美之選 ~ 反轉豬肚

之前收到個電話叫我上美之選(楊怡代言嗰間)到試做個黃金facial, 聽我媽咪話試過上美之選, 都做得幾好, 同埋之前我向phillip wain做嘅時侯, 都有聽過呢隻黃facial, 好似話都幾好嘅!! 試吓無妨哎!!

況且佢話108蚊試做, 重送一支價值400幾蚊嘅精華, 都不特止.... 重有50蚊嘅超市禮券送添!! 唔係話我貪小便宜(雖然真係, 嘻~), 人哋送到唔通我唔要咩?! 哈哈~~

上到去(我係去旺角分店嘅).... 裝修簡陋d喎!! 唔緊要啦~~ 我都唔係咁講究嘅啫, 最緊要做得好!! 佢哋推介我做另一個氧氣facial, 即係唔係話唔好, 不過我真係一心想嚟試吓個黃金囉!!

入到房, 嗰位技師(++)呢樣又話唔記得拎, 嗰樣又話要出去攞, 都算喇!! 咁凍嘅天, 又唔做肩頸(話試做唔包喎), 咁叫我換衫做咩呢?! 重要叫.... 先識開暖毯囉!! 做做吓... 我問佢... 可唔可以做大d張暖毯呀?? 佢話.... 哎呀!! 唔好意思.... 岩岩用部機除咗暖毯個插蘇喎!! 嘩~~ 我哋呢d用慣暖毯嘅, 真係你開細1度都知啦!! 你重要抆我個插蘇.... 哈哈~~ 係未想凍死我哎!!

話主打按摩好耍家!! 話咗大力都重係咁大力囉!! 有冇聽人講嘢家?! 都算喇.... 又未去到好痛嘅!! 但係佢按我對眼就按得好好好貼囉, 直頭好似一下一下咁摸我對眼珠咁!! 搞到後未出到房照鏡, 睇到我對眼起曬紅根囉!!

跟住佢就塗咗個精華, 搵部唔知咩LED藍色光嘅嘢(唔同人解釋吓係做緊咩囉), 向我塊面到碌咗幾碌, 但係又碌得唔夠貼囉! 連髮線位都未到就收手啦!!

到做個黃金面膜喇, 真係金色家!! 嘻嘻~ 不過倒個面膜落我塊面時, 入曬鼻囉!! 我伸手示意, 佢即刻知.... 佢話... 入鼻係未呀.... 等一等吓, 等我倒埋先!! 吓~~ 等你倒埋先.... 咁我重吸唔吸氣好呀?! 咁奇怪嘅!! 重要嗰陣我個咀都封住咗喎!! 一上咗個mask, 佢就話佢好忙, 一陣搵第二位同事幫我起模, 之後叫我自己出去就得家啦!! 咁都得....

做完例牌有個人sale一大餐啦!! 其實價錢就一d都唔貴, 圍起上嚟都係365一次, 佢重比我做埋肚都得(可以去吓d肚皮紋嘛), 又真係好吸引嘅!! 將貨就價嘅話, 其實都可以考慮, 我又諗吓.... 佢又sale吓咁囉!! 但結果我都係唔join啦! 事關我諗住針灸減肥嘛, 等我廋番睇吓咩情況先算啦!!

點知佢一聽我唔join, 即刻拍落枱面張單到話.... 咁出嚟比錢呢(把聲衰到呀)!! 收咗錢佢話.... ok家啦!! 我問佢.... 吓! 咁我支精華同超市禮券呢?! 佢就向枱頭抽咗張紙比我, 又向張單到了幾隻字, 話... 精華冇貨呀!! 下次上嚟拎哎(講得超快, 想趕我走)!!

出咗門口, 睇吓佢比我張紙, 原來嗰張超市券, 要向辦公時間向旺角一商廈到拎嘅!! 吓~~ 我哋呢d要番工嘅點拎呀?! 唔通星期六明明放假, 特登早起身, 重要搭幾蚊van仔落去拎呀!! 真係低低哋家喎!! 就係想博你哋唔去攞囉!!