阿山生日

話說自從當年冇同Hedy玩之後，都冇同阿山慶祝過生日啦！記得當年阿山生日係一年一度嘅盛事！點解？哈哈！唔係因為佢有咩特別，只係因為大家出嚟做嘢之後，同d村友聯絡就少咗好多啦！而佢生日通常都係最人齊，大家亦玩得特別高興！

上星期五，事隔咁多年之後，又有機會參與佢生日啦！可惜~~同我想像中相差九千八萬里！可能係因為今年到埸嘅村友唔多啦！只係得我啦、Hedy啦、邦邦、豬敏同蕭顯志！特別嘅事得一摏，就係阿山好早飲大咗

，向我扶佢嘅時候，佢摟住我，竟然喊住咁同我講，好高興向佢嘅生日Party見到我，令佢覺得好似又番番去當年成班人好開心嘅日子咁，佢話佢個人其實好念舊......

其實我又何嘗唔係呢！...係唔係呢？係唔係呢？定係因為呢幾年冇~~所以先特別想要呢！係懷念定係真係重想要呢！總覺得每次見到佢哋，唔係傾唔埋，亦唔係玩唔埋，但係硬係差咗d嘢...差咗d一齊成長嘅經歷，你可能會話識咗咁多年，理應好熟悉大家脾性，一鐽就著番啦！又冇代溝，冇可能有問題啫！唔係囉！如果新識嘅朋友當然冇問題啦！但係對住佢哋，一班一齊經歷低能年代嘅舊朋友，冇咗...應該話錯過咗大家一齊經歷成長嘅片段，就成件事變得唔完整啦！你可以話我執著，係~~我應！

不過畢竟有d嘢冇咗就追唔番o家啦！所以我唯有好好珍惜我e+嘅所有朋友，唔好再有任何錯過，亦希望好快又可以再建立到新嘅共同嘅搞笑嘅十萬個可能啦！

P.S. 其實都真係幾想見吓黃德囉！