唉！大出血！

話說呢，我好鍾意Abercrombie呢個牌子o家，成日都會周圍去d出入口店搵，不過e+已經少咗好多地方有啦！又要堅又要平嘅真係幾難搵，你知啦，買開又平又靚嘅，要我去shop買貴嘅，好唔抵o家嘛！未買過平嘅就話啫！

前幾日，有間去開嘅出入口店打嚟，話番咗d A&F嘅長T同埋冷衫喎！咁我就去睇吓啦，其實都冇乜期望o家咋，因為近兩次去都好唔掂，不過又即管去吓囉！去到都冇乜靚嘢，唉！是旦攞咗件冷衫就諗住走喇！點知呢個時侯，眼尾突然見到d牛仔褲中，有個鹿仔牌，即係攞嚟睇啦，好靚喎！不過試完，係唔o岩著咯！由於佢哋嗰到嗰d係次貨，所以係冇第二個size，冇得買呢！正依依不捨嘅時候，唔忿氣去睇埋d扯布褲，哈哈！點知...咁就出事喇！

我有d咋型咁望住老板娘點解唔話我知，番咗咁多褲，我搵咗好耐o家啦！你知啦，買平嘢通常唔敢買褲，因為冇得試嘛！佢嗰到有得試o家，不過冇A&F d長褲賣，e+有喇~佢竟然唔話我知，太過份啦！老板娘解釋，因為d貨都係尋日番，佢都未得閒睇吓番咗d咩喎！好彩我睇到啫！

唔該，每個款每隻色都拎比我試哎！嘩！二百幾蚊條，抵到爆呀！條條我都鍾意，點算呢？結果我買咗4條褲，一條係迷彩嘅，一條卡奇色嘅，一條啡黑色嘅，同埋一條米色可以著番工嘅！重買咗一件冷衫同一件外套添，之後我重話埋志雄落嚟睇，佢都買咗兩條褲同一件T，結果買單~~多謝二千零八十蚊哎！

唉~~即係唔係話二千幾蚊好多呀！不過向出入口店買二千幾蚊，就真係好似誇張咗囉！重話今個月想節省d添！估唔到，只係放一放早就出事喇！第日都唔好立亂自己行街呀！哈哈哈！不過，我諗~~車！呢d嘢係鍾意嘅，遲早都會買o家啦！我不過係今次一次過買咗先之嘛，費事到時想買，搵唔番添！咁諗真係舒服好多！嘻嘻！