肛探37.8 / 100究竟係未燒啫!!

尋日媽咪話小春一早飲飲吓奶時, 谷到面都紅曬, 咁就估佢係痾bubu啦!! 一陣又谷到面都紅喎, 跟住就嘔奶喇!! 係飲飲吓嘔囉!! 平時佢冇咁嗰喎!! 加上朝早摸佢手仔又凍, 所以唔放心就幫佢探吓熱啦!! 37.8.... 根據d奶粉送嘅探熱表嚟睇就岩岩擇介, 冇發燒!!

晏咗d又變番37.5喇...... 密切留意佢..... 一陣又高d..... 一陣又低d..... 到到夜晚10點幾.... 又37.8..... 即係100度啦!! 媽咪話肛探加1度, 唔係燒.... 但係問吓于太.... 佢就話如果100度就會同佢孫女去睇醫生囉!! 唉~~ 咁點呀!!

我話不如都係睇啦(媽咪屋企樓下有夜診)!! 費事半夜燒唔知點算嘛!! 媽咪打電話去掛咗號..... 姑娘叫佢遲多幾個字先落去..... 點知臨出門口..... 探多次熱..... 竟然得37囉!! 哈哈~~ 玩嘢!! 媽咪話.... 37冇理由同佢睇醫生家!! 都係再睇吓先啦!!

呢個時候, 志雄就主張比佢食d退燒藥先啦!! 媽咪就覺得, 小朋友如果體溫上上落落, 應該多d留意佢, 如果食咗退燒藥, 就唔知佢個病點發展喇!! 唉~~ 我都係第一次遇到呢個問題, 聽邊個講好呢?! 上網問吓人先, 點知大家d意見不一..... 最後...... 我決定...... 你比得人湊..... 你就要信人啦!! 何況..... 嗰個重要我媽咪添!! 我好放心佢對病人嘅悉心照顧(我一病就想返屋企搵阿媽, 嘻嘻!!)

點幾鐘.... 我同媽咪通電話.... 小春竟然連37都冇囉!! 激死~~

今朝出門口打比媽咪, 嘈醒咗佢.... 我問都冇問, 即刻叫佢訓番啦!! 晏咗d, 志雄打嚟問bb點, 我話媽咪都冇電話嚟, 即係話冇事啦!! 因為如果有事, 媽咪一早已經會同佢去睇醫生, 唔會重訓緊覺囉!!

結果媽咪再打嚟時, 就話佢37.5喇, 應該冇乜事家啦!! 不過都要留意吓咁囉!! 媽咪重學識email小春d相比我添呀!! 第日佢可以每日影d小春嘅相sent比我啦!! 咁我未可以日日都見吓個女囉!! 哈哈~~

 

點解Daddy Mammy咁多日都唔嚟睇我嘅?! 唔通佢哋唔鍚我啦?!

 

傻妹, MaMa掛你掛到失曬暈呀!! 今晚就嚟接你吓~~