都唔知咩爛鬼天文台~~癡線！

今朝真係搞笑！低能到爆！

話說我亞媽前一排好叻咁搵一把爛咗嘅遮，整咗一個放大遮嘅遮套比我。咁今朝一早見到我細佬出門口，我亞媽就叫住佢，比咗把遮佢，話出面好大雨喎！當我細佬走嗰一下，比我見到佢拎住咗我把大遮，我就問媽咪點解比我把遮佢啦！佢話唔記得咗把遮係我個喎，跟住就搵咗好多把大遮比我，我更係鬥氣啦！全部都唔肯用，只係帶把縮骨遮囉！激死我呀！

一落到街，見到咁咁咁大雨，已經心知不妙啦！唔提啦，出去啦！其實今日已經係遲咗出門口o家啦，重要咁大雨搭巴士肯定遲好多，所以我一定要搭的士先得！望吓的士站，嘩！有成五六個學生等緊車！咁點呢？都要等o家啦！當我行到去的士站嘅時候，我前面已經係濕透咗，連頭髮由膊頭開始至髮尾都濕埋！企咗一陣，監生咁比雨淋，連後面都濕曬啦，底褲都濕埋！

等咗大概十分鐘，係十分鐘呀！終於有架車經過(唔係的士站嗰邊)，我二話不說，飛奔過去，終於都上到車啦！上到車，條四個骨褲d水，係咁滴呀滴，重越坐越凍添！我同司機講，司機可唔可以熄細d冷氣呀點知個司機話，我今朝都濕曬，岩岩先乾咋！我都好凍呀，但係個冷氣已經熄到最細啦！再細就要熄咗去，但係出面咁大雨，熄咗去會起霧氣，睇唔到路o家！唉！咁冇辦法啦！當然重要塞車，冷得我滕滕震~~

番到公司叫個OS廢柴去幫我班個風筒番黎，佢話管理處未開喎！唉！未開未問管理員囉！佢竟然就由得我凍，凍凍凍~~~凍到9:00先落去借！好啦！點知我都未吹到一陣間，佢竟然問我借風筒吹老板份報紙喎！哈！佢真係搞笑到爆呀！吹吹吹~~~前吹後吹，吹到差唔到十點先吹乾曬！大家嚟諗吓啦！八點凍到十點囉！唔病都有之呀！

邊有咁大雨o家！天文台搞乜鬼o家！太過份啦！咁都唔掛黑雨，唉！好啦好喇！唔掛黑雨都算喇，都掛紅雨等d小朋友唔洗番學哎！重話唔會掛3號風球添，點知未又係掛，重掛埋紅雨添！d番咗學嘅小朋友又要搵人接番走，天文台知唔知咁好危險o家！太太太過份呀！