漸變色文字

大家睇吓我幾叻！d變色字係未好靚呢！係我個blog fd教我o家！佢真係好勁呀！跟住佢學
嘢，由乜都唔識嘅我，都可以整到個blog越嚟越多嘢，越嚟越靚！我真係越嚟越覺得，電腦
真係太神奇啦！

哈哈哈！我真係實在太叻啦！好開心呀！

試妝&男禮

星期日, 沙律陪我去試妝，個化妝師都幾有心機, 個妝亦ok啦！係我d皮膚乾d囉！可能係因為呢排d天氣太乾燥呱！唉！大家知啦，我係一個唔塗任何護膚品嘅人，單靠天生麗質,

平時化淡妝就完全冇問題啦！但係一塗嗰d咁嘅又濕粉又乾粉又碎粉, 九廿幾層嘅時候，就經唔起考驗啦！個虎口位嗰兩條紋深到呢！原先我都諗住下個月去做吓彩光想改善吓！點知個化妝師話叫我千祈唔好喎！佢話佢個客早三個月做都回復唔到喎！超！咁即係呢條Q又唔得啦！唯有都係勤d做Facial啦！

星期一, Jofee同Matthew去試男禮，我同豬豬一去到，見到佢哋

兩個好煩惱嘅表情，跟住又話條褲有褶好yor，又話d禮服同條褲唔同色，又話要自己出去配褲~又咁又咁，咁你件禮服又唔帶得出街又點配褲啫！搞咗好耐，結果原來人哋有冇褶嘅褲個囉！一換咗~~條氣順曬！到選禮服啦！Jofee一味驚誇張，但係結婚係要適量地誇個喎！咁又要氹佢試啦！結果都算ok啦！

 

之後到Matthew，挑戰就大啦！佢係咁話接受唔到自己咁樣，又話想著番屋企自己嗰套又剩，我明我明~~佢型慣！但係人唔係剩係得一面o家嘛！除咗型都可以玩吓第二隻feel囉！首先佢就換咗件恤衫同褲啦！出到嚟就勁話人哋條褲緊，又話上到條腰到~~跟住勁張個褲頭係咁捲底去，話要整到變底腰喎！

呀~~~激死我啦！之後佢又拎咗條幼呔！本來就冇問題，不過大家要知道，禮服恤衫係企領o家嘛！打幼呔又好似有d不倫不類囉！佢又話要著番屋企嗰件恤衫嚟襯條呔啦！救我呀！跟住著埋件西裝褸，好似著咗老豆件西裝咁！

我真係頂唔順啦！打比沙律投訴，你條仔呀！咁咁咁呀！沙律就叫我同佢講，你有幾時見過張國榮著踢死兔扮Hip Hop呢？Matthew就答係嗰時未有Hip Hop咋！

 

好彩個女仔好快就攞過另外一件禮服款，小修腰嘅比佢！ee又幾fit喎！向呢個時候，奇怪嘅事就發生喇！唔知點解Matthew突然間括咗出去，話著得小禮服唔著企領恤衫好似唔係幾好喎！我更係即刻連番“係係係”啦！佢又話喇~~

咁著企領恤衫打幼呔又好似唔係咁好哦呵！“更係啦！更係啦！”咁佢就換咗個bow！嘩！我即刻定番好多！跟住個女仔話不如你換番條大碼褲試吓啦！應該唔係大好多嘅啫！咁佢就試啦！真係ok喎！我更係打蛇隨掍上啦！咁不如試埋個腰封呢！試吓之嘛！到佢帶咗上身，嘩！好靚仔呀！好有型呀！係咁讚佢囉！

佢又抓吓個頭話咁要剪吓頭髮啦！哈哈！佢話喎，咁大個仔做過咁多次兄弟都未試過咁行，我同豬豬即刻異口同聲話“你今次係做伴郎呀！”

有鼓勵, 更係希望做得更好啦！

我個人就真係幾古怪，耐唔見一個人~~我就會突然好掛好掛住佢(就算唔係好熟都會)，有時重會即係打電話比d人，同佢哋講我好掛住佢添！不過到真係打到去，講完掛住之後，

就冇嘢講啦！哈哈！如果嗰個係我d Best fd，例如MC我重會覺得有d內疚添！

 

曾經...我又有為咗劉德華同黎明，內心爭扎得好厲害過！話說當年黎明岩岩出道，做咗套天涯歌女(女主角係陳松齡) 嘩！靚仔到呢！

對眼電死人咩！但係當時嘅我係超級華仔迷(e+都好鍾意)，點算呢？如果我鍾意黎明，會好對唔住華仔嗰喎！點算呢？貪新忘舊！我睇唔起你！爭扎爭扎吓！我終於做咗一個決定啦！

黎明正衰人嚟o家！佢唔出見就唔會搞到我有異心啦！自始之後我就唔鍾意黎明啦！(e+咁大個人喇！更係冇再咁諗啦！)

 

講咗咁耐！究竟想講咩呢？~~

 

哈哈！其實係想話，自從開咗facebook之後，我發覺自己冷落咗個blog呀！雖然平時都唔係咁勤力寫！但係始終硬係覺得係自己分咗心, 真係唔岩喇！哈哈！重要嗰日向facebook有個女仔add我，話鍾意睇我個blog添！

哈哈！咁我真係愧對我d讀者啦！哈哈哈！以後記住要多d番嚟寫吓嘢先得啦！

邦邦生日

星期六，一早出咗去剪頭髮，跟住約咗Hedy去補條眉，之後夜晚就去咗邦邦嘅生日會！

嗰晚見番好多好耐冇見嘅朋友，感覺好親切又好奇怪，玩就更係冇問題啦！但係已經唔係心交嗰種啦！始終~~我已經唔係嗰個圈子嘅人啦！

點都好啦！見到黃德我真係好開心囉！重有偉雄真係大個仔啦！真係唔可以唔認~~我真係老啦！

Facebook

之前成日收到人d email叫我玩facebook，我心諗...未同friendster一樣，開咗之後幾年都唔上去睇一次！冇乜意思！但係呢排越嚟越多人玩，重要唔止email，d人直頭係dau口dau面問，好撚煩！結果~~我更係頂唔順開咗啦！

到e+開先覺得自己out out哋！人哋個個都已經有九廿幾個fd，自己呢？重未識點玩！不過...循例都要試吓o家！唔係一陣人講咩都唔知就比人笑啦！但係for我嚟講呢，冇啦啦send杯drink比我，或者係我又冇啦啦比隻蛋你，嘻嘻！真係無聊之極！

可能係我重未識享受呢種樂趣呱！但係如果有d人真係可以搵到失散多年嘅朋友，咁意義就變得好大囉！好唔好玩~~又即管玩多一排試吓啦！

加咗新嘢！

前一排睇睇吓人哋d Blog，比我發現到有個人又係用Pink Panther做主題，咁都不特止，佢重好叻o家！重教人點樣整靚自己個Blog添！

大家有冇發現，我個Blog已經加多咗音樂同埋計時器啦！好勁呀！之後我重會整好多嘢o家！不過真係要比d時間學吓先囉！

哈哈！唔知佢之後重會教d咩呢！好期待呀！

律師教你冷知識

尋晚同Jofee上咗律師樓，簽擬結婚通知書，搞完一大餐，重要上埋個講座！不過又估唔到喎，原來有好多嘢學o家！例如企位點可以靚d啦！點可以避免新娘嘅裙擺比人踢嚟踢去啦！交換介子時應該交叉咁拖手啦，帶介子嘅手勢係應該手心向天啦！咁就唔會阻住攝影師影隻介子啦！嘩！真係唔講唔知呀！最難得嘅係，連Jofee都話學到嘢呀嘛！

上完堂，同Jofee經過一間食日本放題嘅，就上咗去諗住試吓喇！跟住點......更係失望收場啦！哈哈！Jofee食完重同我講，我哋要記住記住記住，放題都係唔岩我哋，因為我哋食得又唔多，同埋通常放題d嘢都係唔新鮮嘅！不過唔知點解次次我哋都會話試吓啦！咁就又上當啦！哈哈！