好開心呀！等咗九年,終於等到啦！

今晚~~正確d應該係尋晚，即係廿三號囉！我如常上志雄屋企食飯，睇睇吓電視，佢突然話你想唔想收禮物呀！我先諗起，係喎！佢話買咗聖誕禮物比我嗰喎！本來佢叫我自己試吓搵吓向邊，之後又偷笑話其實佢鎖住咗！哈哈！

 

跟住佢就叫我坐向床邊將份禮物交比我，我打開個好有聖誕氣氛嘅索繩袋，褢面有個盒，打開個盒~~係一只花花介子，嘩！好開心呀！(其實佢唔係第一次送介子比我)跟住佢就跪低，問我嫁比佢好唔好！當時第一個反應就係，好好笑！我都未見過人剩係著住一條短褲求婚家！佢重要係兩隻腳都跪曬向到！重要花都冇！我即時都唔知比咩反應，就話點解冇花嘅，佢話趕唔切喎！佢重話雖然今次呢隻唔係好大只，但係以後每年都會送一只比我！嘩！幾識乙水人呀嘻嘻！跟住佢少少低頭，但係兩隻眼向上望，突登做個怪表情問多我一次，我就應承咗佢啦！雖然，同我想像中嘅有天壤之別，但已經足夠令我感動到喊咗出嚟！再之後？？............................更係深情擁吻啦！重洗問！

我問佢點解唔等食聖誕大餐或者先問，佢話太心急喎！哈哈哈！

咁大家又唔洗即係趕住做人情嘅！未有咁快，起碼都08年嘅事啦！況且我哋都重要儲吓錢先！大家唔洗心急呀吓！實有機會嘅！哈哈！

*P.S.  事後先記得同佢約法九廿幾章！哈哈！例如：以後唔准鬧我，話都唔得！唔准發脾氣！連我飲醉酒都唔准發脾氣！跟住佢即刻話，咁你唔准飲醉酒，我就話唔得喎！哈哈哈！