入面有隻窗, 志雄好好笑, 佢開咗人哋隻窗, 話要吸多兩啖北海道嘅空氣喎! 唔知我哋幾時可以再番嚟呢!
番到香港打比沙律, 原來佢真係嚟咗接機囉! 真係超級難相信呀! 哈哈! 但係由於志雄離開香港境嗰陣, 比人收咗把萬用刀, 所以我哋都未可以即刻走, 重要上國泰攞番, 真係麻煩呀! 行嚟行去搵嚟搵去先搞掂, 搞掂之後我哋就番屋企放底d行李先, 然後攞咗兩盒草餅就出咗去食飯啦! 原來佢哋成班+豬豬奧云都向到等我哋, 哈哈! 真係咁掛住我哋??
過到去, 第一件事就係叫嘢食, 嘩! 都唔係幾掛住香港d口味! 嘻嘻! 結果, 我同志雄兩個就係咁食飯, 佢哋呢...就好瘋狂咁食草餅喇!
2008年2月1日 星期五
渡蜜月第八天~札幌 - 登別 - 札幌
今朝一早起身, 好攰呀! 不過又好興奮喎! 同志雄向車站買咗個飯團同咖啡就趕住上車啦! 嘩! 好彩我哋早咋! 原來車飛寫個時間係開車個時間囉! 架車早15mins就到咗啦! 幾險呀! 你哋知啦! 我係半粒鐘小姐嚟o家嘛! (例遲半粒鐘)
嘩! 終於都到登別啦! 呢到個車站有d似睇劇嗰d懷舊feel! 出到去之後, 我哋好容易就見到水族館座城堡喇! 對住佢行, 基本上十分鐘就到喇! 不過唔知點解搵極都唔見個入口囉! 呵呵! 終於搵到啦! 嗱嗱聲同個城堡影張相先! 買飛嗰陣, 原來佢有套票買o家! 一次買曬2個或者3個公園嘅套票平好多o家! 不過我哋今日都唔夠時間去忍者屋o家啦! 算啦! 買2個算啦!
一入到去, 唔理3721走去同企鵝仔影相先, 事關我哋嚟嘅最大原因都係為咗佢哋咋! 哈哈! 幾得意!! 之後我哋就去咗睇海豚同海C表演喇! 嘩! 唔好睇人哋個場仔細細喎! 人哋d表演好睇過海洋公園啦! 唔知大家記唔記得我哋係唔見咗一張2G卡嘅呢! 所以志雄拍得2段video就收手啦! 驚一陣唔夠影喎!
終於到萬眾期待嘅企鵝巡遊啦! 睇吓睇吓~~ d企鵝識自己一隻跟一隻o家! 重識擺pose添! 幾搞嘢都有呀! 我哋就行嚟行去夾番岩個位同佢哋影相囉! 好彩join番嗰兩個團友咋! 有人幫我哋影合照啦! 呵呵~~
睇完巡遊, 原先都諗住冇咩行o家啦! 估死佢個城堡未又係嗰d賣紀念品嘅地方, 唉! 免為其難入去睇吓啦! 點知~~~ 呵呵! 原來呢到係個大型水族館嚟o家! 志雄即刻癲咗啦! 話好彩有入到嚟咋! 跟住佢就彩我都傻咁自己揸住個相機係咁影! 一陣又自己向到笑, 一陣又追住條鯊魚喪影! 搞到鯊魚都發惡, 突然向住佢衝過去, 重想咬佢添! 嘻嘻! 不過係條傻鯊魚囉! 咁大塊玻璃向到, 點食佢呀! 哈哈! 不過志雄都依然話嚇一跳囉! 哈哈! 當一個體驗都籍啦!
離開咗水族館之後, 我哋去咗兩個團友住嗰間酒店附近嘅一間嘢到食飯, 都係書仔有介紹過嘅, 不過唔好問我名, 真係唔記得, 剩係記得真係堅好食啫!
呵呵! 終於都嚟到熊牧場啦! 重要坐雪兜上山! ee~~ 好似好好玩咁喎! 我未坐過雪兜o家! 哈哈! 點知原來條路根本好短o家, 等佢哋重夠膽收錢嗰吓好嘢哎嘛! 呵呵! 算啦! 都叫做坐過啦e+! 上到個平台咁嘅地方, 又要再轉鑬車, 好似都係要收錢o家! 日本人真係哎! 咩都講錢嘅!
上到嚟, 第一樣見到嘅竟然唔係熊人囉! 反而係鴨鴨, 因為呢到有賽鴨玩o家! 不過賭錢呢d都唔岩我嘅, 睇吓就幾得意囉! 跟住我哋買咗d蘋果去餵熊人啦! 嘩! 佢哋真係好大隻o家! 企高肯定高過我呀! 雖然我企向上面, 但係都有d驚囉! 不過佢哋其實原來都幾懶o家! 就咁坐向到舉吓手, 示意你比嘢佢哋食, 當你拋d嘢食比佢哋時, 佢哋就即刻用個口接實, 但係如果接唔到的話, 就即刻比d烏鴉食咗o家啦! 佢哋又唔去追嗰喎! 死懶鬼! 不過零零舍舍有一隻又好得意嗰喎! 佢全程揸住自己一隻腳擺pose, 哈哈! 餵佢食嘢, 接完嚟食佢就又訓番低揸番住自己隻腳, 超搞笑囉! 跟住我哋就行咗入一個唔知人中籠定籠中人嘅地方, 重之就聽個名唔知佢想點啦! 入到去....原來係指我哋向籠入面, d熊熊就向出面睇番我哋轉頭, d日本仔真係變態o家! 哈哈!
我哋沿住熊牧場上去, 嘩! 見到一個大湖, 個湖重結曬冰添! 好靚, 真係好靚, 我哋重係咁向嗰到影相, 你同我影, 我同你影, 佢同我影, 你同佢影, 重之就係咁影啦, 不過d相向個團友到, 重未有得放出嚟!
然後, 我哋又去下一站地獄谷睇火山, 其實原來登別根本就唔係好大, 好快就去到o家啦! 一去到, 臭到呢~~~ 夾硬走過去影咗幾張相, 即走!! 嗱嗱聲去d鋪頭仔行吓好過, 嘻嘻!!!
好啦!! 要起行番札幌啦!! 嘩! 超遠囉!! 佢哋重要行錯路, 搞到番到去都成7點幾啦! 放低d袋就即刻又趕住再去多次狸小路啦! 如果唔係聽朝根本都唔夠時間行, 點知去到賣皮褸嗰間嘢, 岩岩8點鐘, 佢話唔肯賣囉! 有冇咁大支嘢呀! 哼! 我問志雄不如我哋聽日再嚟過哎, 點知志雄話算啦! e+比我都唔要添呀! 可能真係嬲!! 咁我哋唯有行藥房啦! 呢到個藥房都幾大, 我特登帶咗sofina盒mask嚟, 因為佢係就咁一塊啫喱, 又冇水漏, 洗完頭用都唔驚整番濕d頭髮, 朝早用就更加方便, 但係你冇個盒又點形容比人聽你要咩呢!! 結果, 我好輕易就搵到喇, 但係聽沙律話日本人d mask大部份都係呢隻質地嗰喎! 點解我唔見嘅?? 結果未又係硬住頭皮問d Sales, I want to buy the mask like this, no water.... 哼! 你哋又唔好理, 佢又聽得明!! 呵呵!! 夜晚嘅狸小路同日頭有d唔同, d鋪頭關咗之後, 會有一班班嘅年青人向到唱吓歌呀, 表演吓咁, 都幾得意o家! 跟住又比我哋重搵到一間開到好夜, 又多嘢賣嘅鋪頭, 入去嗰陣唔覺, 原來入面有幾層樓高o家! 行極都行唔曬! 不過真係好肚餓啦! 要醫吓肚先啦!!
本來今晚好想搵番嗰間乜Q味之計時台試吓係未真係咁堅o家! 點知搵極都搵唔到個地址, 盲中中又比我哋行番去前兩晚去過嘅薄野不夜天嘅拉麵街, 志雄話咁更係要去拉麵街試吓啦! 我就笑佢喇, 之前向呢頭住咗兩晚都唔嚟, e+反而大老遠死番嚟哎嘛! 無聊爆啦!! 好!! 睇吓書仔又介紹邊間先~~~噢!! 係呢間啦! 寅先生拉麵!! 入面真係好多名星簽名喎! 寅先生重好識做一坐低就問洗唔洗同我哋影張相喇! 哈哈!
番到酒店check email, 發現沙律send咗mail個想嚟接機, 話好掛住我哋, 要嚟接機喎! 吓!! 咁大單!! 沙律喎~~~ 我咁大個女都未聽過佢話去接機o家!! 好得人驚呀!!! send咗d 資料比佢就上房訓啦! 好攰呀!!
唉!! 聽日就走啦! 有d唔捨得添!!!
2008年1月31日 星期四
渡蜜月第七天~札幌
今日係最後一日同D團友一齊啦! 一朝我哋就去咗狸小路, 嘩! 個個癲咗咁買手信囉! 雖然我哋唔洗買好多手信比人, 但係都唔執輸買咗一箱! 嘻嘻! 由於時間冇多啦! 我哋又要行地下街, 又要行上面鋪, 嘩! 好忙呀! 結果志雄見到件皮褸都冇時間諗買唔買就要走啦! 不過唔緊要啦! 反正我哋呢幾日都會向扎幌, 到時行多次未得囉! 嘻嘻!!
離開咗狸小路, 我哋同d團友食埋最後的午餐就分手喇! 向分手時, 落緊好大好大嘅雪, 佢哋就上旅遊巴, 重同我哋揮手揮到唔見我哋為止, 哈哈! 跟住我哋就要自己搭的士番我哋事先向香港book嘅酒店check in喇! 嘩! 大雪到咁! 都唔知點算! 又攞住咁多行李, 點截的士呢! 狼狽到呢! 終於上到車喇, 又塞車! 本來導遊話唔洗跳錶嘅路程, 跳咗幾嘢囉!好啦! 落車啦! 間酒店係冇停車處嗰囉! 架的士就咁向馬路到停, 我哋就要冒住大風雪, 將d行李由馬路拎番入酒店, d雪係咁打埋嚟真係好痛o家!
入到酒店, ee...又幾先進喎! 重有免費上網添, 好過之前幾日嗰d要錢啦! 上到房, ok哎! d人成日話日本d酒店出名細, 6百幾蚊我亦唔expect有d乜咁好! 但係我真係覺得好好喎! 又干淨又近JR, 重想點呀!!!
拾好嘢之後, 我話即係要出去啦! 點知志雄話落咁大雪點出去呀! 我唔理死死要出去, 咁我哋就決定過對面JR站買定聽朝去登別嘅車票先啦! 搭lift落到最低層, 噢!!原來係地下街嚟o家! 呢到又有嘢食, 又有嘢賣, 真係落大雪都唔驚冇嘢行呀! 沿住地下街行就可以去到JR站喇! 摸熟路, 聽朝起身又唔洗搵啦! 呵呵!!!
e+買飛真係好簡單, 因為原來JR站入面d著紅色制服嘅姐姐係識多國語言o家! 話咁快佢就幫我搞掂曬! 我哋只係買咗單程飛, 因為聽日約咗嗰pair都係stay嘅團友向登別, 佢哋會揸車車我哋番嚟!
買完飛, 真係時間岩岩好, d雪停咗啦! 我哋真正二人世界嘅旅程開始啦! 其實我同志雄除咗澳門之後, 都冇試過自由行嘅, 次次去旅行就算自由行都係同d熟路嘅朋友一齊去嘅, 所以今次又有d探險feel, 哈哈!! 就係咁我哋就揸住張地圖去搵我哋嘅第一站 "時計台" 啦!! 呵呵!! 我哋d方向感咁好, 當然冇問題啦!!! 你哋睇吓幾靚, 不過入到去其實又冇乜嘢好睇囉! 嘻嘻!! 係影吓相咁啦!!
行完時計台出嚟冇耐, 我哋就見到一間叫味之時計台嘅拉麵鋪喇, 我睇書都有介紹過o家! 不過都未肚餓, 我哋重要趕住去電視塔呀! 嗰日去到都冇時間上去睇吓, 今次終於上到去喇, 不過都冇咩特別啫! 重鬼死咁貴添o家! 唉! 最靚就係望大通公園嗰邊, 成條街都係d好靚嘅燈, 同埋大通始終都預備緊雪祭, 未有咩睇, 我諗如果到下個禮拜雪祭肯定重靚呀!
好啦! 真係肚餓啦! 我哋去番酒店對面個商場, 搵書仔介紹嘅札幌共和國, 嗰到入面有各式各樣嘅嘢食, 重有好似博物館嘅地方比人影相, 每個月重有比賽, 睇吓邊間生意額最高, 最好食, 哈哈! 一場嚟到, 我哋更係食最好食嗰間梅光軒啦! 嘩! 真係唔係浪得虛名呀! 可以用正到爆嚟形容囉! 差d連湯都飲曬呀!!
食完嘢, 鬼死咁飽, 更係行吓個商場啦! 不過其實d鋪頭都收得7788啦, 所以我哋去咗間機鋪, 嘩!! 原來日本人影貼紙相, 係可以換衫o家! 重有制服啦, 卡通服...... 好搞笑囉! 之後竟然比我哋見到一部夾公仔機, 係夾傻豹嗰囉! 不過都未夠勁呀! 最勁係志雄竟然唔洗d工作人員將隻公仔放埋洞邊, 一嘢就夾到佢出嚟, 睇吓睇吓~~ 係隻粉紅色豹紋傻豹呀!! 呵呵!!
今晚要早d訓先得, 聽朝一早要早起身呀!! 如果唔係趕唔切班車啦!! 好期待呀~~~
2008年1月30日 星期三
渡蜜月第六天~札幌
今日行程都算幾豐富, 首先一早我哋就去咗玩雪上電單車, 嘩! 終於都有得玩啦! 哈哈! Jofee問我, 我哋一齊玩定分開揸呀?? 開頭我都諗住一齊嘅, 咁我又唔識玩, 無謂洗d咁嘅錢啦! 點知去到d人又話好玩, 又話一場嚟到咩都要試吓! 唉! 好啦! 就分開玩啦! 嘻嘻! 好緊張呀!
入到換衫房, 個個著到隻糉咁, 哈哈! 好好笑呀! 我哋重特登帶曬口罩, 驚一陣d雪打埋嚟會打到塊面好痛o家嘛! 上到車, 雖然個教練講到好似好易, 但係唔知點解我都重係好驚呢! 好啦! 真係要開車啦! 挑! 慢吞吞一架跟一架, 無癮! 點知...話口未完~~上山啦! 嘩! 勁多彎囉! 控制個軚盤要好用力o家, 搞到我兩隻手都痛埋! 個口罩又困實曬d口氣, 搞到個眼罩都起曬霧氣, 唉! 真係罷鬼呀! 除咗佢重好呀! 好彩終於上到山啦, 嗰到有個大空地比我哋勁飛, 由於係大空地, 條路又闊, 我就試吓啦! 初初都有d驚o家! 玩玩吓個心就開始紅喇! 我不單止踩盡咗個油門勁飛, 重要趴你頭囉! 哈哈! 好好玩呀!
再嚟, 我哋就繼續上上落落, 又去到一個空地停咗落嚟, 導師派咗d熱朱古力比我哋飲, 飲咗兩啖後, 邊到重有心機嘆落去哎! 更係落部相機出嚟係咁影啦! 你哋睇嗰到d雪幾深, 最深我重行到上Pat添呀! 哈哈! 真係過癮o家啫! 哈哈! 不過...向嗰到我哋跌咗張2GB卡呀! 唉! 走咗先發覺, 好彩嗰張卡未影相o家咋! 如果唔係~~~我會殺咗志雄囉!
離開咗電單車埸之後, 我哋就向咗白痴戀人出開喇!由於白痴戀人個唔知幾多周年版個嘗味日期出咗事, 好似搞到好大件事呀! 所以我哋只可以向門口影吓相, 不過其實咁都好哎! 反正我哋興趣都不大! 其實門口都幾多嘢影哎, 好似呢d小屋咁, 入面真係有枱有椅o家! 即刻咁起如果細個玩煮飯仔嘅時候, 有呢d屋仔就好啦!!
哈哈! 終於都到小樽啦! 一嚟到就自由活動啦! 我同志雄去食咗碗好難食嘅拉麵之後, 就過運河嗰邊影相喇! 超! 你哋睇吓條運河似乜, 唉! 成門河都靚過佢啦! 唔明點解咁都叫名勝囉! 拿拿聲影幾張相, 閃!!!
大家睇吓, 今日得-2.3度咋! 凍到我呢! 嘻嘻! 我真係好怕凍o家!!! 一場嚟到小樽, 又點可以唔同呢個蒸氣鐘影張相呢! 跟住就懷著襯熱鬧嘅心情入咗嗰個好似話咩水晶音樂城呱, 其實我本人呢, 就唔係話唔鍾意音樂盒嘅! 不過咁多年嘅經驗話我知, 冇一個音樂盒我係會放出嚟嗰囉! 冇謂洗d咁嘅錢啦! 不過呢到可以自制自己鍾意嘅音樂盒o家! 我重見到有個Display整咗Donald Duck添! 都幾得意o家! 不過Jofee都係話唔整啦!
出咗音樂城, 見到門口又有d細細隻嘅雪雕, 重要係龍貓添, 幾得意!! 最搞笑嘅係, 我見貓巴士隔離有條小滑梯, 雖然細細條, 但係我諗住向到扮sir咁影張相, 點知真係sir咗落地囉! 哈哈!
之後我哋就趕咗去銀之鐘飲咖啡啦! 點解?? 因為向銀之鐘飲嘢, 係可以選Hello Kitty杯飲o家! 重有好多款選添! 飲完之後, 隻杯重可以洗番乾淨拎走, 我就選咗呢隻喇, 可以帶番去比沙律做手信, 一舉兩得! 哈哈! 飲完嘢, 我哋上咗餐廳嘅3樓, 嗰到有d 薰依草嘅bear bear熊賣, 尋晚收到沙律個email話想要, 不過呢到賣得都幾貴, 所以我都冇買到, 睇吓第二到有冇得賣啦! 呢到重有個露台, 我哋又出咗去影相, 見到人向到整雪人, 哦!!! 原來整雪人係要加水o家! 怪唔得知我上次整唔到啦! 哈哈! 又學多樣嘢喇!! 咁岩落到樓又比我見到有個整好咗嘅雪人喎! 哈! 影返張相先!!
向銀之鐘搞咗咁耐, 出到嚟個天都開始黑喇! 哈哈! 呢到真係快天黑! 我哋又要趕頭趕命啦! 去邊??? 嘻嘻!! 趕住去食六段雪糕囉! 嘩! 好大杯呀! 我哋兩個叫咗一杯兩份食, 嘩! 隻隻味都咁好味o家! 其實重有好多得意嘢, 好似有條腸, 串到好似支波板糖咁, 都不知幾棧鬼! 係時侯番旅遊巴集合啦, 沿途我哋重見到有日本電台添, 嘩! 幾大間!
今晚我哋嘅晚飯係食燒烤, 呢到重有部綿花糖機比我哋自己整嚟食, 好好玩呀! 不過原來都冇想像中咁易整落支竹到o家! 食食吓, 出面突然落起大雪嚟! 嘻嘻! 呢幾日都係落細雪, 都影唔到相嘅! 哈哈! 我哋即刻放底碗筷出去影相啦! 容乜易食完飯佢就停o家! 哎!! 同場重加演咗一件好搞笑嘅事, 就係......大家知我哋食緊燒烤啦! 咁都有煙o家嘛, 咁我哋就坐窗口位啦喎! 窗邊有個制上面寫住漢字"排煙" , 有個團友見到, 就按嗰個制啦! 我就向到望吓佢做乜, 佢話原來有得排煙o家! 我正想跟住按, 突然上面隻窗開咗囉! d雪係咁飛入嚟囉! 重要唔係飛落佢張枱, 而係佢隔離將枱囉! 嗰張枱d團友即刻灰曬! 食食吓飯都唔知做乜, 哈哈哈! 笑到我哋癲咗! 好彩我未按制啫, 如果唔係比人笑埋一份呀!
訂閱：
文章 (Atom)