重攰過冇放假

由12號開始放假, 放到今日先番工, 足足放咗成6日假, 唔知重以為我有幾嘆, 其實攰到仆街！重攰過冇放過假！事關11 - 13號志雄屋企油油, 我諗住上去幫手啦！點知比我媽咪話睇死我幫唔到d咩！平時個人懶到咁！唔好左住人哋添呀！哈哈！結果...我上到去都係幫手摌吓個地下d油蹟咋, 就攰到我不似人型啦！兩日過後, 我同志雄乍嬌咁講...我咁大個女都未試過咁攰呀！

我以前向屋企都未試過做咁多嘢o家！點知志雄就即係扮曬嚴肅咁

(其實向到偷笑)篤住張枱話“呢到以後就係你屋企呀！”哈哈哈！我即刻O曬咀, 唔知好嬲定好笑啦！之後我將呢件事同d朋友講！個個嘅反應都係一樣咁話！哼哼！你死啦！第日有排你受啦......哈哈！咁衰哎嘛！夾埋一齊玩我哎嘛！嘻嘻！

尋日, 約咗去芝柏影相, 因為係酒店送嘅關係, 有埋全家福影, 所以林林同媽咪都晨咁早就陪我去到數碼港！由於我想影全家福嗰陣可以set埋頭點點點, 所以就諗住影咗婚紗相先囉！點知...11點選完衫, 化得妝嚟, 影第一個look, 已經兩點喇！不過,  嘩！靚到呢！係我最鍾意嘅英式slim款 + 大厘士邊頭紗！真係勁靚！但係結婚嗰日我唔會選擇著, 因為唔夠架勢嘛！唯有影相時著吓, 叫做過吓引啦！佢哋幫我選咗5個比較優雅d嘅景嚟影, 就係李克勤首紙婚個Music Video入面個書房、鋼琴、大班椅、火爐同埋一個大蛋糕！

影完大家已經餓到飛唔起啦！ 跟住志雄同林林就出咗去買嘢比我哋食啦！食完~~又繼續化妝set頭...OK！影第2個look影咗9個景, 到影完已經係5點幾啦！最可憐嘅係媽咪同林林, 特登請曬假, 點知嚟罰坐！坐到大家腰酸背痛！到到終於影全家福啦！又咁影, 又咁影, 你同我影, 我同佢影, 佢同佢影, 一齊影！足足又影咗5個景！

最最最大嘅問題係~~~~~~~~~

酒店只係送婚紗照6款8張同全家福3款4張比我哋囉！唉！佢同我哋影咁多...即係全心想我哋自己曬多d相嘅啫！知唔知幾錢曬多一張呀！190蚊呀！低能o家！我已經叫咗佢哋到時記得記得制止我！唔好一陣又好似上次咁曬多咗成80張啦！哼！到時破產都似！